დიდი დიქტატორი
ქომიალით, მარა მა ვა მოკო იმპერატორობა – ენა ვა რე ჩქიმი საქვარი. ვა მოკო მითინს ბდუდენდე ვარა ნძალათ იბკინენდენ. მოკო არძას მივეხვარე, მიშათ შემილებუნ – ებრაელს, წიმორთის, უჩატყებამს, ჩეს. ჩქი არძოქ ართიანს ოკო მივეხვარათ, ადამიერეფი ათენერეფი ვორეთ. ჩქი ართიანიშ ხიოლით ოკო დობდირთათ დო ვართ ხოლო უბედურობათ. ვა ბჯოგუდან დო ვა მოწკიწკუდან ოკო ართიანი. ათე ოქიანუს არძაშო დიგორუ არდგილი, დიხაუჩა ღვალიერი რე დო არძას დომინტირინუანა.
რინაშ ზა დუდიშული დო სქვამი ოკო ორდას, მარა ჩქი მივოჸოთით თე შარა. ჰარამობაქ დოწამალუ ადამიერეფიშ შურეფი, თელ ქიანაქ ჯოგინშე გიხიბჷ. ჩქი გუვავითარით სინჭაფიე, მარა თის ქენიფხვილით. მანქანეფქ შარა გომინწყეს ღვალაშ შიბაშა, რჩქინაქ ცინიკურეფო გინმოშქვეს დო გაღიერობაქ – კონწარო დო უბადო შურიშეფო. ჩქი ფირფქენთ ძალამო ბრელს დო ბგინაფულენთ ძალამო ჭიჭეს. მანქანეფშე უმოსო ჩქი ადამიერობას ვოხვილუთ, გაღიერობაშე უმოსო – ჯგირიშ ქიმინუას დო რდილუანობას. ათენეფიშ უმშო შურდგუმა კონწარი იჸუაფჷ დო ირფელს მივოდინუანთ. ფურინჯიქ დო რადიოქ უმოსო დუმახოლეს ართიანწკუმა. ათენერი გიმოგონუეფი ჩქინ დუდიშ ინოხ ჯგირს ოკურცხინუანს, მიძახუნა ოირკოჩე ჯიმალობაშა, არძაქ ართო აკიფშქავთინ თიშა. ათე მომენტის ჩქიმი ხონარი მილიონობათ ადამიერს ონჭჷ ედომუშამ მოსოფელს, მილიონობათ რწუმადინაფილ ქომოლკოჩის, ოსურს დო ჭიჭე ბაღანას, ათე სისტემაშ სხვერპლეფს, ნამუთ აწამენს დო ჭოფუნს უდჷნოშურე კათასინ.
მიდგასით ჩქიმი არჩქილენ, ვურაგადუქ: “იმენდი ვა მიოჸოთათ“. ასე ჩქინ დუდს უბედურობა ირთანს, მუთ თი ადამიერეფიშ ურძღაფუობაშ და კონწარალაშ გეშა რე, ნამუნეფით ადამიერულ პროგრესიშ შარას უთხილანან. ადამიერეფიშ ჯოგინი მიკილენს დო დიქტატორეფი დოღურუნა. თი ნძალაშულობა, ნამუსუთ კათაშე ეთმოჭოფუნან, კინე კათას დართუ დო სონდარო ადამიერეფი ქოსქიდუდან იჸუაფჷ თე ცაშ თუდონ, დუდიშალა დღას ვა დინუ.
ვო ჯარიშკოჩეფი – ვაშუჸოთათ თქვან დუდი უშურგურე ადამიერეფს, თინეფს, ნამნეფსით ჯოგუნა, ნამნეფით რდარუნა თქვა, ნამნეფით დუდენა თქვან თელარას, გირაგადუნა, მუ ოკო ქიმინათ, მუ იფირქათ დო მუ იგინათინ თის. ნამნეფით რწვართუნა დო გოდიარუანა, ნამნეფით ორინჯეფცალო გორყუნა, გირინუანა ჯუაზერიშ ხორცო. ვენოლათ ათე ოშკურანჯი კათაშ ხეს, მანქანა-ადამიერეფიშ ხეს, ნამუნეფსით მანქანაშ ტვინი დო მანქანაშ გური უღუნან! თქვა ვა რეთ მანქანეფი! თქვა ვა რეთ ორინჯი! თქვა ადამიერფი რეთ! თქვა თქვან გურს ადამიერეფიშ მეხჷ ჸოროფა გიღუნა. თქვა ვა რჯოგუნა. ჯოგინი თინეფს უღუნა, ნამნეფსით მითინ ვა უჸორან.
ვო ჯარიშკოჩეფი – ველიმათ კათაშ დაჭკორებელო! ილიმით დუდიშალაშო! წიმინდე ლუკაშ სახარებაშ მა-17 დუდს ჭარჷ, “ღორონთიშ სასეფო კინი თქვან დუდს რე“. ართ ადამიერიშ, ადამიერეფიშ ბუნაშ ვარინ, არძოშ, თქვან დუდს. თქვა გიღუნა ნძალაშულობა, ნძალაშულობა, აკოქიმინათ მანქანეფი, ნძალაშულობა, ქუდარსხუათ ბედინერობა. თქვა გიღუნა თიშ ნძალაშულობა, გინაშქვათ თე რინა დუდიშულო დო სქვამო, გინაშქვათ თინა საჩემარ დუდს გინახვამილაფარ მუდგარენო.
იმწკუმა, დემოკრატიაშ ჯოხოთ, მორთი გეგმიბრინუათ ათე ნძალაშულობა! მორთი არძოქ აკიფშქვათ ართო! იბლიმათ ახალ მოსოფელშო, ნერიან მოსოფელშო, სოდეთ ადამიერს აღვენუ დოსართე, იმუშუას, ნამუთ მარდუეფს ქიმეჩანს მუმალუს დო ხანერეფს - უშქურანჯ რინას. ათე პიჯალეფიშ მეჩამათ უგურე კათაქ ურჯგინუეფო გინირთეს, მარა თინეფი ტყურას იჩიებუნა! თინეფი ვა მეთხოზუნა მუნეფიშ დუნადევლ პიჯალეფიშ ეჸონაფას. იმწკუმა, მორთი იბლიმათ ათე პიჯალაშ ეიოჸონაფალო! იბლიმათ, მოსოფელიშ გადუდიშალაფარო, გეგნობლახათ ერუანულ ადგადგეფი, გამუვოჩილითუათ თის ჰარამობა, ჯოგინი დო ნტერალა. იბლიმათ თი მოსოფელშო, სოდეთ მენცარობა დო პროგრესი ედომშამო ადამიერეფიშ ბედინერობაშა რე მეწურაფილინ. ჯარიშკათა – დემოკრატიაშ ჯოხოთ, აკიფშქვათ არძაქ!