ნარტება ბაზალეთური
ბაზალეთიშ ხვილირს ინე
ორქო გითოონწენსია,
დო წყარ თუდო, მუკმუკილო,
უცხო ბაღი ხარენსია,
მიორს ვანოხუმაფუე,
ირო წვანეთ ბაღენსია,
ქიანაში ბორჯბარბალი
აფ-ვაფ, ვამორჩილენსია,,
თიშ წვანეშა ვაცილებე
ჩხურუს, ვართი სინჩხესია,
დო თის ბჟალამ ოროეფით
ირო მოაფუნენსია.
ბაღიშ ოშქეგურონასი
ეთი ონწე უფლენსია,
კოჩთაგანეფს თექ დინულა -
ოკონ, ვაგაბედნესია.
სირინოზეფქ, ანაწერო
ონწეს ქუგაჯგუფესია
გამენცარნა, გაჸოროფნა,
რჩქილა ობირეშეფსია.
ისმე: თამარ ნანათფალიშ
ხეშე დინოონწესია,
დო ერქ ნუში ჩილამურით
ხვილირ ქუჸუ, ქუცესია.
ონწეს მუჭო თქუანდესუ,
ეშ მი აშაკვაკვესია?
ვარა თეზმა ნანგარაწყუს
თექ მუს მუნაბუნდესია?
ონწეს თინა ვაშაკვაკედას
უფულნანი სახელსია,
მისუთ ამდღა დო ამსერი
თური ჩქინი ნარტენსია?
თაშ ქორენდა, ნოტე ეთი
ბოშ კოს, მოგერგეზესია,
ხომ თიში ხე მიათხუმუ
პირველო თი ონწესია,
თაშ ქორედა, ნოტე დიას,
მით თის გაუდიენსია,
დო პირველო მიენდებუ
მარდმე ძუძუს მობჟესია.