კირიბეფი
ღაჭაჭია
(ნგერულ წესდვალათ)
თელ დღას ისვანჯუ,
ხარხენცი რე მითოფულირი,
გილანჩურუაშ ფირქეფიშე კინ გიშულირი,
თავრე იჯინე, მუკოტყობუ კაბეტ ქუასი,
არძაქ მუშ საქვარ ქიმინასი, სერქი ქუასი
მუშ ოქუალი... ამსერ ჩხომი ბრელ რე მულირი,
- თქუ ღაჭაჭიაქ, - ოკო ბჭოფე, გოკონ თუასი.
ალნარკია
ანა ინგარც, ხეჭკურელო ხე დო ინგარც,
აწაძირე - ა სკუა დო ა ნარტია,
ზუღა-გოლათ გეჭოფას დო გეგნოიდგას,
დაჩხერც მეჩუ არძა ჭუაში ქარტია,
ზუღას მეუღ რჩხვიაფი დო ვარე მიდგა,
ალნარკია, დიდა ანაშ ალნარკია...
რინათ ჭკორი
მის ათანთხუქი ოდო მისი უსირქოლუა,
მიშ ტაბაკწკუმა შურამ ხორცის უგირგოლუა,
თაშ მუქ დორჸვილუ, ვედემონე,
ვეგნირთე ჭკორო,
ითომც მანგარო დუდ მეიღუ, ეში რექ ბორო.
ირფელ ართ გაფ-მაქ გიწუენი, -
მეტ მუ რღოლუა,
იძიცანქი დო მილაიციკ პიჯშა "მალბორო".
ოლორი ფურინჯიში წოხლე
თ-ს
უცქვირინანცჷ მუში დუცი, წყარცჷ ოლორი,
უჩქ ოლი აფუ დო ობირე ასე ოლური,
უჯინ-უჯინუ მუშ დუცი, თქუ, -
ვორექ გორჩვილი,
ზოთონჯიშ ჩხურუს ვაფუქია მა ეჭოფილი,
მუქი მოძირუ ათე ჸოფა თეცალ ბორული
დო ემორჩქინუ უჭყანიე, ხანაკოჭვილი.
ოლორიში ბირა
ჯინორ იშინანც ჯვეშ ანბესი ოდო ინგარცი,
მა ბღურედკოვა ინა ვარი, სიკოჩ, თი დღასი,
ჷჷჷჷჷ, ჷჷჷჷჷ, - ოლორ თვალუნდუ,
ბურდღამ ბორკეფი ასე მუში
წყარც გეუდგუდუ,
ჷჷჷჷჷ... ჷჷჷჷჷ... ჷჷჷჷჷ,
ეთი ხმა ჸუცუ ალმასიმე, ეთი ჷჷჷ.
ნინა - 2
კიბირეფ ნინას არჩქალენც დო ოშქურინუანც,
კიბირ ვარდასინ, ნინა გვალო ქაფურინუანც,
თიზმა რდგაბალით, მინ თეს ობუ, მინი თინასი,
ემერ წიმორე მით მოციკუ ირო ნინასი,
ართი აშარე, ზიტყვათ
ირფელც გაკანდღულუანც,
გეხე დო ფირქენც, მი აღორას, სოვრე იდასი.
კირიბი ჩიჩიე კოც
ჩიჩიე კოჩიშ დღას მუთუნი ვაგოკოდასი,
ენა ჯვეშიში ნარაგადო თაქი ქორდასი,
დღას ვაგმოდირთუ,
გოისხაპუნც საქვარ მენჭაფილც,
კინე დაჭყანცი ჯვეშობურო ნინაშ პერჭაფის,
კუდელც უჭოფუნქ,
ქათუჸოთა მუჟამს ორნასი,
ით ირულენ დო ართ პაღური სით ქოუჭიშე.
მირსაში რობაია
არძა ჸვერესი თოლ გოუნჯი, რშუდასი მირსა,
(ინა უჯგუშო სით ქოიჩქუ, მი სოდე ირსხა),
უღურუ მერქა - ქოძირუნცუ
ჸვერე ცაშკიბულც,
თი ხანგაშორო, ვაგმოჭყორდუ უთებუ ძიცა.
