დიხა ინორთელიე
დიხა ინორთელიე,
ცა შურც ინოჭელიე.
სოდგარენი ქვინჯი რე,
სოდგარენი რჭელიე.
უკულ თენეფ ჟირხოლო,
ჩქიმდა ინორჩელიე.
ათაქ ირფელ ღურუ დო
ათაქ ირფელ თელიე.
სოდგარენი ქვინჯი რე,
სოდგარენი რჭელიე.
მეურქუ დო ვემულუ,
ვემულუ დო მეურქუ.
გარაგანქჷ გელუ დო
გელაფაშა გეურქუ.
კოჩიშორო ქომოფრთი,
ოდიარეთ გეურქუ.
ჩქიმი ტანი სქან ტანსუ,
მიქ, მუნერო მეურგუ.
მეურქუ დო ვემულუ,
ვემულუ დო მეურქუ.
ქუგოკონდა ქოთქვი დო
ვა გოკონდა ვათქუა.
მინშა თირი, თირი რე,
მინ მუნაფაშ თქვათქუა.
გინძე შარა მიჯინე,
მარა აწმიბკვათუა.
ნარღიშ ხორიალექჷ
ამარ ქუგმომართუა.
ქუგოკონდა ქოთქვი დო
ვა გოკონდა ვათქუა.
ათაქჷ რე ოფუტე,
სოდგარენი დუნია.
ნირსიშ ფოტა ქათიფრჩი,
წყარი ქაწიფქუნია.
ართი ცირა მიჸორდუ,
ჯუნუაშა ბჯუნია.
მოკო სოთინ ვაორდენ
დო ირფელცჷ პუნია.
ნირსიშ ფოტა ქაწიფრჩი,
წყარი ქაწიფქუნია.
ცას ორტყაფუ ქუღუდა
შურშა ვაგმარტყაფენო.
ათაქ ვა მიგაფუდა,
შხვადო ვა მაგაფენო.
სქანდა ქუოწურედა,
ჩქიმდა ვა მაგაფენო.
უგუჭყაფო მერჩქინელ,
სოთინ ვაგმაჭყაფენო.
ცას ორტყაფუ ქუღუდა
ლერსშა ვაგმარტყაფენო?!.