დაჭყაფუ (გინმათანგალი აბელ ფეტელავა)

1. ნამქუთ დარსხუ ოდაბადე ნძალით აპაპარათუნი,
თიში სამონძურო შურით ჟიდე მუნანბარათუნი,
ჩქი, კათასუ, მუჩეს რინა ანდა ჸვაში ჭარათუნი,
თინაშე რე ირი ხენცფე, სახე-ნასაქვარათუნი.

2. ღორონთ, სი რექ გიმარჩქინე, თე ქიანაშ მასარკალი,
სი დობთხილე, სი გომჭყვიდი ჩქიმ მონე დო მაზაკვალი,
ნდომა ვორდა ჸოროფილიშ, ღურა დღაშა მაცქვაფალი,
ცოდას მირსხი, სო მანტინე, სკანი მანგო ვორექ მალი.

3. მის ასკვანს ჯილოშ სიკურცხე, საგან-ფორიში ხვარება,
მაფა-ბჟა-თამარ-ღვა-თუთა, თუმა შიბუაშ-ხვარება,
ცქუმალა მუთი ბშკიდუა, მოტყუ სიტყვეფიშ დალება,
მუში მაკინეს ეჰამას, არძას უწუას ალება.

4. თიშ ცქუმალა მიზოჯეს დო თენა მიშ გურს ვამკორდუნსუ,
თოლ დო წარი ხეშ ნახანტა, თუმა ვარყას დობორკუნსუ,
ჩე კიბირი რაწკა-რაწკა, დოწკაპილო ელაჸუნსუ,
ლიბუ ტყვიაშ ქულამური ქუას ხოლო გოტახუნსუ.

5. თამარ დედუფალს ვოცქვანდე, ჩილამურ მიშას ზისხირო,
არძაშე გიშაგორილო დუს გუთმულუა თის ირო,
ლარჭემო მაფუ ნახანტა, ვართ ხოლო ხანწკა ისირო,
მიქით ძირასინ გილართას თიშე თოლ ელაფირსირო.

6. ანწ ნინა მოკო კვათირი, თე ანბეს გურით ქობშინა,
ნძალი მუჩი დო მოხვარა, სკანდე მიღ მებჩე გოშინა,
თეთ შევენწუათ ტარიელს, თის ჰამოთ ოკო მოშინა,
ეთი სუმხოლო გერგენჯიშ ანბეს თაქ ქუმუოშინა.

7. ხომ ქარწყექ ტარიელშენი ირკოს ჩილამურ მანტებუ,
თიცალი სკუა მენდული ართ დიდას ვადაბადებუ,
თენას რუსთველი დობლერსა, ჟითუო შურიშ მატებუ,
აიშახ ანბეთ ნაგამა, ანწ მარგალიტო გამთებუ.

8. მა რუსთველი სიხანგეშე ეგებ სიტყვას ქიმკიბხაკე,
ვართი მიჩქუ მუთ გინობჩა სკან სისკვამაშ სიფარსაკე,
ღურელ ვორექ სკან განიშე, ჩქიმ წამალი კოს ვაკაკე,
ვარდა მუჩი მა სკილადა, ვარდა დიხას დობსაბაკე.

9. ათე ანბე რე სპარსული, ქორთულო მაფუ ნაკვალა,
მოთ მარგალიტი ომბოლი ხედოხეთ გილნაქვაქვალა,
ბძირი დო ლერსო ქობშინე, სარკო ბქიმინი მა გვალა,
ეგებ ჩქიმ თუთას მოწონდას, თიშ გურშენ გილაბკვაკვალა.

10. მუჭო შურიშა მისხუნუ თიში თოლეფიშ ძირაფა,
მა თიშ განიშე ვამორკუ ხანდა დო გილარგილაფა,
სერიშ ტახუა მოვჩამუ, ფერი დო ხორციშ დინაფა,
მეჸუნა ოკო ჸოროფას, ვართ ხოლო ხუჯიშ რთინაფა.

