ორთაშენ რაგადელი

- ქესურ გოლათეფს დო ქემიარჩქილ თინეფიშ ფურცქინუას, ორთაშ რჩქალი ქენიჟვარჟვალუ სქანს, მუჭო ჩხორიეფიშ სიმსიეფ ჯასჷნ, ბორიეფ ქენოიბარანა დორხველ სიეღებეს დო ვალ დო გურგინეფ სახათის მუნეფიშისი, მოჸუნელ ნარღი დო მერაყი ქოგგაკირტონუ დამორჩილიშ ფურცელეფცალო.-ჯონ მიური

- წყარიშნეთო რდა ღვაღვა ხოლო დო ყილიმი, რდა ჭე გვარიანო ღვაღვა, მუდა ათხოზე ორთაშ ნოქურეფს, დო ჭე გვარიანო ყილიმი, მუდა გეთანდე დო დოთირუე აკარენი.-ბრენდა პეტერსონი

- ორთა ვარე რჩქვანილი გეჯორჯინს წუმოძინას დო მაღალო ეკინასი დო ირნერ უდუქანცუობას საჯებას უწესენს.-გოეთე

- ირ პეული შურიე ორთას მოპეულე.-ჟერარ დე ნერვალი

- მუჟამს ორთას მუთუნ აფუ ოქიმინალი, თინა ქოხანს გენიას ათეშ ოქიმინალო.-რალფ ემერსონი

- ორთაშ გალენ ხოლო ორთაშიერიე, ოღონდა დიო უშუჩინებუ-ჰერბეტ ჰაბარდი

- რინაშ სასვება გაარგამებეფ თაქიე სქან მიკ-მიკ: ნქალუა სქან პინჩეფს, სინთე სქან თოლეფს, პეულეფ სქან ოკუჩხალეს, საღალე სქან ხეს, თიაშ გობაწარელი სქან წოხლე. იმწკილა ვაუფაცხუა მურიცხეფს, ინა ვარ, ქიმინი სქან ოქიმინალი თი რწუმათ, ნამდა რინას უჰამაშიე ირ ღორონთიშ დღაშ საქვარი დო ირ ღორონთიშ დღაშ ქობალი.-რობერტ ლუის სტივენსონი

- მენდი ორთაშ პიჯმოსა რე yოფირებაშ სიტალიკეშ ოფორალი.-ალფრედ ნობელი

- არძას გურჷშა მეუღუ გუშაშ მარცხი, მარა ხვალე დიდ შურიშ დო დიდ ზნეშ ადამიერს შეულებუ გურჷშა მიღას გუშაშ წუმოძინა.-ოსკარ უაილდი

- ორთა ხვალეხობაშა ვენჭუაფუ დო ხუჯიშ დოკინაშა რე მერინელი დო თე ხუჯიშ დოკინა არძაშე უჯგუშო გუშობათ გიმიხანტუ.-მარკუს ტულიუს ციცერონი

- მუთ უმოსო ბრჩუნთ ორთასჷნ, თით უმოსო ირკენს ჩქინ სხვენა, სონდარო ვადმოსქიდუნა აკახვალე-ლიმა გინოსქილადაშენ.-მორის იუდოლი

- ეშაჩინებაშ დო შურჷშა ინულაშ ხიოლი ორთაშ უსქვამაშ მენძულიე.-ალბერტ აინშტაინი

- მუთ უმოსო ვეთხიებუთ ორთასჷნ, თით უმოსო ბედუდურო ვიგინანთ დუდჷს.-უჩინებუ

- კოჩეფიშ გუმარჩქინე სხუნუს შეულებუ ცოდილიანობაშ გუმორჩქინა, ორთაშ კალონეფჷშა ხოლო თხუალა-ზნახი ვაჭკირუნს.-არტურ კლარკი

- მუჟამს გოლა დო კოჩი ართიანს ათმახვადუნან, თექ მუდგაინ დიდ ანბეეფ მოთმოხვადუ.-უილიამ ბლეიქი

