მონკა დღალეფი
„ირკოც მუშუში ათაშუშუ“
(კობა გულუა)
მირულენა,
მირულენა,
თე დღალეფი მირულენა...
ფარამ კათა
ხირულენა,
ხირულენა!
უღუნანი ხოლო მეტის
შიბულენა!
მირულენა,
მირულენა,
დიმდარეფი ოხირჷშა
მირულენა!
ჩქჷნ ქიანა გორჩვეს დო გოხირესჷ
ართიანი ვადინდესჷ
დოჸვილეს, დოჭვესჷ...
ქიანარე დინაფილი
მუნე მუნორთინაფილი,
ღობერეფი რხინაფილი
ჸუდე ეკორთინაფილი
იმენდეფი დინაფილი...
მირულენა,
მირულენა,
თე დღალეფი მირულენა...
სქან თიასჷ
ჩქიმ თიასჷ
ხირულენა!
სინდისის გჷმოჩანა
კანონეფც ჸიდულენა,
ჯიკაფითჷ მესოფუნა
ოხირჷშა მირულენა.
ქიანარე თენეფიში
ტურეფი დო გერეფიში.
ჩქჷ თიას მიდომღანა
მუნეფიშო ირიგენა,
უნჩაშიშო წკანტილი დო
ჩქჷნიწკჷმა ვირი რენა!
მირულენა,
მირულენა...
ჯა დო ქუას
წყარ დო დიხას
დოლარეფშა გჷმოჩანა,
სიგანეშა ძინულენა!
იმენდეფცჷ მიდომღანა
იმენდეფც ხირულენა!
..........
ღარიბეფი
მირულენა,
მირულენა...
შქჷრენც ვადოღურანინი
ჭიჭე ფარაში ოშიბუშა
ევროპაშა მირულენა!
მეცენა დო მენდურენა...
ოჯახეფცჷ ბაღანეფც_
უმინჯურო ტებულენა,
დოსქჷლადირი რჩინუეფი
თვინულენა,
ვართ სოთინი ჩიულენა,
გურმეჭვილო გერენა დო
ჯინულენა...
ეზოშ კარშე ჯინულენა...
.........
მ უ ჟ ა მ ი შ ა ?