ვაშინერც დო ვაში ნერჩი
ღურელც ტაბაკი მუშო ოკო –
ვაჸუმენც დო ვაშქირენც,
მარა თია ვეგლუდვენი
იშენითჷ ვაშინერც.
მარდი ცოდათ გინუგაფ
ჯგირობუა ვარჩქინელც,
გურქ მოირთჷ-და, ვადოჭყუა,
ჭყალა იშენჲ ვაშინერც.
შანქარქ გაჸუ ჭკუმუნქჷ-და
ხუთნერი დო ამშვინერც,
მარა ომბოლც, ხიტა ვარა,
ვამკუტახე, ვაშინერც.
კოჩი ტანიში სინთელეს
ოდინუანც ორჩინელც,
უმინჯურო მიწოტება
ცოდა რე დო ვაშინერც.
სქან მაჸალეს გოუზგირტია,
სოლედგარენი მაჩინეს...
კოჩქჷ დუდი ქიმგენდჷ-და
გითოჩამა ვაშინერც.
გური აფუ ფშინაფილი
ჰარამ თოლით მაჯინეს,
მეძობელიში ჯგირობუა
გოწყინდასჷნი, ვაშინერც.
ირფელი ართი გაფუდას,
თენა ხოლო ვაშინერც,
ჸოროფა რე ოთასალი,
უბადობას ვაში ნერჩჲ.