ფურინელი დღალეფი
ეჯღუნებჷ ჩქიმ კახათარ დადის - მარგოს დიდ ჸოროფათ
•
ოფუტეშ ნარდი კოჩი ართჰალამო დიდი ნოღას ქომოხვადჷნ, ჩხოუშ ტიშ კითეფშე მიკოტყაბარელ გინს აგურუ ხათე უჸვაიჭარე. ხოლო უფურაში, ხვალახე რინაშა უმურჩქვანუ, ნანაშ დო ბაბაშ გოკილოთინ-გოსოფინს გამახორცქუ დო მუში დუდიშ პატჷნო დო მინჯეთ ხვალე მუ გინირთჷნ-და.
ქართიშე ზუგდიდიშა მიფშინი, მახინწალიშ ოსინთეშე გითმიბჯინედი მოგოთანებორჯის დო ნოღაშ გოხიკინაფილ კიდალეფიშ დო ნოდგჷმეფიშ მარობათ, მინშა თუთობათ ჯინაშ უკული წვანეს მიშახუნელ ანი დო განიშ ჯინა მერეთო ინმაკათუუდჷ გურშა. ჸუდეშა მოულირი, ბოროიაცალო ოთხირეს გილებგაგუდი ხვალე დო თხირიშ წვანე ფურცელეფს ვოხუტოლუდი შურხირილო. სინჩხეათოკათაფილ ცხენცალო აშიბკერკელუდი დოლოს დო უკული ცაშ ჯღარი ოფირჩას ელმუოჯინედი მიარე ხანს. მუშ მასკვამა ქორდჷ ირფელი...
ბაღანობა დადი დო ბაბუწკჷმა, უმენტაშო კახათის მუკომიჸონაფჷ. მუაჩქიმიშ ოფუტეს - ხიბლასჷთ ვართ ფერი ვანაფერო ვოსურუდი.
ხიბლარი დადიშ, ხვალე თენა კილმანათუნს ასე ჩქიმი შვენაშ ტომბაშე აკა წუნიშ კადრიცალო - ტაბაკიშა მუკოდგუმილ სუნელეფიშ ოკაკალ მანქანას მუკოვურედი დო ითამუ მუთუნიშ მოღე ვორდიკონ ეფერო, ხეშ მიოთხუმალს ვურთანდი მუნდუკურთე ჩქიჩქუ, მუ შვანსით დადი მუში მარწკინაია, ორქოშ კიბირეფშე გაკილასვასვალანდჷ ჰამაჸოროფიანო - „სქანი კაჯეფიშ გოლუაფიროვა, ბები“ დო მა ხათე ნანაშა ქომიბრულედი თეშ ოთხობელუშა - ნანა, დადიქ „სქანი კაჯიშ გოლუაფიროვა, მიწუ!“ ნანაჩქიმი ხოლო ითამუ ლახუნდჷ უკული ბებიას დო მა ბღურუდი ძიცას ხიოლით. 3 წანერი ვორდი ხიბლარი მარგო ბებიაქ ღურუნ დო ათეშენ შხვა მუთა ფშჷ თიშე.
ვართ თექიან ბაბუშე ფშჷ ბრელი მუთუნი. ჭე კონწარი ხასიათიშ ქორდჷკო ოკო მემიჩქუნ. არძაშე უჯგუშო თინა ფშჷ ასე, ბიგათ მობთხოზუდჷ ოლახარონ. ონტკაშ ეჩლიტრიან ბოთილი ტვერქუმუო ქუდუვორღვი ფხაკინ დო გეჸალჷ კოჩიქ - ასე გოძირანქია სქანი თოისერს დო გამუმადვჷ. ჩქიმი როგუნჯი ჯიმადისქუაქჷთ თის ქალუდირთჷ ხათე დო გამუმათხოზეს წორო. გეშაფსოფი ჸუდეშ მაჟირა სართილშა დო ონჯირეეფიშ თუდო მითიბლი უგაღე ჩქიჩქუქ. ბაბუ დო მოთაქ გოუკინეს შკაშა ონჯირეს დო თექ ქომითმოჭოფეს მა ცოდა. ართი, ჟირი ქოგინომიჸუნესკონ ოკო ოჭიშის, მუჭოთ ფშუნ და ვენტი უკული...
გინაბუნუშა გილეფშით ღალიშან, თენა ჯგირო ფშჷ, ჩქიმი ჯიმადისქუალეფწკჷმა ართო. ქოგივოლუდით დიკი, ფერდიას დო ტყაშა მითიბლენდით. ღალი მიიშჷ, ართო ქუაჯგურა. სოდგა იჸინ, გეტომბია დო ფოთქვამ წყარს გაკილაბგორუნდით, ნთხორილს ქალუჸუნუანდით ძგას ორცაშე, მიშმალი წყარს დუდის გამუხვილუნდით დო ი წყარი განით, თე ნანთოხორათ ალმულუანდჷ უკული თი გეხვილირს, ნამუთ ოკო გინუვობითკონ. ამუდღა გეგნუვობუნდით ალბეთ ართი, ხუთი დო ხოლო უმოსი ტონა წყარს.
