ظلمی آلقیشلایه‌مام
ظلمی آلقیشلایه‌مام، ظالمی اصلا سوه‌مم؛
گلنڭ كیفی ایچون گچمیشه قالقوب سوگه‌مم
بری أجدادمه صالدیردیمی، حتی، بوغارم
بوغامازسین كه
هیچ اولمازسه یانمدن قوغارم
اوچ بوچوق صویسزڭ آردنده زاغارلق یاپه‌مام؛
هله حق نامنه حقسزلغه ئولسه‌م طاپه‌مام
طوغدیغمدن بریدر عاشغم استقلاله
بڭا هیچ طاسمه‌لق ایتمش دگل آلتون لاله
یوموشاق باشلی ایسه‌م، كیم دیدی اویصال قویونم؟
كسیلیر، بلكه، فقط چكمه‌یه گلمز بویونم
قانایان بر یاره گوردم می یانار تا جگرم
اونی دندیرمك ایچون قامچی ییرم، چیفته ییرم
آدام آلدیرما ده گچ گیت، دییه‌مم، آلدیریرم
چیگنه‌رم، چیگنه‌نرم، حقی طوتار قالدیریرم
ظالمڭ خصمییم اما سوه‌رم مظلومی
ارتجاعڭ شو سزڭ لهجه‌ده معناسی بومی؟
محمد عاكف