- პირელი ირფელს სიბოშეშ შურით გოთმაფშანს.-უილიამ შექსპირი

- მით დიადიხაშ სისქვამაშ ქეშისმენსჷნ, დიმუხტუ სახათით, ნამუთ ნთელ რინას ქაჸუნუ.-რაშლ ქარსონი

- აფუნს შეულებუ გეგობირუასი, გოკონდა მაგუია ლაფით გიღუდას გოფშან.-დუგ ლარსონი

- მაქერეთუთაშ სერს ნინა ქუღუდასი, რომანსიშ გოჭყაფას დიპეღუანდუ.-ბერნ უილიამსი

- დამორჩილ მაჟია აფუნიე, მუჟამს ირ ფურცელ პეულო გინმირთუ.-ალბერ კამიუ

- დიადიხას ხეს შეუფაჩუნთ სისქვამაშ დო ხიოლიშ გოჭყაფასჷნდა, საბოლათ თინა ვართ ოჩამალ-ოდიარაფალს გოჭყანს.-ჯოზეფ ვუდკრუჩი

- დალიას თის ქამკიბჩუანთ, მუთ მიჸორან, მეჸოროფებუნა თინა, მუთ მარჩქილენა დო გებგენთ თის, მუთ დომოგურუესჷნ.-ბაბა დაიუმი

- ორთაშ ამანა მათხილარ თინა რე, მით მეთმეხვადუ, ნამდა თე ქიანა ბაბაჩიეფჷქ ვაგნობჩესჷნ, ინა ვარ, სქუალეფჷშე მიღუნა ნოთხირი.-ჯონ ოდობონი

- ჩიტიშ კოჩჷშე არძაშე უმოს გინორთ თინა რე, ნამდა თის უღუ ჭყანა-გეიოგას თეშ, დაკილება ვამეჩას გაჯინუსჷნ.-რობერტ ლინდი

- ჩქინ პლანეტაშ გინძე რზას ბიზნესიშ ემაკოროცხალეფ ვარი, ეკოლოგეფ დოწვაწუნა ნაბოლუ მეკაკუას.-სტიუარტ იუდოლი

- ჩქი აკმობჩალიგანთ დიადიხას, მუდა დუდო ჩქინ დორხველო მეთმიბრჩქინანთ, მარა თის საოშოშ მაკათურიშ თოლით მიკვოჯინეთჷდა, უმოს მეტ yოროფათ დო სეფაფით ქომობთხუნთ ხეს.-ალდო ლეოპოლდი

- მუჟამს ორთას მუთუნს მიკურაჸუანქჷნ, ქიგინანქ, ნამდა თინა ნთელ მუკნასქილედ აკარენიშ გალიღალება რე.-ჯონ მიური

- თაიშახ ადამიერ ორთაშ უკნუ ღალენდუ, ანწჷ ხოლო დორხველ ორთაშ უკნუ გეიყარებუ.-დენის გაბორი

- პეიზაჟის, თიშ ირწამიერ რსიოლიშ გურჷშენ, მა ვავაზნობიერენქ მუჭო მუშ ნებაშა თებულ მუთუნს; მარა განმიკჷრინელი ატმოსფერო-დუდობაშე მართუაფუ სინთე დო ჰავა-შურს დინუდგუნს თის დო მემოჩქუ, ნამდა ხვალე თინა არძენს მეკონეფს მუნეფიშ ამანა ღირებას.-კლოდ მონე

- ორთას საონჯღორო ვაუჩქუ მუთუნ, კოჩჷ იგონენს თეჯგუარეფს.-მარკ ტვენი

- ჸოფუ შანგელეფიშ მახ გიშაკერზაფილ გუმაკეკინალობას ორჩქინანს.-ჯონ ჰალდანი

- ჩქი ვორეთ ურწუმ აკარენიშ ურწუმ გუმორჩქინა.-რეი ბრედბერი

- ბწანს, ნამდა ოდიარეშ ჭიჭე ღერი მანგ რე მურიცხეფიშ გილულაში.-უოლტ უიტმენი

- მურუჟამიე, ჩინებულენს დო ვარ გონი ხანგირძე yოფირებაშ მაგურ ღირებას-სტივენ ჰოკინგი