თქვანი თოლიშა მიძირაფუდჷკო თი ხიოლი, ნამუთ ჩქინ გურეფს მუთმაკათუდჷ, მუჟამცჷთ ქობძირუნდით, ნამუდა წყარი ონდეთ გედგუდჷ დო უკული თექ გვართა-გვართათ ქვერსემი ჩხომეფი დო კიბოიეფი გელაჸაფენდესინ. გეფსხაპუნდით ხიოლიშ გეშა. გეშაბჭოფუნდით თექ მუთ ინოხედჷნ დო უკული ხელეფს გოვუტენდით ფოთქვიშ ტომბაშა, სოჸურეშეთ ანაყუ კიბოიეფი გითმოპუნდეს უკული. მინშა თიში მადიდეფი ხოლო გაგითმაჸუნუდეს, ნამუდა თინეფიშ ვერწემი, მარგატელიშნერი ხეშ ნაჩამინაშ გეშა, ჩქინი რკიაფიშ ხონარი ედომუშამ ტყას გინოძუდჷ უკული.
გინობუნაშ უკული ქუა-ქუას ქეკუვაჸუნუდით ეკი-ეკი დო ქუალეფს მინმუორთინუანდით, ნამუნეფშეთ უმენტაშობას ღაჭაჭიეფი ათუხედჷ თუდო დო მებკოროფუნდით ვიშო-ვიშო. არძაშ უკულაში, ართი ნიგაშ ეფშა კიბოიეფი, ჩხომეფი დო ღაჭაჭიეფით ხარგელეფი, გურხიოლებურო ეკმიფშით დიო ობონუშა - ოხარჩალაიას ვუძახუდითინ ეთექ დო გოჸინილი წყარს ათოვუხედით ჩხურუშ ეჸოთამაშახ, მუდგაშ უკულით ჸუდეშა მიმნჭუაფუდით, უკვე აკმისერუდჷნ ეფერი ბორჯის.
თუთუმიშ გემო ხოლო თაქ იბწისე მაართათ. ქომივოკირანდით ქარღადიას თუთუმს დო ვუპაპუანდით უკული მაკეთებელცალო. ქიგმოჭოფეს თის ართიშა დო ქოთ ქიგმობახეს ჩქიმი უკულაშ ჯიმაშ ჭყოლოფუათ, - "ჯვებე ბიძია, ჯვებე ბიძია, უჯინი, პაპროზის შუნანია!" ივაბრით ჩქი მარა, იქ ხათე გინაჭვი გეშაჩაკალაფუ დიხაშე, ნამუთ ჩქი კუჩხით ენუვოფულით შურ-შურაიათინ, მუდგასჷთ ჭიფე ჭინუქ დო მუში ჯგირობუაქ ხოლო ქომაჸუნჷ უკული ქოთ.
წენწყარი ჭე მოჩილათირო ქორდჷ ჸუდეშე, მარა მინშა თექით მიდამიჸონანდეს ბიძია მუში მოტოროლიათ. წკონდა, რგილი წყარს ალახუნა, ლაიტიშ ეკოჭუაფა თექ დო ჭკომუა, ქვერსემი ხიოლი რდჷ ჩქინო.
დასურო ჯგირი რდჷ ხიბლა. მერეთი ჰეერი დო ორთა რდჷ თაქ. ეკოფერდიას ამადგუდჷ ჩქიმი ჯიმადიშ ჸუდე დო ხუთ კითშორო მორჩქუდჷ თავრეშე წენწყარი, ოფუტე კირცხი, საჯიჯაო, ახალი ხიბლა...
სერით, გალე, ხვალე გაგიმოპტყობუნდი დო ქიანაშ ხანს მურიცხეფს ელმუოჯინედი... თაქ არძაშ უმოს ხოლოს ვორდი თინეფწკჷმა...
•
მარა, გიშაკერზაფილო იშენით კახათი მიჸორდჷ მა, სოდეთ ფაქტიურო იბრდი დო ბაღანაობაშ უმენტაშ ხანი მიკიპონინ...
