მა მეულ ცაშა
მართუს მუნარე ღირზალი კირდე...
ცაშა ერდილი ჯორომბეხი რე...
გასხვარსხვალანა, გაჭვარჭვალანა ჭვემაშ ჭვათეფი:
თუთა მეხედი, თუთა მეხედი, თუთა მეხედი!...
მოურც ხელერდი!...
ზიანც ფაროხი!...
ღილიტჷნც კირდე მუნაფაშ კართეს
ნოსვერთ-ნოსვერთო
ოდო კინ თინა მუკაქუნც ღართო.
ჩქი ვორეთ ართო:
მა, ტომბა მართუ, ღირზა კირდე
დო თიშ კორკონტი
დუდგოწირილო ვოღუზუქუ ვერეხი კირდეს.
ოკო ვერკინე,- ქუდვომბალუე,- მობნჯილიკუე!...
აკმაპირტოლას კილე დო კონკერქ,
გეგნმაფერჩველას ქორა დო კიდირქ
ოდო გოკონდა ზისხირქ ფუას
ბერთი დო ბერთო,
ბთხულე დო მოკო:
გოლაში ორთაქ,
რზენიში ორთაქ
ვარა ჟინ ანთარქ -
ირიში თანთარქ
ქემიაკანას!...
ოკო ქობძირე ქაქაბი ცა
დო თიშ კარკანტი!
ნამეხარი დო გრინჯილი ზორთით
ჭვილი ჯალეფი გემპულანა
აკან-აკანო,
გურც გონჯილაკე დო ელართე
გოლაშ ლექართე;
ჭყონი ლექერთი ეკორთელე გურიშჭუაშე
დო არძა ართო კინ თეს მპოლანა:
თუთა მეხედი თუთა მეხედი, თუთა მეხედი!...
მონქურც ხელერდი!...
ხორცქუ ფაროხი
დო კარაკანო
გონწკირე კირდე!...
ვოღუზუქ ძგოპის, წკირილ ქუას წუმოწვანთირელც
ეთმიაბკანა,
მონკა ტანი ეშე მემთირუ.
კირცხიშ ხოროში, ხორშკაკალი დო ვართ ხორშუა
მუთუნც ვაშენა
დო ტყურათ რე დუდი ვაშჷნა:
მიკირკოლუნა, მიხირკოლუნა, მინჯილიკუნა;
ვართ გონჯილაკირ მართუს გურთუ მუთუ ფუშუნი:
დორკოკულანა,
დორპუროსკუნა,
დორსაბაკანა!...
ჸუც ალმორშვიანც:
"დირთინე სვენა".
დუცუ მონეთ მუშენ იბორენქ;"
"სითი ორდენი, ღირზა კირდე მიქ რე მოშჷნი;"
"გიმეჯინ, ძირუნქ:
ირთანც მართუნ მუშ მატომბა რე;"
"დინუქ მუშენი,
მუ რე დუდი შურო ვარშუნი!..."
"დორსაბაკანა დორსაბაკანა, დორსაბაკანა!.."
გოთ გობენჭ ტყვაციქ, გამკოტირხ კონკიქ,
დიპანჯ გაბარეფქ!...
დინწალ ქიანაქ მართუქ დუდი კირდეს თქვაშუნი
ოდო აკანო
არძა გეფალე,
არძა გერთუმე
ნამ მაზაკვალიშ კაჭა-ფოლო რე.
ოშქურუ კირდეს,
მართუ გორსაპე,
მუკი ქიანა შიშთ გომბარე.
ხვალე ვულკანც რე ვაულინ ხეშე:
გოლაშ გურ-ნორცხვა კინ თიშ შურც კაშჷნც
ოდო მბელანც გურც მუთ ალარე:
თუთა მეხედი, თუთა მეხედი, თუთა მეხედი!!!...
მოხორცქ ხელერდი!...
ტირხუ ფაროხი!...
ილენც დო ხარენც
ერეხ-მერეხი!...
მა იშენ მეულ,
მა მეულ ეშე!...
ეშე დო ეშე, ეშე დო ეშე
მა მეულ ცაშა!...
- ლექსიკონი:
ღირზალი - ამრეზილი, ზევიდან აგდებულად მხედვარე;
ჯორომბეხი - ზორბა და უძლეველი, ჯმუხი;
ხელერდი - სეტყვანარევი წვიმა. ლეხერდი თოვლნარევი წვიმაა.
ზიანც - გაბზარულია, იბზარება.
ფაროხი - კლდის ქანი;
ვერეხი - უზარმაზარი
გოლაში დო რზენიშ ორთა - მთისა და ბარის ბუნება, მისი ძალი
ჟინ ანთარი - ღმერთის სინონიმი;
ქემიაკანას- ამამაღლოს. ააკანება = ამაღლება
ხოროში - ორმოში შესანახად გამორჩეული მარცვლები;
ხორშკაკალი - მსხვილი მარცვლები;
ხორშუა - თვალების სილის თუ მისმაგვართა მიერ ამოვსება;
გაბარი - ამაღლებული ადგილები, ქედი;
აკან-აკანო - აქა იქ;
აკანი - თე აკანც = ამ ადგილას, აკანო მუთუნ ვარე = ახლო მახლო არაფერია;
ფოლო = ჩლიქი;
გორსაპუა - გადაჭარბებით გავსება;
ერეხ-მერეხი - გაცამტვერება, დაქცევა ქვეყნის