მიჩქუდჷ, ფსუა ორდი ჩქიმ*
მიჩქუდჷ, ფსუა ორდი ჩქიმ, მოკოდჷ გეფუბრინიკონ,
უკულ გოლას მეიგურე, ჟიშე ქეგნოჯინიკონ,
უკულ ბოშის დოგაფილს, ბასქის* თოლამს დო გოდგარს,*
გემუან ზიტყვასკვილამს, დო ბარხატიშ ხონარამს;
უკულ კოჩანიერ კოჩის, ნამდვილ გორღამს* ფოლადიში,
მოხანდე დო მომაწიენს
მუთ ხონუ დო თასუნ თიში...
უკულ გუდჷ, კოჩს, ნამუსუთ ბრელშა უფჷ დუბუნუნ ფერსჷ,
უფურინ ფსუალებით, ოსურეფ დო ღვინით რძღელსჷ...
ხან მაგონენდჷ ბაღანას, არიკ ონატრუდუნ ფერსჷ;
მინშა ღვითალ, მინშა გაბლა, ურწუმოს, ღორონთიერს...
მოკოდ ჩქიმ მააჸალეთ, ალმაშარეთ ირდიხაშ,
ვამსხუნუდჷ სკანიწკუმა, ჩიებაშა მუთუნ დღას,
ვარჩიენდით ანაჩიას* უჩინებუს, მინ მერჩქვანელს,
ოსურეფ დო ქომოლეფიშ ხასიათეფს, სხვადოშხვანერს,
მუჟამს ართიანს გუტირხით,
ჩქინ რინაშ ჯგირ დო ფურსჷ,
მიჩქუდუო, უთქუალეთ,
მიდამღანდი, მა სი, გურსჷ?!
22/01/2019.