ათე ბაღანა ნაჟამა რე
ათე ბაღანა ნაჟამა რე,
ოჭმარეში რენო, ონდღეში რენო,
ონჯუაში რენო
თუთაშხაში რენო,
თახაშხაში რენო,
ჯუმაშხაში რენო,
ცაშხაში რენო,
ობიშხაში რენო,
შურიშხაში რენო,
ჟაშხაში რენო,
ედგინაში რენო,
დოხუნაში რენო,
მიკორთაში რენო,
მუკორთაში რენო,
ჩქიმ ბაღანას დეთხი დო
შხვაშ ბაღანაშა მეუ...
ათეწკჷმა ხეს აშუძუნა ტუტა, კარიშე მიკირთუნა დუდითჷ დო, დუდჷშე გეგნირღვანა უკახალე. ტუტაშ დჷნასქილიდიქ კარს ქიმკოსქიდჷდა, ბაღანას თის მაჟია დო მასუმაშა გუმაჟირანა ათეჯგუა რაგადის დო ტუტაშ გინორღვაფას.