11. მისით ბედიქ მუთ მეჩასინ, გეჯერდას დო გურ ენდასი,
იხანდილას მოხანდექ დო მაჩხუპერი გურენდასი,
ჸოროფილი უჸორდას დო თიშ ძირაფა ჸუმენდასი,
მუში ირო წანდასი დო შხვასით ვაუწონენდასი.

12. შაირუა მუ რჩქინა რენ თეს მეხვადუ კოჩი ირი,
საღორონთოთ ალგასიმე, თეში მორგე მუთა ბძირი,
თენა ირკოს ეჰამებუ კოჩ ვარედა დოლაფირი,
გინძე კუნტათ გარაგადე, შაირი რე თეშენ ჯგირი.

13. მუჭოთ ცხენსი შარა გინძე დო რულაფა ამორსენსი,
მაბურთესუ – მოედანი, ვარჩქუ მუჭოთ ათურქენსი,
თეშ მოლერსე გიმორჩქინდუ, ნამუთ ხეთე ვაგათენსი,
ლერსიქ ვეშელუასი დო თქუას მუსით შხვათ გუგენსი.

14. ვარდა ათეცალს მუს ორგუ მუდგა ურთე დო ეფენჯი,
ვართ არაგადე ქორთულო მუში სარკო დო მეჸვენჯი,
ვადაკუნტარას ქორთული, თეშ ორდას ნინა-მეკენჯი,
მორძგვას ირქენდას ჩოგანს დო იბურჯონუდას გერგენჯი.

15. მოშაირე თის ვაჯოხო, კუნტათ რაგად მისით შხონდუ,
ჯგირ მოლერსეს ომანგუ დო მუში დუსუ ტყურათ ონდუ,
ამარ-ემერ ნარაგადა დღას ვარგებე, ვადუმონდუ,
იშენთ „ჩქიმი უჯგუნია“ იმპუცალო გოჯიკონდუ.

16. მაჟირა ხოლო თეცალეფ ორენა – მუ ქიმინანი,
ვეშულებუნა ლერსალა, ვარდა შხვას მიოჯინანი,
მოტყაბალეფი მაშინე აკაბუცხა დო მინანი,
დემ ტყაბი ვაჸვილენა დო ჭიჭელეფს გილაჸვილნანი.

17. მასუმა რენ ძამი რე დო თეშით არძას უჯგუ ბრელო,
ობირალო გიმგარინე, ძღაბიშ ოარშიყებელო,
გინძე-გინძეთ ვათქუალუ, გურიშ გამარგუებელო,
მოშაირე თის ვაჯოხო, იტყუ უგინძორებელო.

18. ანწ მოლერსექ ოკო ირგას გაჭირებაშ ფულუასუ,
ართი ჸუნდას საჸოროფო, ეთის დუდი გულუასუ,
იფრელ თიშოთ მიორჩქუდას, ოცქვანდას დო ულუასუ,
თიშ მეტ მითინ ვაკოდას დო ირო უღურჭულუასუ.

19. თის ვოცქვა, მიშათ მიცქვაფუ, ვართ ხოლო აშაბჩილათუ,
თენა მიმორჩქუ სახელო, ბხარენდე თიშ მოშინათუ,
თინა რე ჩქიმი თოლსინთე, უგუნუჩამუ ნინათუ,
თიში სახელი, ფულირო თუდოლე მუგოშინათუ...

20. ჸოროფა ოკო გიწუე ქანაშ რე მათანაფალი,
ურაგადუ დო უძირაფ, ნინაშე უდუცქვაფალი,
თინა რე გურიშ ხიოლი დო სუაშ მაჩანაფალი,
ირკალაშ მორგე-მოხვარე, შინაში მაჭყვადაფალი...

21. თეცალ ჸოროფას ვართ მეხვად, შურო მით ქორე ხაკონი,
ნინა დოშურდუ, თის ხოლო არჩქვენუ უწი სარკონი,
ათე ნახელე, ვართ უჩქუ, ორე ირკოჩიშ სარგონი,
ათეს აჯინას, მის შურო, ნანდულ ჸოროფა ქაკონი.