ჩე რასსა
I.
ქოთქვი, ბლუმენბახ, შქასქერც მისი გილაგორუნქჷ?
კოჭობიშ სინთეთ ჩილამურცი მუშენ ფორუნქჷ?
ამარ გამნარყი დარჩელიში, ვარა გალიში,
ა, თი ჩე რასსა, ფუთარიში, ზანა - ჯგალიში,
მუშენ, გოთანას, ისტორიას სი მენთხორუნქჷ?
- მინ თურქიში რე ამდღა, რუსიშ დო მის უჩქჷ მიში.
II.
ე, ბჷ, ზჷ, გჷ-თი, თაქ რაგადი ართშვანც დიჭყესჷ,
მაართა ჭარილ თაქ ჭარესი, შხვას დაგურესჷ,
მარა გემნირთუ, წყარწყვნას გეცუ ექ ჯარალუაქ,
დიხეფ, ნინათი დო ჸირფელი თი ჭარალუა,
კურცხას ვარდუ დო ლურენჯისჷ ქათახირესჷ,
- სი თექ მეული, კინ გიძახუ თი შაყარუა.
ლაზარეშჲ, (ნანაშ ნინაშჲ) კირიბჲ
ლაზარეშ ნინა სი რექ, თიშენ, ირო რთხოზუნა,
ოშკვიდაფუშა მუკი-მუკი ასეთ გორჸუნა,
სი ოკო ღურე, უკულნეშე ოკო გედირთე,
მუჭოთ ლაზარექ, მეტ შხვანერო სკანდა ვემირთე.
თაქ ანდანერი მოიადას ასეთ მოჸუნა,
სკანოთ ჯგირი რე, მუჟამს ბრელცი ოკო, - გეკირთე.
ნამარგალჲ
სით ვამორწონცჷ ათე რინა, ნამუთ ასე რე,
სკან მაზაკვალი ბჟაეიოლ ქიანაშე რე,
დო ნამარგალი, გურსაჭო რე, თე ნოხორილი,
გინოლასირი, უკუნიში ჯინჯით ფორილი,
ნამ ნარაგადი უღურუ რე, სკან ნინაშე რე,
სოდგა მუკოძჷ ქუა სკან ხეთ ეშანტკორილი.
ნახალიბუ
ოჭკადურესი კინეფ გოძუ გოღულაზირი
დო კიდალეფი ანდანერო რე გოღაზილი,
სი ალმაშარე ფირქეფ გორთხოზ ღუმაინჯიშე,
დო ტყაშმაფეფი კარკაცანა შორიშ ხინჯიშე,
არძა მინალი ანწ სკანო რე გინორაზილი,
მითინ ვემერჩანც მუთუნცი დო სით იჯინ ჟიშე.
კორიბანტიში
ვარი, კიბელე, თი მენცარი კორიბანტი რე!
ვართ კვარჩხი რენ დო, ვართი მორძგვი, ხეს გიგანტირე!
ქვინჯიშ ჯინჯი რე, ფარგალითი გუნაფარგალა,
გენდღულაფირი, ხალიბიშ ხეთ გუნავარკალა,
მოწონც ონჯუა, გილმალიში ფირქშა ვანტინე,
ჭვემათებულ დღა, გუნაღელი, გუნასარკალა.
ოდოიარე
ოდოიარე, დოიარე, ოდო მუდა რე,
შარა კუნტა რე, ანდანერო აკნაბურდა რე,
ვარე ფარანი, ვართ შარა რე, სი სო მეული?
გურც მუგკობინუ გასაშინეთ, კინე პეული,
- ოდოია ა ა სი... მიბირქი დო რინა ჸუნგა რე,
რჯერც დო რაგადა - მა ხომ სამთხეს, ვარდო ეული.
ნაბუქოდონოსორი
(სახეეფი ორქოშ გალერეჲშე)
I.
ბაბილონიში კიდელ ბაღი, იარუსითჷ,
თექ ჸირფელი რე, ინარტენც კოჩი მუსითჷ,
ჭყონ ანდანერი, ტუია დო სექვოია რე,
გეიჸოთ ათნა, (ხემანჯღვერქ თქუ), შურამია რე,
შურამ ჯალეფი ვარდემწკუმა იჸი გურითჷ,
ირო ქუმორთი დო სკან შური თაქ დადიარე.
