კოჩი რექო
კოჩი რექო? - დოჲძახი დო
კოჩი რექ-და გიღდას რჩქილა,
თე ქიანას ჭიჭე რექ დო
უღორონთეთ ვედირჩინა.
მუთ მერჩი დო დოიჩინი,
ოჭყიშალი გაფუ თინა,
სქან ოფუჩალ იფუჩე დო
შხვა შურიშა ვემჲოთინა.
შხვაშ სისქვამე, შხვაში რინა,
ქოძირიო? - აშო დირთი,
სქან ორდუალ სი მორდი დო
სქან ღურელცჷ მიკუდირთი.
სქან ოხვამალ სი დოხვამი,
გოჯუდ მით გაფ ოჯუდალი,
სქან ბინეხი დოსხუნი დო
ქიდუდე სქან ოდუდალი.
გური შხვადო გიძახუნო? -
კარ ქიმუკილ, მუთა რე,
სკან საკმელი ქიგიოთი,
სქან თანაფა გითანე.
ქიგიშინი სქანი ჯიხა,
ვახუმუა სქანი ჭყონი,
ჟი ვორექ დო ვადოჲტალე,
ვამრჩქილიო? - გუგანჭყორი.
ვადინუა მარგალური,
სქანი მარდუალი ნინა,
ქიგიშინი ლაზი ჯიმა,
სქან არკვანცჷ ინნანჯირა,
ვადარცუა ოდა-ბადე,
სქან შურიში ოლაჸაფე.
ჰა, მენძელი! - დიძახი დო
გომორძგუა! - დაძახაფე.