| خامەی پڕ ئیعجاز شۆخ عیسا دەم
|
جە باب خوسرەو گفتوگۆی مریەم
|
| چون تووتیی ناتیق سوخەن شەربەت بێز
|
بەی تەور بی مەست مەست شۆخ شەکەر ڕێز
|
| شەوێ چون بە دوڕ پیرۆزەی ماوی
|
مێخ ڕێز کریا زوهرەی سەماوی
|
| شکەفت نە ڕووی باغ چەنی چەند هەزار
|
شکۆفەی ئەبیەز چون غونچەی وەهار
|
| خوسرەو جە مەجلیس شی بە مشکۆی وێش
|
جە داغ شیرین فراوان دڵ ڕیش
|
| بە جەند ئیلتیماس ئەو شای عیسا دەم
|
دەرخواست کەرد پەرێ شیرین جە مەریەم
|
| واتش سپی سەوڵ ڕشتەی ئیلاهی
|
نەرگس بۆی نەوخێز، گوڵ باغچەی شاهی
|
| چون جە سۆنگ من شیرین ئەرمەن
|
بێ شەرتی نەکەرد، بی جەلای وەتەن
|
| جە لای بزورگان کێشا بەدنامی
|
دوشمەن ئاوەردن پێش شادکامی
|
| تەرک تاج و تەخت پادشاهی کەرد
|
جە خوسرەوی وێش پەرێ من وەیەرد
|
| جە ڕەسم و ئاداب بزورگی دوورەن
|
کەسێ بە ئیخلاس یەند تۆش مەنزوورەن
|
| دەمێ جەند نەبی تۆ بە هامڕازش
|
غەمخواریش نەکەی، نەکێشی نازش
|
| ئیستیدعا ئێدەن سەوڵ بۆ عەنبەر
|
مدەرووت سەوگەند بە تاج قەیسەر
|
| جە ڕای مەرحەمەت شیرین بنوازی
|
چون شیر و شەکەر چەنیش بسازی
|
| سەوگەندم بە عەدڵ نەوشیروان پێش
|
بە ئەروای هورمز شای سکەندەر کێش
|
| ئەر بێ ڕەزای تۆ بکێشوون نازش
|
یا ببوون شەوێ من بە هامڕازش
|
| ئەگەر بکەروون تەماشاش یەک ڕۆ
|
تۆ نەدەی ڕوخسەت بە بێ ئەمر تۆ
|
| نە هەردوو دیدەم مەیل سەرد کێشان
|
چون تای زوڵفت بوو خاتر پەرێشان
|
| مەریەم ئێد شنەفت جە لەفز خوسرەو
|
ڕۆی ڕۆشن دەرلاد لێش گێڵا بە شەو
|
| وست نە پێشانی بە غەزەب شکەنج
|
پێچ وەرد وێنەی مار خلا نە ڕووی گەنج
|
| جە خۆف شیرین شاهزادەی ئەرمەن
|
کەرد بە لالەزار جە نەرگس سەمەن
|
| وات ئەرێ خوسرەو شای دارا ڕیکاب
|
لاڵ بەخش لاڵ پۆش نادیرەی نایاب
|
| تا کە چەندێ چەتر گەردوون وە پا بۆ
|
خورشید بەختت شوعلە نما بۆ
|
| مەعلوومەن جە لای کاففەی خاس و عام
|
بەتەر جە حەنزەل سۆزەندەی بەدنام
|
| تۆ بە بی شیرین دنیا لێت تاڵەن
|
بازاڕ شادی و عەیشت بەتاڵەن
|
| کەسێ چون شیرین زوڵف عەبیرین
|
ئەر بگنۆش نە دەم حەڵوای شیرینی
|
| دەردت لە گیانم وێت بەر بە قازی
|
ئەو بە سرکەی ترش کەی مبۆ ڕازی
|
| ڕاستش هەر ئێدەن شای فەڕڕوخ ئەختەر
|
سێ جار سەوگەندم بە تاج قەیسەر
|
| ئەر چەنی شیرین شۆخ مەی نۆشم
|
چون شیر و شەکەر بدەری جۆشم
|
| مکێش دەردسەر شای دارا شیەم
|
پووچەن ئیمتیزاج ئێمە و تۆ بە هەم
|
| شیرین موحیللەن سەد کەس ڕێختەن هوون
|
کەمتەر شاگردش سۆسەن جادوون
|
| هەرچەند شیرین شەکەرین ڕازەن
|
ماچان عەیاران هەم حوققە بازەن
|
| وەختێ ڕەزاشەن بوانۆ ئەفسوون
|
ماوەرۆ بە وار خورشید نە گەردوون
|
| بە وێم مزانوون شەهەنشای عادڵ
|
خوسرەو لال پۆش جە شاهان کامڵ
|
| شیرین شیرینەن بە شیرین ڕازی
|
بە هەر نەوعێوەن مدەرۆت بازی
|
| فرێ خۆفەن جە فیعل ئەو شووم
|
من جە وەسڵ تۆ بکەرۆ مەحرووم
|
