| تەڵەب کەرد یاران خان محەمەد وە پێش
|
پەرێ تەدارەک پەی عەرووسیی وێش
|
| وات بەخان محەمەد وەزیر کامڵ
|
باوەر بە مەنزڵ بە موودەهای دڵ
|
| ئەلحەمدولیللا بە کامەرانی
|
حاسڵ بی مەتڵەب بەشادکامی
|
| جا وەعدی وەسڵ و شەوق شادییەن
|
کار خەیر تەفرەش موناسیب نییەن
|
| بشۆ وە خدمەت پادشای سەروەر
|
پەرێ عەرووسی ڕوخسەت تەڵەب کەر
|
| شا وات ئەی وەزیر ڕوخسەت دام بە تۆ
|
فەرما واجێبەن موبارەکش بۆ
|
| بەرەسم قانوون شاهانە دەستوور
|
ئەساسەی عەرووسی کەردن بەزەروور
|
| دوو هەفتە تەمام شادی نیاشان
|
شای نۆش ئافەرین عەقد کەردشان
|
| یاوان بە موراد دوو یار جانی
|
مەشغووڵ بین بەعەیش بە کامەرانی
|
| یاشای کەرەمدار جە هەر زەمانێ
|
بیاوان بەکام گشت نەوجەوانێ
|
| شاهان ئێقلیم بوزورگان یەکسەر
|
لوان بە خدمەت سالار سەروەر
|
| گشت نەرووی ئیخلاس بەدڵگوشادی
|
کەردشان تەمام موبارەک بادی
|
| بازهەم شازادە شێر ڕووی نەبەرد
|
بێ حەد جەنیشان مێهرەبانی کەرد
|
| فەرما بەدەماخ شازادەی دلێر
|
وەعدەشەن شادی خان محەمەد وە خەیر
|
| خاتوونەی پەری شای گیسوو کەمەند
|
چەنی جەهانسۆز شۆخ دڵپەسەند
|
| هەردوو وێنەی قورس خورشید ڕەخشان
|
کەردن تەدارەک ماهـ زەڕئەفشان
|
| ئارایش کەردن بە شادی و دەماخ
|
مەنمانا جە تەرح تاوسان باخ
|
| شازادە بەوێش غەمان سەرئاوەرد
|
بەردش تا داخڵ بەتۆی پەردە کەرد
|
| داخڵ بین بەهەم دوو تەمام نەورەس
|
بە مەقسوود کام ئارەزووی هەوەس
|
| یاوان بە مەتڵەب بەموراد دڵ
|
چون بوڵبوڵ یاوان بەوێساڵ گوڵ
|
| یەک دوو ڕۆ بە شاد جە مابەین ویەرد
|
بەنای کار خەیر پەرێ حەمید کەرد
|
| فەرما خاتوونە شای شیرین ئەنداز
|
بۆ بە مەشاتەی شۆخ دیدە باز
|
| کەردش ئارایش ماهـ جەهانسۆز
|
مەدرەوشا جەڕەنگ خورشید پڕسۆز
|
| وێنەی خان محەمەد ئەویچ بەئیعزاز
|
بەردن وەپەردە شای شەکەرین ڕاز
|
| جە دمای چەندێ عادڵ بەئینساف
|
هۆرێزا چەنی بوزورگان قاف
|
| ئاخوون و قازی هەم تەڵەب کەردن
|
تەمام وە مەجلیس شاهی ئاوەردن.
|
| نیکاح خورشید خاتوونەی نازار
|
بەستشان پەرێ شێر کارزار
|
| بەڕەسم قانوون عەقدشان وانا
|
بەڕەویەی وێشان عەقدشان وانا
|
| بە ساعەت خۆش دەقیق ویەردە
|
شازادە وە خەیر لوا وەپەردە
|
| سەڵامێ کەردش وە یار مەهوەش
|
بورقەی زەڕنیگار هەوادا نە ڕووش
|
| خورشید نازار خاڵ سۆسەنی
|
بەڕووی نازەوە مەکەرد تەوسەنی
|
| وات من فیدات بام تەوسەنی مەکەر
|
نازت مەکێشوو دڵ خەستە مەکەر
|
| نازار مەرگ من سەبرم نەمەندەن
|
پەنجەی زۆر عەشق تاقەتم سەندەن
|
| نەڕووی تەخت زەڕ دووبارە پڕناز
|
چەم نیان وە هەم بەسەد عیزو ناز
|
| هەردوو چەنی هەم نیشتن وەدڵواز
|
وە عەیش و نیشات شۆخ شەکەرراز
|
| نەجام وێساڵ سێر شەربەت وەردن
|
پەرێ ئیسراحەت مەیل خاو کەردن
|
| سوبح کە ڕۆشن بی شوعاع لیک خوەر
|
لوان پەی حەجلە مەیموونە و تاج زەڕ
|
| دیان شازادە نامان وە بیروون
|
موحکەمەن دەرگا بەستەن ئەندەروون
|
| نیشتن وەپشت دەر هەردوو وە خەمین
|
تا سەڵات زوهر شازادەی ماچین
|
| هیچ مەعلووم نییەن نمەبۆ بێدار
|
دەرشکەستن حۆریان نازدار
|
| دیان وە ئۆتاق دوو حۆری جەبین
|
دیان وەسوورەت سوڵتان ماچین
|
| دیان هەردووشان بییەن وە زووغاڵ
