სამურაიშ გაღიერობა
იაპონიას, ართ–ართ ოფუტეს ოხორანდჷ ართი რჩინუ სამურაი. თის მიარე მოგურაფე ჸუნდჷ დო უმენტაშ ხანი თინეფიშ წვართუას მუკმოჸუნდჷ.
ართშა, ვარჯიშუაშ ბორჯის, თიშა ქიმერთჷ ახალმორდუ მალიმორქ, ნამუთ გიშაკერძაფილ ჯუმიკობათ დო კონწარალათ რდუ ჩინებულ თი განს.
თიშ ოჸოროფულ მეთოდი რდჷ აწმარენჯიშ ნერვეფშა ლაჸაფი. თეთ ჭკუაშე გინმოჸუნდჷ კოჩი. ე ეკონია ხოლო გარღვინჯებულო გიშმეჭანუანდჷ უკულ თის ჩხუპშა, მარა გაჸალებაშ გეშა დაჸვერებული რდჷნ, ჩილათას ჩილათა მოჸუნდჷ დო აგენდჷ.
ასე ახალმორდუ მალიმორქ ათე რჩინუ სამურაიშ გეძიცა დო ლანძღუა-გორაფა ქოდიჭყჷ. ოფურტინანდჷ თიშჸურე, უშურგურეს დო ლალას უძახუდჷ, მარა ბადიდი თეს გურს ვაუჩანდჷ შურო დო რჩქალას აგინძორენდჷ მოგურაფეეფწკუმა ვარჯიშის. მუთ იჸუნ, ახალმორდუქ ქომეხვადჷ, ნამდა მუთუნ ვაგშალედჷნ დო გურმულირო ქოდიტუ თექიანობა.
მოგურაფეეფს უკვენდეს, ბადიდიქ ათეზჷმა ლანძღუა მინჭირინუნ დო კითხეს თის:
– მუშენ ვეგშიჭანეთ ჩხუპშა ათე ნირგა კოჩი? მარცხებაშა გაშქურინესო?
რჩინუ სამურაიქ ართ მერქას გური გოუჩუ ორაგადეს დო უკულ კითხირით უგამჷ თინეფს:
– თქვა ძღვინს ქუმოიღანა დო თის ვეჭოფუნთინ, თიმწკუმა მის დასქიდუ თი ძღვინი?
– მუშო ოკო რაგადი, თის მიქით მიღუნ, შხვას ვამეჩუ-და, – უგამეს მოგურაფეეფქ.
– თაშ რე ლანძღუა დო გორაფაშ, ნჯარიშ, რღვინჯიშ დო ჯოგინიშ შვანსით. სონდარო თქვა თის ვეჭოფუნთ თქვან დუდშან, თენა ირფელი სქიდუ თიწკუმა, მიქით თინეფი მიღუნ.