| من ئەی عیلمەمە فراوان وەندەن
|
سەرمەشقم جەی باب جە ئوستاد سەندەن
|
| ئەکسەر جە زەنان شووم جادووکار
|
ماوەران بە مەکر عەتارید بە وار
|
| ئەر سەد زەن شۆخەن، عەنبەرین بارەن
|
بێ شەرت و شۆنەن، بێ ئیعتیبارەن
|
| دانا بزورگان پڕ هۆش قابڵ
|
کەی مبان جە مەکر زەن هەرگیز غافڵ
|
| چەند هەزار مەردان کار ئازموودە
|
بە پای دانایی جیهان پەیموودە
|
| هەرچەند کەردن ساعی جە دنیای دەربەست
|
مەر زەنێ بێ مەکر مگنۆش نە دەست
|
| یەکێ بە بێ مەکر بێ حیله و ستەم
|
هەر نەکەفت وە دەست، نەدیشان بە چەم
|
| سا شیرین یەکێ هەم جەو یارانەن
|
جەو پۆل پڕ مەکر جادووکارانەن
|
| چون شۆڵەی خورشید ڕەوشەن بیەن لێم
|
جە هام نشینیش بەد مەیۆ نە ڕێم
|
| ئەرێ فیدات بام شای سورەییا بەخت
|
نەوەردت حەی وەر سەد سەوگەند سەخت
|
| ئەر چون نەسیمی مکەنان پۆسم
|
هەرتا زیندەنان هەر تۆنی دۆسم
|
| ئیسە یە چێشەن شای هومایوون بەخت
|
زینەت بەخش موڵک پادشای و تەخت
|
| چەنی من کەمەن دەنگ و دەورانت
|
دایم شیرینەن ویرڕ زوبانت
|
| چون شا چەنی من سەوگەندێ وەردش
|
بەرشی بە خیلاف ئەو سەر نەبەردش
|
| موودەعاش ئێدەن پەی دڵ نەوازی
|
بەی حوققە بازی بدەرۆم بازی
|
| خوسرەو یە شەرت بۆ مۆ ئیمشەو جارێ
|
بکەری تەناف پای تەنیا دارێ
|
| وێم کەروو خەڵاس جەی گشت ئازارە
|
جەی گشت دەر سەر، جەی گشت پەژارە
|
| تا تۆ بە تەنیا بێ شەرت و بونیاد
|
بنیشی چەنی شیرینت بە شاد
|
| ئەر مبۆت خوسرەو من بە دەست وێم
|
نەکەروون جە داخ شیرین قەسد وێم
|
| با جا ساکن بۆ نەو قەسر وێدا
|
شایچ بە ڕاویار نەویەرۆ پێدا
|
| خوسرەو دیش مریەم بەی تەور نە جەنگەن
|
پەی هام نشینی شیرین بە تەنگەن
|
| یەقین حاسڵ کرد هەرگیز نە ڕوی دەور
|
نمایان بە هەم گورگ و شێر و بەور
|
| جە لای ئەو ڕۆمیی ئەستەمووڵ وەتەن
|
کۆتا کەرد حاجەت شیرین ئەرمەن
|
| بە چەرمی و نەرمی دیسان داش بازی
|
خاتر شادش کەرد بە دڵ نەوازی
|
| بە حەڵوای شیرین، بە شیرەی ئەفسوون
|
تاڵتیی شیرین بەرکەرد نە دەروون
|
| ئەمما شیرینیش هەر ڕۆ بە زەروور
|
وە پڵی تەخت شا مکیانا شاپوور
|
| ماوەردش پەیغام ئەو بە نیهانی
|
پەی شیرین جە لای ئەو شای کەیانی
|
| هەم بە نیهانی شاپوور هام دەرد
|
جەواب شیرین پەی خوسرەو مبەرد
|
| شیرین شەم شەوق شای فەرخوندە بەخت
|
عەجەب مەندەبێ جەی بازیچەی سەخت
|
| مواتش بە وێش مکەرد خەیاڵان
|
یە چۆنەن خوسرەو شای کەمەر لاڵان
|
| بەو گشت سۆزەوە کەفتەن بە هاڵێ
|
پەرێ خاتران کۆنە قڕتاڵێ
|
| چە چون من شۆحێ، شێوە شیرینێ
|
نوختەی خاڵ بۆ مشک، زوڵف عەنبەرینێ
|
| بێ گونا و تەقسیر ئیسە یە ڕاستەن
|
پۆسە پێش ئامان بێزاری واستەن
|
| بەڵێ نەزاناش جە دڵدا خوسرەو
|
بێ وەفا نیەن هەرگیز چەنی ئەو
|
| ئەر هەن، هەر سەڵاح شاهیش مەنزوورەن
|
پەی شاهان سەڵاح دەوڵەت دەستوورەن
|
| چون قیسەر چەنیش کەردە بێ خاسی
|
مەترسا جەی باب لێش ببۆ عاسی
|
