ამბეფი:წყარალა

ბრელი წანაში უკული, ბრელი კათა ოხორანდჷ ქიანას. თინეფქ ძალამი შურუბადოთ დო შურწიკვილო გჷნირთეს. თიშნერო გილელეს თინეფქ, ნამდა ღორონთქ გჷნოჭყვიდჷ თინეფიშ მოსირუა დო ქიანაშა წყარალაშ მუშაშქუმალა.

ღორონთქ აკა კაკალია ბონკოჩი მიშახვილუ თე წიკვილჲ კათეფც შქას. თიში ჯოხო რდჷ ნოე. ღორონთქ უწუ ნოეს წყარალაშენ, მუდგაშ მიშაშქუმალათ ულამუდ მუს დო უზოჯჷ თის, გეუგაფუდუკო ქვერსემი ხვამარდი, მუსჷთ უძახჷდეს კიდჷბანც.

ღორონთქ უწუ ნოეს, გეუგაფუდუკო კიდჷბანი, ნამუთ იჸუაფუდ 140 მეტრა სიგჷრძაშ, 23 მეტრა სიგანაშ დო 13.5 მეტრა სიმაღალაშ. თინა ოკო ჸოფედუკო გიშაჸონაფილი ჯაშე, ოკო ნოღვედუკო სუმი სართული, ბრელი თოლი, აკა ორთვალი დო ოსინთე. კიდჷბანი დოთხილანდჷ ნოეს, მუში ფანიას დო ნოტყეფც წყარალაბორჯის.

ნოექ ქუდაჸუნჷ მუში მაზოჯალც. მუქ დო მუში სუმი სქუაქ გეიოგეს ხვამარდი თეშ, მუჭოთ ღორონთქ უზოჯჷ თინეფცჷნ. ხვამარდიშ ეკიდუაქ ბრელი წანეფი ქჷმიკორინუ, თიშენ ნამდა თინა თიცალი ქვერსემი რდჷ.

თინეფქ აკოშაყარეს ოჭკომალეფი დო ნოტყეფი მუნეფიშ ოჭკომალო, მუჟამც თინეფი ხვამარდის იჸუაფუდესჷნ.

მუჟამც ირფელი ხაზირელი რდჷნ, ღორონთქ უწუ ნოეს, ნამდა ბორჯი რდჷ მუში, მუში ჩილიშ, მუში სქუალეფიშ დო მუნეფიშ ჩილეფიშ ხვამარდიშა ეშუალაში - არძო ართო ბრუო კოჩი რდჷ. ღორონთქ ნოეშა ქაჯღონჷ არძო მუმული დო დადული ირი ნოტყიშ დო მაფურინჯეშ, თიშო ნამდა უკული ნოეწკჷმა გეშურთუმუდესკონ ხვამარდიშა დო გინოსქილადედესკონ წყარალაბორჯის. მუჟამც თინეფქ არძაქ მინილეს ხვამარდიშან, ღორონთქ მუშ ხეთ დოკილუ კარი.

უკული, ქჷდიჭყჷ ჭვემაქ, ჭვემაქ დო ჭვემაქ. ჟარნეჩი დღაში დო სერიშ დინახალე უგუჩემებუო ჭვენდჷ ირიათო! წყარი ქურჩინით ეშმეშჷ დიხაუჩაშე ხოლო. ირფელი, ედომუშამი ქიანას წყარით რდჷ ფორილი დო თინეფწკჷმა ართო, არძოშ უმაღალაში გვალეფით.

დო ირფელქ, მუთ დიხაუჩაშ ჟინოხის გილეშჷნ, დოღურჷ, თი კათეფიშ დო ნოტყეფიშ მოხჷ, ნამუეფუთ ხვამარდის მილახედესჷნ.

მუჟამც ჭვემეფქ მეჭყორდჷნ, ქიანაშ ხანი ქჷმიკორინუ წყარქ კჷნე გიმე დაკინალო.

შქვით თუთას წყარც მუნიფაფჷდ ხვამარდი დო ართი დღას, ხვამარდიქ ხოლო ქჷგისვანჯჷ ართი გვალაშ კონკას. მარა ქიანა კჷნე წყარით რდჷ ფორილი. ხოლო სუმი თუთაშ უკული, გვალეფიშ კონკეფი ირწყებედჷ.

ჟარნეჩი დღაშ უკული, ნოექ გოუტუ მაფურინჯე, ნამუსუთ უძახჷდეს ყვარანც, თიშ ოგინაფალო, ქორდჷ დო ვარი წყარი სქჷრაფილინ. ყვარანი წოხოლე დო უკახალე გილაფურინდჷ დო მეგორუნდჷ სქჷრე დიხას, მარა ვემიაგორუ იშენით მუთუნი სქჷრე დიხაშა.

ჭე ხანიშ უკული, ნოექ გოუტუ მაფურინჯე, ნამუსჷთ უძახჷდეს ტორონჯისჷნ, მარა ვართ თის მიაგორუ მუთუნი სქჷრე დიხაშა, თაშ ნამდა თიქჷთ დართჷ ნოეს.

ართი მარაშ უკული, თიქ კჷნე გოუტუ ტორონჯი, ნამუქუთ დირთჷ დო ზეითინიშ ჯაშ ჸა ქჷმიჯუმუ! წყარი ირკენდ!

ნოექ ხოლო ართი მარა ქჷმიცადჷ დო გოუტუ ტორონჯი მასუმაშა. ე შვანც, იქ ვადირთჷ უკახალე. წყარი გესქჷრაფე!

ჟირი თუთაშ უკული, ღორონთქ უწუ ნოეს, ნამდა ბორჯი რდჷ კარიშ გონჯამაშ დო ხვამარდიშ დოტებაში მუში ფანია დო ნოტყეფწკჷმა ართო. ნოექ ქჷდაჸუნჷ.

მუჟამც თიქ ხვამარდიშე გჷმელჷნ, ნოექ გეიოგჷ ოჸვილუ დო ქჷმიარზუ მუში გეჸვილირი ღორონც.

ღორონთი ბედინერი რდჷ გეჸვილირიშ მორზიათ დო თიქ ქჷდოდვჷ პიჯალა, ნამდა თინა დღას ვამაშქვანდჷ წყარალას კათაშ მასირალო.

ღორონთქ გამკაძირუ პირველი ცაშ ორტყაფუ მუში პიჯალაშ შანო. ირო, მუჟამც ცაშ ორტყაფუ რდჷ ცასჷნ, ღორონც ქჷგაშინედ მუში დუნადველი პიჯალა დო თაშნე იჸუაფუდ მუში კათა ხოლო.