22. „მიჯნური“ ჸალაშ მანგი რე არაბეფიში ნინაშა,
მუ ოჭენ ვეშერს, იხანგებ, გური ვაჩინე თინაშა,
ნამთინეს შური მიალე მუშ ვარდიშ გინოჯინაშა,
ნამთინე შორშე იხალუ, ღურა უსხუნუ რინაშა.

23. ჸოროფაშ ღირსო თინა რე, მით ცა დო დიხას ორგუნი,
მით ჭკვერი რე დო ეფშა რე, მით ბჟა დო თუთას ქოგუნი,
მიქ მუღუ ნტერეფს მორია, ხე დო კუჩხ ეკუბორკუნი,
ჸოროფილ ვარე ართ კაკალ, მისით თენეფი ორკუნი.

24. ჸოროფა რე გურიშ კვათა, ხანო კოჩიშ მაჩალარი,
კახმალუა ვაგიჩქუდას, თაქ ვართი რე მაღალარი,
ინა შხვა რე, კახმა შხვა რე, ხურგო ზღვა რე გადვალარი,
ვავწყორუათ ართიანსი, რშუდან ჩქიმი ნათქუარი.

25. უწუნდური დო ძუკან რე, მით ათეშ ღირსო ვაპინი,
ჸოროფილს ვასკვანს სიქექე, ოსოგდე გილასხაპინი,
მუჟამს ვარწყენან, უძინან ჩილამურიში ჩხაპინი,
ბჯოგუ უგურე ჸოროფა, ხუტოლი, ჯუნა-ჭკვაპინი.

26. ბრელი ორე ათეცალი – მუს თქუანა ათეშ მოხო, –
გილერულე, ვეგმეჯერდუ ართის, ჟირს დო სუმიშ დოხო,
ართი ჸუნსუნ, ჭუმ შხვა ოკო ღვაჭვიჭვალი, სკვამი, ჩოხო,
ათეჯგუა ჸოროფაშა მა ჸოროფა ვამიჯოხო.

27. ჸოროფილქი ჭირი ფულას, ირგასი დო ვარდას ფოლო,
გურზასი დო გინიღასი – დღა გიორდას მუდგა კოლო,
შორშე ღურას, შორშე სკიდას, ვამაძირას მითინს თოლო,
ვანდურინე ჸოროფაშა, – ონგარუანს მაფას ხოლო.

28. მუში ნჯარი შინახას დო ოკო ვეგლაკიჟინასი,
ირო „ვავა“ ვაღვარუას, წოხოლეშე იჯინასი,
გურს ჸოროფა ალაძუნი შხვაქ მუთ ოკო იჩინასი,
თიშოთ დოფა მინტუას დო ჭირი რხინო მირჩქინასი.

29. მით წოხოლე უჸორდუნი თიშოთ დუდი გინოდვასი,
ვაშკურინას, თიშ გურშენი ქირქესი დო გელას ზღვასი,
თიშენ გოლას მინდორონი, თიშ საჸალე ვეკიშკვასი,
ოკონ გვალო ღურასი დო ჸვაშიჭარაქ ეკაჭვასი.

30. ნამუ ჭკვერი აკათხოზუ, მით ჸოროფას გოჩანსინი?
მუში დუსუ ენასი დო შხვას ონჯღორე ქოჩასინი,
გიმორჩქინაშ მანგიორო უდაჩხირეთ დოჭვასინი,
მუ იჸუაფ კოჩქ მოჯგირე ნჯარით ვაგაბორჯასინი.

31. ძამს ქომიკვე კანკალესი მუთ აძირე ჯგირო ფური,
მით ვაკონი მუთ ვარცხუ დო მუთ აბორჯენს უბედური,
ვაუჸორსუნ მუშენ ვაჯოგ, ნაქურელი თიში ქური,
კონწარ კოსუ კონწარ სიტყვა ირო აფუ შურ დო გური.

32. მუჟამსით კოჩი ჸოროფათ დუს მიკმატახანს კირდასი,
უჯგუ, ხვალახე ორდას დო ტყაშე მინდორო ირტასი,
თინა გიშინას, ინარღას მუდგა ვარ ვემეჭირდასი,
შხვაშე დოფულას მუშ ნარღი, ჸოროფაქ ვეგმურჩქინდასი.