| شازادە فەرما خورشید سالار
|
چەنی خاتوونە بە تەخت بوون سوار
|
| وێش هەم سوار بی وە فەرهەنگ دێو
|
کەفت نەرووی زەمین وەلوەلەی غەریو
|
| خاتوونە و خورشید شین نەرووی حەرەم
|
نیشتن نەرووی تەخت پیرۆز تارەم
|
| شازادە چەنی لەشکر فەرەنگ
|
داخڵ بین بە شار بەساز و ئاهەنگ
|
| وەزیران تەمام سوجدەی شا بەردن
|
شازادە فەرما دێو حازر کەردن
|
| فەرمان دا فەرهەنگ وەزیران شار
|
ببەر بە ئاسمان هەوا دەر بەوار
|
| دێوان هەریەکێ وەزیرێ بەردن
|
نەرووی هەوادا سەرنگوون کەردن
|
| ئەهل شار یەکسەر فەریاد ئاوەردن
|
تەزەروع بەلای شازادە کەردن
|
| شازادە جەشار گوزەشت کەردش
|
ئەوسا ئەهل شار ئۆقرە ئاوەردش
|
| شازادە لوا نیشت وە بان تەخت
|
واتش ئەی فەرهەنگ بانگ کێشە بەسەخت
|
| بواچە هەرکەس خیانەت کەرۆ
|
عیبرەت جە وەزیر فەرەنگ هۆرگێرۆ
|
| فەرهەنگ دێو دەرلاد جاڕ کێشا بە شار
|
ئەهل شار یەکسەر کەردش خەبەردار
|
| شازادە دەردەم فەرهەنگ سالار
|
نەرووی تەخت زەڕ کەردش بەرقەرار
|
| وێش لوا بە ناو سەراچەی حەرەم
|
خاتوون و خورشید هەردوو دی بە چەم
|
| هەردوو هۆرێزان کەردشان پێشواز
|
پێشوازی کەردن بەسەد عیز و ناز
|
| شازادە دەردەم عەلەیک سەند بەناز
|
نیشتن نە ڕووی تەخت هەر سێ بەدڵواز
|
| خەیلێ دەسبازی کەردن نەئەو جا
|
خاتوونە خانم هۆرێزا وە پا
|
| پیاڵەی شەراب ئاوردش بەوار
|
وێش بی وە ساقی خاتوونەی نازدار
|
| پیاڵەی شەراب کێشان وە سەردا
|
دەم دان وە دەسماڵ عەتر عەنبەردا
|
| خاتوونە واتش شازادەی بێگەرد
|
ئەوسا کە ئامام عەرز بابۆم کەرد
|
| تا وەقت غرووب مەیۆم بە دوما
|
قەسەمم واردەن من وە فەرق شا
|
| شازادە دەرلاد مورەخەسش کەرد
|
هۆرێزا وە پا ڕوو نە ئێرەم کەرد
|
| شازادە چەنی خورشید بە داخواز
|
هەردوو شین نەخاو شیرین بەدڵواز
|
| سۆب سەحەر هەردوو بێدار بین نەخاو
|
نیشتە بین جە ڕووی کورسیی بۆ گوڵاو
|
| شازادە خورشید نیا وە ڕووی تەخت
|
وێش نەپای تەخت قەرار گرت وە جەخت
|
| بوزرگان شار یەکسەر ئاوەردن
|
گشت نەپای تەخت هەم حازر کەردن
|
| شازادە ڕووکەرد وات بەوەزیران
|
تەمام ئەهل شار سەرحەساب کەران
|
| هەر کەس نەفەرمان خورشید شۆ وە بەر
|
ماچوون وە جەلاد بکەرۆش بێ سەر
|
| تەمام بوزرگان گشت خەلعەت کەردش
|
ئاداب سەڵتەنەت بەرقەرار کەردش
|
| وەلایەت فەرەنگ سەقام دا لێشان
|
هەر کەس کە لوان بەجاگەی وێشان
|
| وێش چەنی خورشید لوان وەحەرەم
|
دان جە پیاڵە دەمادەم دەم دەم
|
| جەدمای سێ ڕۆژ شازادەی بێگەرد
|
ئەو جەلای خورشید ڕوخسەت تەڵەب کەرد
|
| خورشید عاڵەم بە دڵەی پڕ دەرد
|
شازادەی سەروەر مەرەخەس بکەرد
|
| شازادە نەپوشت فەرهەنگ بی سوار
|
ڕوو کەرد نە وڵات مەغریبی دیار
|