ჩქიმი კახათარ ბების ხოლო მარგო ჯოხოდჷ. შელორსა უჩქუდჷ მერმენწა. ოფუტეშ მახორუეფი შელორსაშ გურშენ ირო ბებიშა გილეშეს. მინი აჭყვადილიშე რდჷ აჭიროთებული, მინს ხოლო ბაღანა მოჸუნდჷ - ჟამილი ოკო მაფუდასია მარგო ჩქიჩქუ სქანი გოლუაფირო დო მიმეხვარია სი ღურელი. ჩქიმი ბების ხოლო, თენერი შვანს მუთუნ დიდი ფარას უგანა დო ხიოლს ღურუ კოჩი უკულინ ეფერო, გუბჟათუნდჷ ხათე პიჯი - კოჩიშ სუმარუა უჸორდჷ ჭკუაშ გინაულარო დო მუთუნ ჯგირი ქაქიმინედჷ მითინშა-და, თენა თიშო ჩხონაფა რდჷ გვალო.
ძალამო მოინტერესუდჷ დო ათეშენ მინშა, ბები თე შელორსეფს მა ხოლო მოგურუანდჷ. ქოდიბგურე „შურდინაფილიშ ნაჩამინაშ“ შელორსა, „ნაშურიშ“, „მორიალეშ ნაჩამინაშ“, „ნაჟამაშ“, მის უჩქჷ მუდან...
ნაჟამაშ ხვამა ვამიჸორდჷ მა იშენ-შენი, მუჭოდგიათ თინა ითებუდჷნ თიშ გეშა. თე ხვამა ათენერი რდჷ:
"ათე ბაღანა ნაჟამა რე,
ოჭმარეში რენო,
ონდღეში რენო,
ონჯუაში რენო,
თუთაშხაში რენო,
თახაშხაში რენო,
ჯუმაშხაში რენო,
ცაშხაში რენო,
ობიშხაში რენო,
შურიშხაში რენო,
ჟაშხაში რენო,
ედგინაში რენო,
დოხუნაში რენო,
მიკორთაში რენო,
მუკორთაში რენო,
ჩქიმ ბაღანას დეთხი დო
შხვაშ ბაღანაშა მეუ..."
ხეშა ტუტა აშუძუდჷ, კარიჸურე მიკირთუდჷ ოჭიშით დო ხეთ ტუტას კარს ქომიკარღვანდჷ ძალიორო. ტუტა კარს ქომიკოსქიდუდჷ-და, ბაღანა ნაჟამა ჸოფერედჷ დო ხოლო ჟირშა გაგთუხვამანდჷ თის კინი თენერო.
თე პროცესიშ ბორჯის ბების ნოჸორი ქირონუათ აკმაჭკადუდჷ დო მუთ უმოსის გოქირონუნდჷნ, თქუანდჷ, "დიდუია, მუში მანწარა ჟამილი ქოჸოფენია ნანა, ჩქიჩქუ."
ბების ართიშა ვუწი: ბები, შხვაშ ბაღანაშა მუშენ უტენქ თე ნაჟამას, შხვაშ ბაღანა ცოდა ვარენო მაქ. ჩქიმი ბებიქ ონჯღორუანო დო დიდი მუდგარენი დუშებუდჷკონ ეფერო ქენმოჯინჷ თოლეფს დო მიწუ:
"მუ ბქიმინა ბებიქ ქუგგალუნ, თენერი რე თე ხვამა."
მა ვუწი, „შხვაშ ბაღანაშ“ გამათ „ცაშა მეუ“ ქოთქვი დო ცაშა გოუტე მაქ, მითინს ვენასჷნ ეფერო.
თიშ უკული ბების თე ლახალა „შხვაშ ბაღანაშა“ ვა გოუტებჷ, ირო „ცაშა მეუა“, თქუანდჷ დო მიდგასჷთ ულორსენდჷნ, ით ხოლო უჯგუშო სქიდუდჷ მუში ჭიროთიშე, მა მუჭოთ თეს ვორწყედინ.
ჯგირო ფშჷ, ჭიჭე ვორდი დო მეძობელ კოჩიქ, ნოშქერქილიაშ მაუჩაქ, კარს ქოდიძახჷ დო ეზოშა მუნილჷ. ჭიჭე ცირა ალათხოზუდჷ ხასჷლას - გვალო მუამუშიშ ამნახანტი - უჩა, თოისერი. ქუგმაშინჷ უნელო, თე ბაღანა არკვანს ენოჯანუდჷნ თიწკჷმა, დახე ვარა ნაშქვიდეფჷ მაფუდჷნ დო ქელმაძიცინჷ. მორო მუ მიჩქუდჷ, მა ხოლო გვალო ჩქიჩქუს - პიჯის უხუჭუანდჷნ, შქირენს მაქ დო ნოჸორი ქობალით გოვუკასი. შურს მაჭიშეს დო ძიუთ ირსხეს ლილი ჩქიჩქუ შქვიდაშე. მუშო ოკო რაგადი, მა უჸვაიჭარე, პაღურით გეგნობრაჸეს მუნეფიშ ჸუდეშე...
