აფხაზეთშე გიშარაჸილ ხალხის
დიო სერ რე, მინმორენა
ცა-თოლ ილაღალირო,
ვათანდასჷნ, ვაშილებე,
თქვანი გოლუაფირო!
მუჟამ დარდი, მუჟამ ჭუა
თქვან სქვამ თოლეფს ბძირი მა!
ჩილამურ მის აკოროცხე,
თქვან თოლეფიშ ჭირიმა!
მარა მითინს ვაუძირჷთ
იმენდ გონქირაფილო,
გაჭირებას ქუგუურზით,
თქვანი გულუაფირო!
შურს ცხაბარელს აფუნი დო
მარტიშ თუთაშ თილისმა,
უღურალეთ გაკომირდნა,
თქვანი შურიშ ჭირიმა!
დღა ქჷმოურს, კარს ქჷმადირთ
მეალილეშ ალილო!
ილორიშ კარს პირჯვარს დიბწერთ,
თქვანი გოლუაფირო!