მაცალარი
კათას ორღვანც - ნაცალას,
ვემიოტენც ცალუას.
ღურუს ჯოხო მაცალარ
ირფელც უცანცალუანც.
ეკოხონც დო დიკოხონც,
ინა ცელით გილარხვად.
ვემკიდვანც ძელ დო ქონც,
გილურცჷ დო გილევალ.
ჭარკინტია დოურთაფჷ,
ჯოხო მიქენ-გარიელი.
ისი არძა ართი აფუ,
ჩიჩიე დო ტარიელი.
გურც ქუმანჯირ ოფულარქ,
დო მა ყინტიქ ვეკმაღინ.
კირიბ შოშეს მოქულანც,
ცას მურიცხიქ ქეკადინ.
ზალამ, ნარტეფ მეტებულო,
დღას ვაძირა დუდი შხვას.
ღურუ სოთინ გენტებუნო?
ის ბორჯეფი ქუმაშკვანც.
კოც ჸოროფა გაკვირტანც,
მინც ტანც გადირთ ბარცხინია.
შურიშ სინთე იჭვიტანც,
მუჭოთ ჭიჭე მარწკინია.
მინ მინჭუაფ თევრე, მელე,
მინ თაქ რენი, ფურცქინუნც.
ცა ჩქიმ ჭუათ გოქუნელე,
სოლედგარენ გურგინუნც.
მალას დიჭყანც ცირუას,
უკულ ფართას მაჸუნუ.
ჯოღორ გურცუ იჭუანც,
გიფერცხელუ მაჸურუ.
სოლედგარენ იბარბანჩ,
გენია დო თაკარეფი.
ამდღარ კოც მუთუნ ვაშ,
ცოდათ ორე ნაგვანეფი.
......
არძაშ გუმამანგებელი,
გოკონ, ვაგკონ, ღურუ რე.
მინ ხურეკო გინირთუ დო,
უკულ ხოლო ჸურუ რე.