| موغ بەچەی ئەی بەزم جورعەی بادەنۆش
|
بەی تەور نۆشا جام جە سەهبای سەرجۆش
|
| شەوێ ڕەوشەنتەر جە جام جەمشید
|
مدرەوشا چون شەم بەرجیس و ناهید
|
| نیشتەبێ خوسرەو جە خەرگای شاهی
|
نماناش وە چەم جە مەهـ تا ماهی
|
| چەند کەس جە نەدیم سوخەن سەنجیدە
|
دانا بزورگان، کار پەسەندیدە
|
| گشت تەمام خۆش لەفز، گشت شیرین خیتاب
|
گشت ساحێبی زیج جەفر و ئوستورلاب
|
| پەی تەفریح تەبع هومایوون ئەو
|
چەنی چەند بەگلەر حازر بین ئەو شەو
|
| جە سەردیی یەخبەند تۆف پڕ خەتەر
|
چابوک فەڕراشان ئاڵای پڕ هونەر
|
| بە نمەد دەوران خەرگەی شا تەمام
|
پۆشابێن پەی دەفع سەردی سوب تا شام
|
| سەحنش جە بخوور عەبیر و عەنبەر
|
جە ڕایحەی عوود جە میشک ئەزفەر
|
| بێزاربێ بێ لاف گەزاف بە ناقی
|
ڕیاز ڕەوزەی بەهەشت باقی
|
| جە زەڕڕین مەنگەڵ پەی پەی بە دەوان
|
مخێزا نە ڕووی گوڵ شاخ ڕێحان
|
| پەی دەفع سەردی نە ڕووی خاکستەر
|
مدرەوشا چون لاڵ بەدەخشی ئەخگەر
|
| زوخاڵ ئایر سیای ئەرمەنی
|
گا مبی خوونی، گاهێ سۆسەنی
|
| شاپوور وات هەی شا زیلل ئیلاهی
|
زێبندەی ئەورەنگ فەڕبەخش شاهی
|
| تا فرۆزانەن نە چەرخ ئەخزەر
|
قورس ئوستورلاب خورشید خاوەر
|
| تەناف خەیمەی خوسرەویت دایم
|
بە ئەوتاد فەزڵ ئێزەد بۆ قایم
|
| حەدیس بەندەی قەدیمی ساڵان
|
درازەن چون زوڵف نازک نەوهاڵان
|
| ئاخر حیکایەت سوورەت کەشتیی وێش
|
ماجەرای شیرین سەوڵ بێ ئەندێش
|
| بە لەفز فەسیح سەراسەر تەمام
|
عەرز کەرد وە خدمەت شای گەردوون مەقام
|
| سا کە ئێد شنەفت شای دەروون پڕ دەرد
|
واتاش ئەی نەققاش دانای جەوان مەرد
|
| ئاخر نەونەمام نەوخێز ساوا
|
کام مەقام جە شەوق نوورش بی ئاوا
|
| وات ئەو نەونەمام نەوڕسیدەی !نۆ
|
ئەو شۆخ شەش دانگ کڵاف عەنبەر بۆ
|
| بەو ڕێزەی ڕازان شەکەر ڕێزەوە
|
ڕاهیم کەرد دەرلاد بە شەودێزەوە
|
| بەڵێ من جە ڕەنج ڕاگەی سەخت دوور
|
نەیاوام بەو شۆخ شۆڵەی شەم دەستوور
|
| ئینشاڵڵا ئەو یار ئاهووی خوتەن بێز
|
یاوان بە مشکۆی بۆ میشک پەروێز
|
| خوسرەو جەی تەقدیر مەربووت شاپوور
|
گوڵ گوڵ شکاوا بێحەد بی مەسروور
|
| جە دمای تەحسین تەعزیم بێ شۆ
|
فەرماش دانەی لاڵ گەوهەر کەردن کۆ
|
| ئەو شەو بە عیززەت تا بەشەبەق زەرد
|
شاپوور چینی گەوهەر فشان کەرد
|
| شا هەم پەی شاپوور خیرەدمەند پێش
|
تەمقام کەرد بەیان سەرگوزەشت وێش
|
| مەعلووم بی لێشان ئەو شای شەکەر ڕاز
|
یاوان بە ئەقسای مەدائین بە ناز
|
| خاتیمەی کەلام بە ئێد بی مونجەڕ
|
هەم جە نۆ شاپوور پەڕەندە بێ پەڕ
|
| شیرین شەش دانگ چون ئاهووی خوتەن
|
باوەرۆ دیسان بە موڵک ئەرمەن
|