II.
სერით ეკოხე დაჩხერწკუმა კოჩ დო ფირქენცჷ,
ქარწყე მუნერი ამდღანერი ბორჯი ირქენცჷ,
ერჩქინას დღაქი ქუმაჭიშუ მუში ჩილიში,
მერჩქინელ ბაღიშ გასურება ვეჸიდ ჩილათა,
მანგარ მუდგარენც მიორთუ დო არძენც ირფელცჷ,
თქუ - თილისმა რე, თოლეფ უგუ უჩა ჩილაშა.
კლეოპატრა
(სახეეფი ორქოშ გალერეჲშე)
I.
სისმარო ხანგა ტყარკოჩწკუმა სოდგა მეურცუ,
გოღანერ ხანდაქ, ოჭმარეშე წყარშა გეუცუ,
ეგვიპტეში ბჟა უტიბუანც უჩა ოჭიშის,
სკვამი რე მარა... მიშხვართალუ, ღუმა ვართ იშუმ
მუშ კუროწკუმა... ფანტაზიას ფერჭკომქ გეუცუ..
გინოჩხანაფაქ ამდღა ხოლო შურშა მაჭიშუ.
II. ანტონიუსი დო კლეოპატრა
ანტონიუსით ბორო ვარე, ითომც, კითხენი,
ვარინ, ჯუასი ქათანთხუ დო დუთხინუანი,
დითა, მუ ოხვარ ანწ თენემცი, პატინ ვიშოვა!
თქუ, მონტესკიექ - მუდგა ორდას, აშოთ-იშოვა,
კლეოპატრასი შხვანერ მინკი ქუღუდკოვანი,
თექ ისტორიათ გვალო შხვანერ შარათ იშუა.
გუბაზ მაჟირა
უგუჭყოლადჷ მაფეფი (სახეეფი ორქოშ გალარეჲაშე)
I.
არძა მაფეფი მუშენირე ჸირო მაჟირა?
ერეკლე მაფა, თაქ ბჟადალც ლევან დადია,
თინეფიშ ნძალაშ სიმანგარე მიქ იგინუანჷ,
დღას ვაგაჭყორდუ ბოლო დღაშა თი გურგინუა,
ეშვორექ ჸვანას დო სიმინცჷ ასე მაბჟირა,
გუბაზშე ფიბრქე - თი გენია სით ვადინუა.
II.
ჸვანას აშარე, ქიმიდგინუ ღვინიშ ორკოლი,
თქუ - გურკოჩიშა ართიქ მეუ, ასე ქუმწოლი!
დოშაყარუას ჯარალუა, ენემცჷ ბსვართუ,
ამსერი ოკო ეშაბჭყვიდე, მუჭოთ სისმარცჷ..
დო "на три буквы " ოჯღონანცჷ მუჟამც ოკონი,
ირანიშ შახის, უკულნეშე რომულ კეისარც.
გუბაზ II
უგუჭყოლადჷ მაფეფი (სახეეფი ორქოშ გალარეჲაშე)
III.
ლჷმაშე დირთუნ, ართ ფაშატი ოკო ხენდასჷ,
ოდო უკულიშ შაყარუას თის გეხედასჷ,
ჰე, მარგალონა, გუბაზ მეურც ოჩხუპებუშა!
აწაჩოქასი ოკო ტერქ, მეტ დირთუ მუშა,
უკულ მარულეს გაკეთენცი აშო, ხოფასჷ,
დართუ კუნთხუსი, ნამუთ ირო უსხუნუ შურშა.
IV.
ა, დირთ მაფაქი, გომორძგვილო დო დოხარგელო,
ჭკორ აწოჸუნცი, ოსურეფი გვერდო ტარკალე,
მუშ ხემანჯღვერემც აკურიგუ, მუქ დიტუ ართი,
დო ორე მარა, მუშმასკვამა... სანწალე შხვართი.
ხაზარიშ მაფას მიდუღ თენა, თიქ საკაკალოს,
უკულ ქიმწიტუ აშონ დორთას, ართი ნოღასი...