- რჯერდან, ნამდა ართჷარსიმო მორხინილ მანოღიეფიშ ჭიჭე გუას შეულებუ დოთირუას თე ქიანა.-მარგარეტ მიიდი

- უშქურიშ ღვეზილიშ ჭუალას წიმჷ აკარენიშ გოჭყაფა ოკო ქაწუჯღონე.-კარლ საგანი

- ევოლუციაშ ამანი თი მეგუნდუეფს მიშაძუ, ნამუეფით ურწუმ ანახეფიშ ნარზა რე.-სტივენ გოულდი

- წყარი ორთაშ ემაყარებელ სახათიე-ლეონარდო და ვინჩი

- ბჟა, მუშ მიკ-მიკ მართუაფუ დო მესვასვილ თესხი პლანეტათჷნ, ჸურძენიშ წონწოლიშ მონდინაფას ხოლო მოთმიხუჯანს, ოკონდა თეშმაშვხვა აკარენს მეტ საქვარ ვაუძირუდკონი.-გალილეო გალილეი

- თაქ დიხა თიჯგუარ ჯგირ დო ჯამიერიე, ნამდა ბერგით ქათუხიცინუანქჷდა, მუნაწიათ ქომგოძიცანს.-დუგლას ჯეროლდი

- ზვე რე გეჩანელი, ნამუშ ჯგირ დო ფური დიო ხოლო ვაშემჩინებუნა.-რალფ ემერსონი

- არძაშე უმოს ჩიჟიერ აზარტულ ლაჸაფჷშოთ გესახვილაფე რე ფიარ დო პეულიშ თასი.-დენ ბენეტი

- გოშილუა უთარაშიე. ატამა მუდგაინ ბორჯის კოლო ნუში რდუ, პეულამ ლუყუ ხოლო საია ლუყუ კოლეჯიშ განათებათი.-მარკ ტვენი

- ორთა ქიმაჟირებუდა, ენა აკოხვალამა ვარი, „ბისჷშა“ გიშულა უმოსო რე.-გილბერტ ჩესტერტონი

- ქოთომ მარქვალიშ მახუჯაფალიე მაჟია მარქვალიშ გაჭყაფალო.-სამუელ ბატლერი

- თირს ართ ჯგირობუა ხოლო გააჩქუ-თიშ დადარებათ სქან ნორდი კინ ჯგირო ირწყებე, მუჭო მონდაბეშჷნ.-ჯვეშებურ ნარაგადუ

- ჯოღორ თიშენ ეშმურს სქან ონჯირუშა, ნამდა უჸორქჷნ, ციბა თიშენ, ნამდა სქან ონჯირუ უჸორს.-ალიშა ევერეტი

- კოსმიურ არზენა ვართ ეფერ მიკე რე. სქან ქვარქვანტ ვერტიკალურ ულას შილებუანსჷდა, ართ ბჟამჷშოთ თექ რექ.-ფრედ ჰოილი

- ციბას შეულებუ სასვება გუშა რდას კოჩიში, მარა დღას ვეირდენს დუდჷს თეშ ჩინებათ.-დუგ ლარსონი

- გუშაქ ორთაშ შედევრო ოკო იკოროცხასი.-რალფ ემერსონი

- ორთა მუნაფაცალო ითირუ,-ირო შხვანერიე.-რალფ ემერსონი

- ორთაშ გოჭყაფილი პიტალ შედევრიე ხელუანობაშ გოჭყაფილეფიშ შქას.-რალფ ემერსონი

- ტომბას ქედნანჭი მეკონეფიშ ორთაშ ტიბინს, დიგურე ორთაშე.-უილიამ უორდსუორთი

- ირმუთუნ თია რე ართ ირჷდუმანტირეში, ნამუშ რსხულ ხოლო ორთა რე დო შური-ღორონთი.-ალექსანდრ პოპი

- კალონეფ ორთაში წკვარამელ რდუ: დო თქუ ღორონთჷქ-„იჸუას ნიუტონჷქ“დო გესინთორუ არძაქ.-ალექსანდრ პოპი

- ორთაშ არძა თია თელას ინტირინუანს თიშ სახათის, ირმუთუნ ართ მაშუში მოღეშე რე ქიმინელი.-რალფ ემერსონი

