| چوون کۆی عەوداڵان، چوون کۆی عەوداڵان
|
کۆن؟ کۆیێ دڵگیر، چوون کۆی عەوداڵان؟!
|
| کابەی مەقسوودەن، پەرێ نەوهاڵان
|
پەی وایەی موراد وەنەش مەلاڵان
|
| کۆی بەرزی بوڵەند، چمان کۆی قافەن
|
بە بەرزی بەرزەن، بە سافی سافەن
|
| سەر کێشان نە ئەوج چەرخی چەهبەری
|
بۆش نیان نەبۆی «زوهرە»و «موشتەری»
|
| جای شەو بیداران، سەحەر لاڵانەن
|
تەکیەگای خاسان، «هەفت ئەوداڵانەن»
|
| هەر هەفت عەوداڵان، قوتبی ڕووی زەمین
|
چوون «اَصحابُ الكَهف» دایم غارنشین
|
| مەسکەنشا گرتەن بەو بوڵەند کۆوە
|
«يا مَن هو» شانەن هەر ڕۆ جە نۆوە
|
| تا دونیا وە پشت ماهیش قەرار بۆ
|
ڕوتبەشان بوڵەند، هیممەتشان یار بۆ
|
| هانە پای ئەو کۆ ڕەندان، چوون پەری
|
گشت ئامادەی حوسن شۆخی و دوڵبەری
|
| نەک جە خەم نیشۆ نە دڵشان خارێ
|
کەردەنشان دەستوور، هەر هەفتێو جارێ
|
| وەختی شاخەی «سوبح»، ئەو گرۆی ڕەندان
|
کۆی کڵاف نە دۆش موشکین کەمەندان
|
| مەخێزان بە عەزم بارگەی «عەوداڵان»
|
مەدان جە نەووە، تەرتیبی خاڵان
|
| چوون «ئاهوی خوتەن»، ڕەوێڵەی تەتار
|
پۆل پۆل نازداران مەبینان قەتار
|
| بە ڕەفت و هەموار، بە ڕێزە ڕێزان
|
مەشان بەو کۆوە، بە موراد وازان
|
| وەختێ و پا مەنیان وە باڵای کەمەر
|
نە خاکی پاشان گوڵان مەنیان سەر
|
| ئەشەدبۆی «طفیل» سەر نە ڕاشانەن
|
«چنوور» ئامێتەی خاک پاشانەن
|
| «ياللَّة» قاپی خەیر تۆ کەری گوشاد
|
یاوان بە «مەقسوود»، بدەیشان موراد
|
| یا «هەفت عەوداڵان»، کۆی بەرزو بوڵەند
|
دیدەی بەد، پێشان نەیاونۆ گەزەند
|
| عەوداڵانی بەرز، بەرز بۆ پایەشان
|
هیممەت یار کەرە، حە ق دۆ وایەشان
|
| دایم بەی دەستوور خاتر شاد کەران
|
بەڵکم وەختی سەیر، ئێمەیچ یاد کەران
|
| سەیدی تاسەی سەخت، دووری یارشەن
|
نە ئارام، نە سەبر، نە قەرارشەن
|
| یا عەوداڵ سەیدی هاوار وە تۆشەن
|
دیدەش بە دیدار یار، کەری ڕەوشەن
|
