| سەیدی عار نیەن، سەیدی عار نیەن
|
هەرکەس عاشقەن ناڵەش عار نیەن
|
| ئێمەیچ ناڵەمان خۆ بێ کار نیەن
|
کەس جە دەردی کەس خەبەردار نیەن
|
| منیچ دێوانەی خاڵی شیرینم
|
پابەندی تای زوڵف بۆ عەنبەرینم
|
| بەڵام ئێد شیرین ئەیامان نیەن
|
چوون خواجەی غەمخوار غوڵامان نیەن
|
| هەرگیز چەنی کەس تا سەر نەساتەن
|
شەرتش، ئیقرارش، وەفاش یەک ساتەن
|
| تا مەیۆ وە لام ڕەندی جەمین گوڵ
|
خۆفی هیجرانش مەنیشۆم نە دڵ
|
| ئەو ساتە شیرین مەکێشۆ دەستم
|
ماوەرۆ بە سۆز زامانی سەختم
|
| جە خۆفی لواش جەستەم نە لەرزەن
|
هاوارو هەی داد، هەی هانام بەرزەن
|
| گیرۆدەی هیجران، دایم بێ کەیفەن
|
کافر گیرۆدەی هیجران بۆ حەیفەن
|
| یاران یە سەنگەن، تەنش خاشاکەن
|
جەستەی مەینەتبار من تەماشا کەن
|
| یە سەنگەن پەی تۆر مەسۆچۆ بە تاو
|
دڵ قەترەی هوونەن چۆن نەبۆ بە ئاو
|
| سەیدی جە هیجران شۆخی جەمین لاڵ
|
سا پەیچێش نەبۆ بە کۆگای زوخاڵ
|
