| سەنگی هەواران، سەنگی هەواران
|
سەنگی سیا ڕەنگ کۆنە هەواران
|
| جای بەزمی ڕەندان نیشانگەی یاران
|
تەختی خاڵ خاڵان نازک نازداران
|
| جە زەڵ مەزانوو سوفید سەنگەنی
|
ئێستە سەبەب چێش سیا ڕەنگەنی؟
|
| کۆن عەیش و نیشات نەو وەهارانت؟
|
کۆن ئاهووی ڕەندان پۆل نازارانت؟
|
| سەرخار چوون تۆ کۆی عەنبەر پۆشان بی
|
دایم ئامەشۆ وەلای تۆشان بی
|
| ئێستە جای ئەوان چۆڵەن وێرانی
|
ئەحواڵی ئەوان تۆ چێش مەزانی؟
|
| سا کە ئێد شنەفت سەنگی سیا ڕەنگ
|
بە ئاهـ و ناڵە لێم ئاما بە دەنگ
|
| ئەحواڵی دەردم دێوانەی بێ هۆش
|
مەر نمەزانی چی بیم سیا پۆش!
|
| ئەوسا من هەمڕاز خاڵ قەتاران بێم
|
تەکیەگای ڕەندان پۆل نازاران بێم
|
| ڕەنگم سفید بێ چوون ڕەنگی کافوور
|
شەوقی جەمینم دیار بێ جە دوور
|
| ناگاهـ پەی تەقدیر چەرخی پوڕ ستەم
|
ئێمە و نازاران جیا کەرد جە هەم
|
| ئێستە نە پام هەن بلووشان وە شۆن
|
نە وێم مەزانوو ماواشان چکۆن!
|
| فەڵەک ئەر زانێش چێش ئامان پێمان
|
دووری نازدارا نەرمانێ پێمان
|
| کەرداش دوچاری دووری و جیایی
|
نیاش بە دڵدا داخی سیایی
|
| ئی داخ هەر پەی من تا ڕۆی «ڕەستاخێز»
|
چوون هیجرانی یار گرتەنم بەڕێز
|
| ئایری هیجران کەوتەن نە جەرگم
|
سیاوش کەردەن سەر تا پای بەرگم
|
| چی کوورەی ئایر من نە جۆشەنان
|
جە سینەی سەیدی سیاو پۆشەنان
|
