ہو کیوں نہ ترے کام میں حیران تماشا
ہو کیوں نہ ترے کام میں حیران تماشا
یارب تری قدرت میں ہے ہر آن تماشا
لے عرش سے تا فرش نئے رنگ نئے ڈھنگ
ہر شکل عجائب ہے ہر اک شان تماشا
افلاک پہ تاروں کی جھلکتی ہے طلسمات
اور روئے زمیں پر گل و ریحان تماشا
جنات پری دیو ملک حور بھی نادر
انسان عجوبہ ہے تو حیوان تماشا
جب حسن کے جاتی ہے مرقع پہ نظر آہ
کیا کیا نظر آتا ہے ہر اک آن تماشا
چوٹی کی گندھاوٹ کہیں دکھلاتی ہے لہریں
رکھتی ہے کہیں زلف پریشان تماشا
گر عشق کے کوچے میں گزر کیجے تو واں بھی
ہر وقت نئی سیر ہے ہر آن تماشا
منہ زرد بدن خشک جگر چاک المناک
غل شور تپش نالہ و افغان تماشا
ہم پست نگاہوں کی نظر میں تو نظیرؔ آہ
سب ارض و سما کی ہے گلستان تماشا
|
This work was published before January 1, 1929, and is in the public domain worldwide because the author died at least 100 years ago. |