ნანაია, ნანა
ნანაია, ნანა სქუა,
ოცქვაფურსუ ირო ფთქუა,
აშამჯანუქ მურიცხჯგუა,
ბჟა დო თუთას გიგურუა.
ონწეს რწკინუნქ,– ბაია რექ
სქან ქიჸანა აია რე,
გურიშ ჰამო ნაია რე,
ირო გიბირც ინა ნანას.
შურობუმუ დიაშ მხარეშ
უსქვამაში სოთინ ვარე,
ბედქ გაშუას, მუდგა ნწარექ
ქახუტოლი გურშა, ნანა.
დიო ორექ ჭყინტურუა,
ჭკომუნქუ დო ილურუა,
რინას უკული დიგურუა,
მუჟამც კოჩო მირდუქ, ნანა.
ათაქ ოკო ითაკარე,
ათაქ ოკო გიდგე კარე
გიჩქუდასუ შხვადო ვარე
ათეჯგუა ზღვა დო გვალა.
რინას ოკო ემანგარე,
თიშო ლჷმა ვედიზარე,
ვარექ თაქი სი მეშარე
გიმირჩქინე ოკო ძალა!
ბედი მუდგა ირთუდასუ,
სქანი აკანი გიჩქუდასუ,
ცოდა, მარდი ქორშუდასუ,
ვაგუზურდა ნტერსუ, ნანა!
სქანი ქიჸანაშ მარსხებელო,
სამარგალოშ მარგებელო
ირ დიდ საქმეშ განგებელო
სასახელოთ მირდი, ნანა.
ნანაია, ნანა სქუა,
ოცქვაფურსუ ირო ფთქუა
აშამჯანუქ მურიცხჯგუა
ბჟა დო თუთას გიგურუა
ნანაია, მარდუ ნანა...