|
شازادە چینی و شۆخ نەونەهاڵ
|
| کەف کەردەن دەهەن حەڵقەی جەواهێر
|
کۆکۆ کۆ بییەن چون بەرف باهێر
|
| مارێ حەڵقەدان نەرووی ڕەختخواب
|
قەترانی زەنگی بێدار بی ژ خواب
|
| ژسەدای پاشان هۆرێزا وە پا
|
ئاما پەرێ قەسد دوو حۆری لەقا
|
| ژتەرس ئەو مار شۆخان دوڵبەر
|
پەرت بین وە بیروون وەبێ پا و سەر
|
| وەزیڕە و هاوار یەخە کەردن چاک
|
سەداشان ویەرد ژ کورەی ئەفلاک
|
| مادەر شازادە حەرەمسەرای شا
|
ئامان ژەو سەدای شین و واوەیلا
|
| بێ پەروا لواپەی دین فەرزەند
|
دیاش ناپەیدا ئەو مار گەزەند
|
| وێش وست وە ڕووی نەعش فەرزەند نازدار
|
شریقان چون ئەبر وادەی نەوبەهار
|
| خەبەر چی وە گۆش بێ چارە عادڵ
|
ژسەر تا وە پا وێش نیا نە گڵ
|
| تاج وست وەزەمین چی وە ئەندەروون
|
زاریش چی وە بورج چەرخ نیلی گوون
|
| تەمامیی شاهان گریبان چاک چاک
|
نیشتن تەمامی بەڕ و «بیل» خاک
|
| کەنیز و غوڵام شین نەتۆی پەردە
|
دیشان هەردووشان بە وێنەی موردە
|
| هەرچێ واتن شا ناما بە گوفتار
|
داشان بە سەردا کەردشان هاوار
|
| نە ئەهل حەرەم واوەیلا خێزا
|
زەلزەلە چون ڕۆی مەحشەر ستێزا
|
| نەزانان ئینە خوابشان بەستەن
|
بەو تەور مەزانان یە ماران گەستەن
|
| جە زایەڵەی شین نازک ئەندازان
|
جە سەدای ناڵەی جەرگەی کەنیزان
|
| خەلایەق تەمام هجووم بەردشان
|
خەیلێ فەراوان شیوەن کەردشان
|
| واتن شازادە ئیمشەو نەپەردە
|
هەردوو بێ هۆشەن بە وێنەی موردە
|
| ئەڵبەت نە ئاسیب کار نامەردەن
|
زەهرەن نەجگەر هەردوو کار کەردەن
|
| عادڵ شا خەبەر فەرزەند یاوا پێش
|
دەردەم وە تەعجیل شی وە باڵینش
|
| دی کە شازادە مات و بێ دەنگەن
|
مەواچی سوورەت نەقش ڕووی سەنگەن
|
| غەوغا کەفت نە شار خەلایق جەم بی
|
یەکسەر ماتەمین پەژارە و خەم بی
|
| سێ شازادە خورشید عاڵەمگیر
|
نیان بەرووی تەخت بەزاری و زەویر
|
| شاهـ و بوزورگان تەمامی یەکسەر
|
ئامان وە خدمەت شازادەی سالار
|
| مەواتن سەد حەیف پەی ئەی جەوانە
|
پەی ئەی شازادەی شۆخ زەمانە
|
| خاتوونەی پەری شازادە لاونا
|
واتش حەیف پەی تۆ شیر کینە خوا
|
| حەیفم پەی ئەو ڕۆی کاخ سولەیمان
|
زەلقەم و دەلقەم تۆ کەردی بێ گیان
|
| حەیفم پەی ئەو ڕۆژ موڵک زەنگوڵە
|
ئارایشت کوشت ئەو سیا غوڵە
|
| تەلیسم زەنگوڵە گرد دای وە باد
|
شای نۆش ئافەرین هەم وێم دای نەجات
|
| ئەو ڕۆژە سینەی «مەسعوود» کەردی چاک
|
ئیستە کەفتەنی بەڕووی تەخت خاک
|
| ئەوەند زاری کەرد خاتوون فەراوان
|
تەمام بوزورگان دەس کەرد بەگریان
|
| شازادە خورشید وەدەخمە بەردش
|
نیا نەڕووی تەخت هەردوو لوخت کەردش
|
| ئەو عەبدورەحمان چەنی نەسروڵا
|
شین وە باڵینش بکەردن دەوا
|
| دەمێ نیگای ڕووی شازادە کەردن
|
گەستەی مارانگاز دەوا نەبەردن
|
| فەرهەنگ دێو چەنی مورغ وەفادار
|
هەردوو هۆرێزان تا شین وەگوڵزار
|
| حەکیمان قاف یەکسەر ئاوەردن
|
نەدەور شازادە تەمام جەم کەردن
|
| کزەی مارانگاز هیچ نەبی دیار
|
حەکیمان دەردەم ئامان بە گوفتار
|
| کەسێ شۆ وەلای فەیاز عابێد
|
ئەو باخەبەر کەن دەرلەحزە بە زوود
|
| بشۆن وە خدمەت دامان بگێرۆت
|
بەڵکە نە ئەی کار خەبەر بدەرۆت
|
| خاتوونەی خانم هۆرێزا وە پا
|
واتش ئەی حەکیم وێم مەشوون بەوجا
|
