გვალაშ ოჭმარე
გელეოჭმარუ, გელაღაფუ ჩხანაქ ელახი
ხოჯიშ ზისხირიშფერო, ფართას გელაკარკაცუ…
ეკურკუციას გევორექ დო ასე მელახო,
ტაბაკშა გემიდგჷ საკაკალო – ცუნდიშ ხაციცი.
მოჭყუდ-ჩხორია ივარვალუ, გუმაფიორუ
მუკი-მუკი დო ნასქანჩა გურს დინმალამურუ.
თე ცოდებ გურსჷთ გამკუღალუ გუგა პიორი,
ბჟაქ გელამჯუნუ ათე თოლეფ – ნაჩილამურუ.
მიფუნს ზისხირი რსხულიშ ინოხ, წირდე მაჭარო,
ზენშა ვა მილამჷ დორთა, ათაქ მუკმოფსიქიდუქუ.
ოჭმარეშ მარდი გვალაშ ვიშო სოთა მაჭარუ,
გვალაშ გოლვაფრო, მა თიშ კონკას ქუმკობწირდუქუ!