ნანაშ ნინაში ბჟაში სინთე
დანიელ ფიფიაში გასაშინე
I
ეკი, ნუზ დო ფიჭვიშ ტყას,
ჭიფე შარა ეკოურც,
გიმე, ფერმორთელი, ხანგა,
გვალაშ წყარი მოსოფუნც.
კირდეს მუკობ სათოჲსერო,
წყარიშჲ დიდაშჲ თუმაცალჲ...
ღორონთჲ, ნირსეფჲ გოფაჩი დო
ჭახანჲ ჯინა ქუმაცალჲ.
უდუმარგებ, ჸალა წყარი
ფოთქვეფც მითოგვარგვალანც,
კირდე დოშქურნაფედჷ დო
მემიჩქჷნ-და ცანცალანც.
შარა ნოღვე წიმორთული,
მარა ღორონთქ გინატუ,
ჩხორო შქვილიშჲ გითნაულა,
აშო ნათილჲ დუმართუ.
მოურცჷ დო მიხვარჩალჷ,
ცირაშჲ ნერო იკიჩუ,
მიქ რე კოდმეს, ლებიცალო,
ცირილჲ ქვიშა ინურჩუნჲ.
ცაშჲ კიბულით გიმნაულა,
ტყალეფც ძიქვათ ქიმიდვანც,
რზენშა მასქურჲ მოჸუნცჷ დო
ირფელც გეგნოხიმინწანც.
გითოხუნას ჭყონიშჲ ჯინც,
მუთუნ ვაუჯგჷ თე აკანც,
დო ზარხულიშჲ თაკარჲ დღას,
ირჲ კოჩი შურს თაქ მაჸათანც.
ველუნცჷ დო ვარკალანც
ელჲ დო მოლჲ, გოქარგილი;
მინდორც ვარდეფჲ მუწოფორჩ,
პეულერჲ დო გოფაჩილი.
თოლიშჲ სინთე ქოიღუნ-და
ქჷდეკვირი ფართანც ჯგირო,
წყარჲ გვალაშე გიმნაულა,
ემერჲ, ხოლოს ირთუ ჟირო.
ართჲ წისქვილეფც ურთანცჷ დო
მაჟრა ტყალეფც გოჸუნცჷ, თევრე
წკონდა, ოკანკალაია,
კალმახეფიშჲ ოფუტე რე.
ჭარა ნოღვე ჭიჭე წყარცჷ
გასათხუარჲ ცირაცალ,
ჸოროფილშა ჭანაფილი,
მირულე დო მიხვანცალ.
თევრე, წენწყარც კათაფილი,
ხვამელჲ ორე სანთელით
დო ქახოლუ უჩა ზღვას
შხვაშჲ გვარი დო სახელით.
ორთა ირო მუშის ორთჷ...
ვექიმინე თიშ გინორთ...
მიქ ეიორზ ბჟა დო თუთა,
დღა დო სერი მიქ რე გორთ.
ორთაშჲ გურიშჲ ჭყოლოფათ
ვორდათ ოკო მარდიოლჲ,
მარა თენა იშენ ვა რე
კოჩიშჲ ხანდაშჲ მანგიორჲ.
ნაჩუქებუს ვეშულებჷ
გურჲ ბოლოშა გახარას,
მოხანდე რე ასქვამენც
სოფელც, ეაშჲ მახანას.
ეშმას მუთუნ ვაქიმინე
მუდგა გილებაწარას,
სოფელჲ გეჸუნც ირიათო
კალდუშჲ ბორჯიშჲ ნაჭარას.
ათაქ ოკო დებადუკო
კოჩქ, ღორონთშე გოტებულქ,
მარგალურ ნინაშჲ გეშა
"გურც გენია მონტებულქ."
მუჟამც შური ღიაბით
ხარგელი დო ეფშა რენჲ,
ჩქიმობურათ ვოცადუქ
ირფელჲ სქვამას გებჭარენჲ.
ღორონთი რე კოჩიშჲ გურც
ოგურუანც ჸოროფას,
ეშმაკჲ ოცადჷ ჩქინი რინა
აკობანძღას ჩხორო ფათ.
II
თე ქიანას ირფელჲ ურც
მუთუნ ვა რე უშარე,
მონტებული ვარკალანც,
შქირატილი უჩა რე.
ნამთინეშ დუც მიშაძჷნჲ
ურჩქინჯობაშ რჩქინა რე,
მაზაკვალიშ ნაღულოზა
ორთაშ გუნათინა რე.
თენა ახალჲ მუთუნ ვა რე,
აიშა ჸოფენჲ თინა რე,
საწმოხონოთ ჩუალირი
ჭკვერიშჲ დუნაჩინა რე.
III
კინ თი სოფელც დუართათ,
სოდეთ წყარეფჲ მოფუნდეს.
ჩქი ვორდითუ ობუჯის -
დანიელიშჲ ოფუტეს.
თი სქვამჲ ბოში გოხოლჷნა
დჷნაბადი უჩა დღაში,
დიდა-მუმა დოღურუნ დო
ნარდი ჸოფე უჩა დღაში.
ნანაშჲ ნინაშჲ მოჸოროფე,
დუცჷ თისუ გულუანც,
ლერსეფჲ ნოღვე სათოჲსერო,
ხე დო კუჩხი კილუანც.
მარგალურო დოუჭარუ
პოემა დო არიკეფჲ,
კოჩიშჲ გასაკვირი ორე
ჭკუა, თიში ნარიგეფჲ.
დანიელიშჲ ნაჭარას
ბჟა დო თუთა გაველანც,
ტყურათ ვა რე უძახჷნა
სამარგალოშჲ ფშაველას.
უბადო დღა იჸუაფჷ
ცას მუნაფა მილენცჷნი,
ეჩდობრუო წანერჲ ორდჷ
ჭოფესჷ დო ჸვილესჷნი.
IV
მუ დამარგენც ჸოროფას,
გურც წანობით ნაფულას,
მოკო ქუა მუნობდვენჲ
სქანჲ დინაფილ საფულას.
გილურქუ დო გილარგორუ,
მარა ვამიჩქ სო რექჷნჲ,
დუც სოდგაინ ქუმოძირა,
ბწანცუ ვადმაღორენქჷნჲ.
მიქ მუგოსქიდ ოჸვილარო,
მიქ რე ტყვია გოჸოთჷნჲ,
კოჩი მორიალე ორე
გურიშჲ სინთე ოკორდჷნჲ.
ვადოშქურდა ჩქიმი ჯიმა,
ჩხანას გეითუსინთუაფ,
სამარგალოს სქან გოშინა
ირიათო იჸუაფ.