მარგალური ნანა (დიკა სალაყაია)
ჰამაკიშა აშამჯანუქ
ჩქიმი სკუა ბჟაში დარი,
ჟი მურიცხეფ გიგოჯინე,
ნანა სკუა ქუდმეწყნარი.
ინგირ ცხენით გეგნუნჩურუ,
მალას მოურს მუმა სკანი,
ჩეშ გოთანას თაქ ივაფუ
ქუდირულე, სკუა სკვამი.
იავნანა, დიდოვნანა,
ნანა სკუა, ჩქიმი სკვამი...
უკმელა რე ელმოლუსი,
ზღვაპის ირქენს ბორია წყნარი,
ასე თუთა დუს მუნგორე
ნანა სკუა,ქუმისვანჯი.
ოჩო ტყაშა გემშურაჸუ,
მალას მოურს მუმა სკანი,
სი მუთუნშა ვაგაშკურნას
ჩქიმი ცირა ბჟაში დარი.
იავნანა, დიდოვნანა,
ნანა სკუა, ჩქიმი სკვამი...
ოდოს ჩელა მედინაფუ,
დამორჩილ რე ქიანასი,
მალას გინძე სერ ივაფუ
დო დღამორჩილ, დიდა სკვამი.