| وەهار ئاخێز کەرد، و ەهار ئاخێز کەرد
|
سپای نەو وەهار وەخەیر ئاخێز کەرد
|
| وەفراوان شەتاو، هەردان لەبڕێز کەرد
|
سەوزەی دەشت و دەر قەناوێزبێز کەرد
|
| قەتاران، جۆق جۆق، باخانان بارکەرد
|
تەشریف و پایەی ئێڵاخان ئاوەرد
|
| فەرش خەزرایی وست نەرووی بێسات
|
نشت و بانێ تەخت دەست کەرد وە حوکمات
|
| فەرما جاڕچیان چون هەردە ساڵان
|
خەبەردار کەردەن سپای گۆڵاڵان
|
| بەتەعجیل و دەو حاکم فەرمان دا
|
ڕوو کەردەن وەکۆ، جاڕدان وە سەحرا
|
| واتەن مزگانی، دیسان شای وەهار
|
خەیمە وخیاوان هۆردان نەکۆسار
|
| تیپ ئارایی بەزم عەزم جەزمشەن
|
چەنی سپای تەم دەعواو ڕەزمشەن
|
| گوڵان ئیدئەژنین نەتۆی پەردەی خار
|
جۆق جۆق و تیپ تیپ چون تیپ خونکار
|
| خەیمە وخیاوان هۆردان نەسارا
|
بەسەد هەزار ڕەنگ چۆن سپای دارا
|
| شای وەهار چۆن دیش سپاش بی زیاد
|
بەنای رەزم جەنگ ئاوردەش و یاد
|
| دانە تیپ کۆس چون سپای یەمەن
|
ئاخێز کەرد وەجەنگ پەی دەفع دۆشمەن
|
| پەنا بەرد وەزات بارگەی شای نەجەف
|
بناڵە نەفیر «اضرب لا تخف»
|
| دانە تیپ تەم بارخانەی شاهی
|
زەمین جۆش ئاوەرد تا گاوو ماهی
|
| سپای تیپ تەم شکەست ئاوردن
|
جەدەستێ دۆشمەن نیم گیانێ بەردەن
|
| بەفەتح فەتتاح فەتح نامەش وەند
|
فەرما سەرداران رووکەن وەئەڵوەند
|
| کڵێڵان نەرووی کوان بەردەوە
|
بۆی عەتر و عەبیر هەرزان کەردەوە
|
| جەودەم شای وەهار بەوێنەی شاهان
|
تەڵەب کەرد یەکسەر سان سپاهان
|
| خەڵات پەخشان کەرد سەد هەزار وێنە
|
کۆل پارچەی قەدیم کار خەزێنە
|
| کاڵای ئەخزەری بەخشاوەئەشجار
|
بی وە زینەت بەخش پەی سپای وەهار
|
| جەودەم گوڵاڵان تەڵەب کەرد یەکسەر
|
سان دا سپاشان چون سپای قەیسەر
|
| ئەحمەری و بەنەفش، زیرەتی وقیلی
|
چێرەیی و زەرد ،عەننابی و نیلی
|
| گوڵ گەزی و گوڵ نار رەنگێ نەباتی
|
توول توول وڕاڕا، تەرح گۆجەراتی
|
| سفیدی و سفید ئەبیەزی و زەنگی
|
ئەسوەدی و زیری کارفەرەنگی
|
| عەرووسان دەستوور جە سەد هەزار ڕەنگ
|
خەڵات پەخشان کەرد جەدیبای فەرەنگ
|
| هەریەک ولێباس کارخانەی شایی
|
پۆشان وەبەدەن پەی خودنەمایی
|
| تیپ تیپ پی دەستوور جەلانساران
|
چون تەواف چ یان وەیس نازاران
|
| گاهێ نەقیام گا نە سجوودەن
|
گا نە شوکرانەی فەردی وەدوودەن
|
| فەسڵ کەسێوەن جە خەم بۆ بێزار
|
بێدار بۆجە شەوق کارخانەی وەهار
|
| کەمەر بوینۆ هەر سۆب تاوەشام
|
بێ خەوف بگێڵۆ مەقام بە مەقام
|
| بێ دەستوور چەنی هامسەران وێش
|
بکەرۆ سەیران بێ خەوف و ئەندێش
|
| گا کەرۆ وەزەید سایەی وەرکاوان
|
گۆش دەرۆ وەدەنگ ناڵەی شەتاوان
|
| گا مەست مەدهۆش، عاشقانە وار
|
بکەرۆ سەیران دیارو وەدیار
|
| پەی کەسێ وەشەن ئەی وەهارێ نۆ
|
خەمی کۆنەو نۆ وەباد بدەرۆ
|
| یە «ئەحمەد» واتەن هێجرانی بارەن
|
بێزار جە سەیران گەشتی وەهارەن
|
