ვათორკათაფუნო გურშა
ვათორკათაფუნო გურშა
მუდგარენ მუნახვამილეფიშ გოშინა
სქან ულირ რინაშე
ჩილამურ ვამუკათინუაფუნო
ამარ გოწოხონერ გოძიცელ
თი სახეშ შინს სქან გურიშ ინოხ
მიქით მიგოტუ
ულირ რე სქანდე ირიათონონ
გურ ვალარჭუნო თი სქან გერჯგინაშენ
ნამუქუთ თიმწკუმა დაჩიჩუ სქან მაჸალენ...
ორექ დო შურ გიდგუ
ხიოლით ფურინუ
ვარ-და ნიჰილიზმის აფუქ ჭკომილ დო
უმკუჯინუო ათე ირფელიშ
ჰალამო მუგოხორცქუ ნოსტალგია
დო გითმიშინა თი ბაღანობაშ წანეფს გინნახვამილა თოთმაცურობეფს
ნამუთ მიარე ფერს არზენდუ სქან ჩქიჩქურ თოლეფსინ...
ათაშ აკა დღას
(ღორონთქ ვაჸუას
მარა მუ შქას რე აქ ღორონთი)
ბრელ ფარანიშ უკულ
ვარ-და თაშ ფთქუათ
კითიშა გეკოროცხილ ვითწანეფიშ უკულნე
მა ვორწყექ მატერიალურო დო ირფელნერო
ეფშას დო დიდარს
გოძიცელ დო ხიოლით ეფურინელ
ძღაბის (გოკონ-და ბოშის)
ნამუთ უნელო
შქა ბედნერალას
ქიმიოძახანს ათაშ -
ახ, ნანა ნინა!
(შხვა ნინაშა, მუთ ოკო რაგადი)
ქათაკათუ დო გურს მესოფუნს
თი მუშ ჯვეშეფიშ ნინაშ ჭუა
ნამუთ ვა უჩქუნ
ნამქუთ მედინ დო ნამუშათ ანწი
ვარაგადანა ასე სოთინინ...
ათაშ
სოდგარენ
ჟირი ანთას სუმენეჩი წანა რე
დო კოჩიშ სქუა ვეჩიებ
კინოხონეფიშ ნინაშა
ჸვილირს ტექნიკურ რევოლუციაშ პიკიშ შვანს...
ვო მარგალი
მემხვამუ
ვა უჩა გური
გიშაილუანს დო მუს გორუ -
ირიათონი ვა რე მუთუნი
მანგიორ ჯგირო რექ ასე
ბრელ ფარა გიღუ
დო შხვა ბრელ ნინა ხოლო ხომ გიჩქუ დო გიჩქუ...
ათაშ
სოდგარენ
ჟირი ანთას სუმენეჩი წანა რე...
მემხვამუ მარგალი
გეგშაირთჷ -
სქან ნინაქ დოღურ!
03.30.2022
ქართი