სამარგალოს (გულნარა ყოლბაია)
არწოქ ჯგირი სიტყვა თქუას,
მა სი ქორთხინქ, სამარგალო,
ქიმეუფერე სქანი სკუას,
ქიმეუფერე დიდიცალო.
გჷნმაზარენქ შორ შარაშა,
დოფხვადუქი ჸოროფათი,
ჩქიმ ვალი რე ღურა დღაშა
სამარგალოს ქოფცე პატი.
ოღონც, მა სი ვადმოკორდა,
სქანო მინჯანს თოლ ცაშფერი,
სამარგალო, ხვამილ ორდა,
ირო ქორდა ბედინერი.
მუშო მოკო თეცალ რინა,
მუჟამს ვახიოლენს გური.
მუჟამს ვამარჩქილე ნინა,
ნინა, გემუან, მარგალური.
სქან წესეფიშ, ობირაშიშ
მოჸოროფე ვორექ ირო,
სქან შარეფიშ, სქან გვალეფიშ
ტიბ ხელეფიშ გოლუაფირო.