- ხელუანობა იჭყაფუ თექ, სოდეთ ორთა ითებუნ.-მარკ შაგალი

- სისქვამე ორთასიე დო ანდანერო ეთმისახუ რეალობას, მარა ართჷშახ ხოლო ქორჩქინდუ, ნამდა თინა ხელუანობაშ დორხველიე, უმოს აიწორო-ხელუანიში, ნამუქ ქემიოგორუ თისჷნ.-გუსტავ კურბე

- ვართ ხვალე ღილე რე ორთა, ინა შურიშ თოლით უძირაფუ ამნახანტეფს ხოლო ინტირინუანს.-ედუარდ მუნქი

- აკახვალე ორსანტ გექშაგორი-ორთა.-რემბრანტი

- ფერჭარუა ორთაშ მოთა რე. თენა ღორონთწკილა რე მებუნაფილი.-რემბრანტი

- ბაღის, ჯალეფშქას, ირო მუსიკა ისიმუ, ოღონდა ხვალე თუნა გურს შეულებუ თიშ მორჩქილა.-მინი ომონირი

- ბოლოს საოშო ხვალე თით ველოგინუებუ, მუ გოჭყუნ, ინა ვარ თით, მუშ ჩალიგუაშენ თქუ ვარიან.-ჯონ სოუჰილი

- გოგმორთით უგამაგეთ მიშართუაფილ ნოთეეფ დო მორუმილ ჸუდეს მოგარჩქილენა წყარმალუეფიშ მარდიელ ფურცქინი.-კლერ კრიკი

- ორთაშ კითოკა გაარგამებას რე მუდგაინ გასაჩემე.-არისტოტელე

- ადამიერი ირსხუაფუ თი გინნაჭყვიდუეფით, ნამუეფით მუშ აკანს ორსხუანა.-რენე დიუბო

- ორთა დასაბაღუე; ოღონდას კოჩჷქ დო ვარ ოსურჷქ ოკო შილებუას დონჭაფა დო გაშელება თიშ დოზუკოლუეფიში.-ანტუანეტ ბლექველი

- უნაკაში ფაქტი კოსმიურ ხვამარდ „დიადიხაშ“ გურჷშენ თინა რე, ნამდა თის რთაფაშ ინსტრუქცია ვამოჸუნაფუ.-ბ. ფულერი

- ქედიგურე ორთა, გიორდას ორთა, რდა ორთაწკილა ირო ხოლოს დო თინა დღას ვაგგაბუსთენს.-ფრენკ ლოიდ რაიტი

- ორთას ირმუთუნ მუშ იდეალურ ტიბინით ლირიკულიე, მუშ ბედით ტრაღიკული დო მუშ რინათ კომიკური.-გ, სანტაიანა

- ჩქიმოთ ფიფეფიშ დო ვარ ოდიარეშ ფომფია ხალი არძაშე ფაღური სპარსულ ხალჷშე უმოს კორნებულიე.-ჰელენ კელერი

- ვართ საოშო მაჸვენუნა, აკანს დობრანგუნთჷდა.-მარგარეტ მიდი

- რინაშ ეიონწყუმუ ორთაწკილა ჰოიათ რინა რე.-ძენონი

- კოჩ არძა დღაშ გვერდის ტყაშ რინას დო თიშ დოლოღობუას გოჩხვარუნსჷნ, ტყაშმარშვინეშ ჯოხობუს დიჭყანუანს, მარა თინა, მუჭო საქვაროსანი, გოჭვარუნს ტყას დო გატუტელენს დიხასჷნ, ხვამარდ დო მახერეჭე მანოღიეთ იკოროცხუ.-ჰენრი ტორეო

- ზვე მარშიმედვალირ პეულიე.-ჯეიმს ლოუელი

- ორთა უმოსო გოგურუანს, ვანდარო გაზუკოლენსჷნ. ქუალეფს გილაქადაგის ნუ გორუნქ. თინეფჷშე ხათე მუკნატყვაცას მიღენქ, ვანდარო მორალს.-ჯონ ბაროსი

გინამარგალუ გიორგი სახოკიაქ