ინგირი.
ჟი თუნცუ დო თუდო ჭვენცუ,
გვალას კინე გვალა მობუ,
შქას ენოძუ გირძას უჩა
წკვარამია დიდი რობუ.
გიმე ინგირჷ მისირთინუ –
მობურსუნცუ გვალო ჸალა,
ქვიშათ ოჩქვანც კირდეშ ქუას
წყურგილეფიშ ნაჩხარჩხალა.
მელენ კირდე მუნორთელი
ცარიატაშე გიმეჯინე,
გოიკვირდუ თიშ სისქვამე
ქიდეკვირე ქიგიჯინე.
თუდო ჯინჯის გუთურჩხუნცუ
ინგირჷ ტყორტყოშ ჟვეპურითუ,
ნირს ეხორცქ ჩე თუმაჯგუა
თიში რგილი ყებურითუ.
მორძგვშე ნესკრა გაკათუუ
ბჟე წყარეფიშ ნაჭვარჭვალა
საპონიში თქვეთქვიჯგუა
ირემიში გითნაჭვალა.
უკულ წელცუ გოფაჩუნქუ
ხაიშურას ქიკათუა,
მიკახორცქუქ მელე–მოლე
ირფელც ართო ურგინჯუა.
ვაიჩქ გვალა, ვაიჩქ რზენი
ირფელც ოკო ენირზენი,
შონეშ გვალა გეგმამრჩხი დო
ზღვა თურქეთშა გემშამრზენი.