უდაჩხირე ჩხანა
მანგარ ჸოფექ სი, ჩქიმ გური, -
ქუმუცალო ვაკიფაჩინ,
შური, მარდის მუგოშინანს,
ვაგმეხანგ დო ვაგნიფაჩინ.
ათე ქანას, კვარკვალიას,
უჩა ფერიშ ბადე გარტყუ,
კოჩიშ შურიშ გაჯგირებას
საწჷმოხონო მუთუნ ვატყუ.
ვავა, ჩქიმი ოცნებეფიშ
ჩხანათ ეფშა ბაღიშ ცოდა,
დოხუმაფე არძო პეულჲ,
სქვამ დღაშ იმენდი, - ჯგირო ორდა!
დიდ ჸოროფა, ოხვამე რე
ამდღარ უკულ სქანი ბინა,
უდუდალეს იას, კჷდჷრს
ვარდიშ შქართუნს ქინგოფინა.
თი სათოლე, აბა, სო რე,
თი სათოლე, ქომწით, ნამ რდინ,
ჩე დო უჩა ათე ქანას
ხანჭურიათ მოძირანდინ.
სერეფს დღალეფი ოკირანს დო
ქჷმაჸუნუ წანას - წანა,
მუშოთ მოკო უდაჩხირე
კილაბდასჷნ ცას ჟი ჩხანა.