ამბეფი:გურიმოჭვე მუმა
ართი დღას, იესო ბრელი ოგაფურიშ მაზირალეფც დო ცოდამეფც ოგურუანდჷ, ნამუეფუთ მუწკჷმა რდესჷნ.
რელიგიური დუდკოჩეფი ღანძგალანდეს, თიშენ ნამდა იესო თე კათას მუში მაჸალეეფშორო ართუუდჷ. თაშინ, იესოქ ქიჩუ ათე ამბე:
„რდჷ ართი კოჩი, მისჷთ ჟირი ქომოლსქუა ჸუნდჷნ. უკულაშიქ მუამუშის უწუ: „მუაჩქიმი, ქომუჩი ასე მა ჩქიმი თია! “თაშინ, გედირთჷ მუმაქ დო გოურთჷ სქუალეფც მუში ღმალა.
„უკულაში ბოშიქ ირფელი მალას გეგმოჩჷ მუთ ქოუღუდჷნ დო მიდართჷ შორი ქიანაშა, სოდეთ მიორღვჷ მუში არძო ფარა, მუში წაულირი რინათ.
თე ბორჯის, კონწარ შქჷრენაქ ქჷმორთჷ თი დიხაშა დო თის მუთუნი ფარა ვაუღჷდ ოჭკომალიშ ოჸიდეთ. მიდართჷ დო ღეჯეფიშ მადიარაფალო ქჷგედირთჷ. თიშნერი დაჩიჩიებული დო შქჷრენული რდჷ, ნამდა ღეჯეფიშ ოჭკომალიშ ჭკომუა ხოლო ულამუდჷ.
„უკული უწუ მუში დუც უკულაში ბოშიქ: „მუს ვორთუქ? მუაჩქიმიშ არძო მოინალეს ოჭკუმალი მირყას უღუ დო მა თავრე შქჷრენც ქობღურუქ. დიბრთუქ მუაჩქიმშა დო ქობთხინქ ართ-ართი მუში მოინალეთ გებჭოფასჷნ.“
„სოიშახ უკულაში ბოში მულირი ვარდჷნ, მუმაქ ქოძირჷ დო ეცოდჷ თიქ. ქიმირულჷ მუში სქუაშა დო ქახუტოლჷ დო გოჯუნჷ თინა.
სქუაქ თქუ: „მუაჩქიმი, მეფჩირთ მა ღორონთიში მეხჷ დო სქანი წოხოლე. მა ვაორექ სქანი სქუალობაშ ოჭარაფალი, ქუდმორინე სქანი მოინალეთ."
„მარა მუამუშიქ უწუ მუში ართ-ართი მოინალეს, „მეუ, ქინჭე! ქჷმიღი არძაშე უჯგუში მუკაქუნალი დო ქჷმუკაქუნი ჩქიმი ბოშის! ქჷმააგი მარწკინდი კითის დო ქჷმაადვი კუჩხის მადვალარი. უკული დოჸვილი მეგვანაფილი გინი დო იჸუას დიარაქ, რახან ჩქიმი სქუა ღურელი რდჷ, მარა ასე გეთელჷ თიქ. დინაფილი რდჷ, მარა ქიძირჷ ასე!“ დო გორჩქინდჷ დიარაქ.
„ჭე ხანიშა, უნჩაში ბოშიქ ხოლო ქჷმორთჷ ჸუდეშა. ქელარჩქილჷ ბირა-სხაპუა დო ლაჸაფიშ ხონარქ დო ვაგოხვადჷ მუ ხვადუდჷნ. მუჟამც ქუწის, ნამდა მუში ჯიმაშ ჸუდეშა დორთაშენი რდჷ დიარან, გეჸალჷ დო ვამიკორინუ ჸუდეშა მინულა
„გჷმილჷ მუამუშიქ გალე დო ოზნახჷდ სქუას ქოკათაფუდუკო დიარას, მარა ივარჷ იქ დო თქუ:
„თესხი წანას მა სქანო ბხანდენდი! მა ირო დორჸუნდი სი, მარა სი იშენით, აკა ქაცარი ხოლო ვამოიჩამ ჩქიმდა დღას, ჩქიმი მაჸალეეფწკჷმა ართო მიჭკომუდუკო დო მიშუმუდუკონი. მარა მუჟამც თე სქუაქ მიორღვჷ სქანი არძა ფარა მუში წაულირი რინათჷნ, სი თიშო არძაშე უჯგუში გინი დოჸვილი!“
„მუმაქ უგამჷ: „სქუა, სი ირო ჩქიმწკჷმა რექ დო მუთ ქომიღუნ ირფელი სქანი რე. მარა ჩქი თაშ ოკო ბღოლითკონ ასე, თიშენ ნამდა სქანი ჯიმა ღურელი რდჷ, მარა ასე თელი რე. დინაფილი რდჷ, მარა ასე ქიძირჷ თიქ!“