მუჭო აღორეს ჭინკეფქ ოგაფურიშ მაზირალი
თე ამბექ ისტურიცას მოხვადჷ. თექ ართი უღვენჯი ფიოში ოხორანდჷ, შქირენას დო ჩხურუს დამაჸალებუდჷ დო ჸუდეშა ნასარჯელუ ვა მუნაღინედჷ.
დო ამარი, ართიშა, თიშა ოგაფურიშ მაზირალქ ქომერთჷ.
— გირაგადუქ, ჭუმან ედომუშამ მუნაწის, მუქუთ მინდორიას დუგოსქიდუნ, მა მიდებღანქ. მუთ ჸუდეს გიღუნ, სქანი თინა რე. მუდგაშ ეშაყარუასჷთ ამუსერი მაჭიშუანქინ, სი დუგოსქიდუ.
ფიოშიქ მოფირტვონდჷ, ხელეფი დუდიშა ქომითხჷ დო ვა უჩქუდჷ მუ უქიმუნუდჷკონ. ვართ ჩირთუდჷ, სერით მუსხიშ შაყარუას ოჭიშუანდჷ. დო ა, ფიოშიქ ქომიფირქჷ: პაპუმუში ურაგადუდჷ, ჭინკეფს ქოდოუძახუქ, ქობალით დო ჸვალით ქემენძელებუქ, მოხვარას ქოთხინქ დო ჯგირი ხასიათის ქიჸინა-და, ქომიგეხვარებუნანია. მუნერი ხუჯის რენან, იში გიშაჩინება ძალამი ლექინი რე: ოკო დიტყობე დო ქომოურჩქილუე, სუმარო ულაბორჯის მუს იბირან.
„ჩირინ-ჩირინ-ჩირინს’’ ქიბირა-და — შეგილებჷ, მუთ გოკონ თინა თხუენ დო „ფირგულინ ფირგულინს’’ქიბირა-და — გოკონი თხი, გოკონი ვარი — მუთუნი ჯგირობუა ვა გაში.
ფიოშიქ ეკონია ქობალი დო ჸვალი გაგიმიღჷ, ტაბაკის ქოგილანწყუ, დო მუქ დიტყობჷ. არჩქილე ჭინკეფი მოულან დო ‘’ჩირინ-ჩირინს’’ იბირან. ქოდოზოჯეს დო ქობალი დო ჸვალი ოჭკომეს დო თქუეს: — ვო მენძელი, აშო გითილი, ჩქი სი ბრელი ხანი რე გორწყეთჷნ დო მუ ოკო ბთხუათინ თინა ხოლო მიჩქუნა ანწი. სოიშახ მუმული მიოჸიონანდასჷნ, ჭეს ქოგეუხანდუანთ.
მინდორიაშა მიდართეს დო მუნაწიშ ეჭოფუას ქოგეუდირთეს. ოჭუმარეს მუმულქ ქომიოჸიონჷ დო ფიოშიქ ქოძირჷ, ნამუდა ჸუდეშ ცხვინი ორთვალშახ ქობალიშ კაკალეფით რდჷ ეფშან.
— ჩირინ_ჩირინ! — ქოდოუძახჷ ჭინკეფს, მარდიელი ვორექ!
ოგაფურიშ მაზირალქ მინდორიაშა ქომერთჷ დო ქობალიშ ჸვანაქ გჷმილქ ქოდოხვადჷ. გეჸალჷ, ქოდიღვარუ, მარა შხვა შარა ვა უღუდჷ, ჸუდეშა ხეჩოლერო დიირთჷ.