ალბეთ ნაჟამაშ შელორსა ოკო თხუას მაქ ბების, მიღუდჷ გურს მა, მუნორთესჷნ. უკული, დევეკვირი დო გური გოვუჩინი, წყარი ვა გურს - კისერი აფჷ აჭყვადილი მაქ, - იფირფქი ჩქიმო. გოჸინილი ჩხომიცალო აფუდჷ დუდი გესქანჩილი ჸალშა დო ხვალე კუჩხეფი რდჷ თინა, ნამუთ თის გოჩინებაფუანდჷ, ნამუდა შურო შური უდგუდჷნ.
- მარგო ბიცო, სქანი ხეშ გოლუაფირო, მირსხი აკა ათე აჭყვადილიშე, - ჭყვადილი თეშ მომგონუ ღორონთინ, ამარი-ამარი შურქ გეშმოლასჷნ ქიჸი დიდაშ მაჸვილარი, ქომიოწკუმინჷ.
- ხელათ ნანა, სქანი გოლუაფირო, ხელათ ჩაგითხინუანქ ჭუას, უწუ ბებიქ, ოპერაციაშო გახაზირებული, ონჯირეშა გილანჯირაფილ პაციენტის უწინს ექიმი დარჩქალებერონ ეთეში.
ბებიქჷთ გედირთჷ დო მუშ საქვარი ჯგირო უჩქჷ დო მუში დუდიშა დარწუმებულ რენ ფერი კათაშ ანგარიათ მიდართჷ მონწყილობაშ მაღალუშა. თე მონწყილობა აკმოდირთუდჷ გეჸვენჯიშე: ნოშქერი, დახვენჯი დო უღურალეთ, უჩატარამ ხამუშე. უკული გალე გიმილჷ. დახუნალი ქაწოდგჷ წოხოლე, სხულიშ ჯაშ ჯინჯიწკჷმა დო ქოდახუნუ თაქ მუში „პაციენტი“. ქოდიჭყჷ ბებიქ:
„ადა მარია, დადა მარია,
მათე მარკოზ დო მარია,
ადამიშ სქუას ჯერღვ ჭყვადუ
ვუშველათ დო ვარია,
ქუმუვოჭიშეთ-და ვუშველათ,
ვარ-და, ფუი თეშ განქარია!“
იჩიებჷ თეს ბები დო უჩატარამ ხამუ ჸალშა მიკუბიჯჷ. ჭიჭე ცირა ხოლო თაქ ალურე მუმას დო უჯინე თე ოძირაფუობას შურხირილო. ვორწყექ მუდგარენ გოხარცქუაშა აკაბურცხა უკინდუნ. ოწმახუშე ბგინაფულე მუ მაჸუნუ შელორსასინ დო თეშ გეშა კიდირს მიჭყანსჷნ, ედომუშამ ასა-გასას მილუანს ოლებერი ხიოლიშ ღიაბი.
გათუ ბებიქ შელორსა დო ოკითხჷ ასე „პაციენტის“:
- მეფკვათათო?
- მეფკვათათ, გამას არზენს ით.
- მეფკვათათო, ოკითხჷ ხოლო ბები დო ხამუს ხოლო უმოსო მიკმუნჭირანს ჸალს.
ათაშ მასუმაშა ოკო კითხას ხოლონ თეშ, გოთ გოხორცქჷ ჩქიჩქუქ დო ქომაღუზჷ ბების ხელეფს.
- მუმას მუშენ მიჸვილუნქია მარგო ბებიიიი, ვა მიჸვილა მუმააა-ვა დო გოჯღიუ მარა მუ ჯღიუ!
მერქაშ მამალას გეცუ მუკი-მუკი მახორუ მეძობელეფქ დო გამუნოცის ოზეშა, მუქ მოხვადუა-დო. უკული გოუჩეს ირკოჩქ ართო გური მუდგაქ მოხვადჷნ თის დო გეტირხჷ ძიცაქ.
- სი ბოროია ბაღანა, მუშა გაშქურინუა.
მუმას გვალო გოჭყოლადუდჷ მუში ჸალიშ ჭუაშ ამბე დო ქომუკუხუტოლუაფუდჷ სქუა დო ქარჩქალენდჷ. ინა მიკარტყაპუდჷ მუმას დო შიკინუნდჷ. ჩილამურეფი მაღვარღვალუდჷ ცოდა ჩქიჩქუს. მა ავრე ძიცას ქობღურუდი დო აშიბკერკელუდი დიხას. მეტი ვა მიკინდუდჷნ, ეფერო ვორდი გინორთელი თეზჷმა ძიცაშე.
•
ბაბუშ ჩიება მიჸორდჷ ირო. მუდგარენ ჭკვერული, მესიაკონური გითორაგადინეფი უჩქუდჷ. ტაბაკის მიკოვუხედითჷნ, ირო ვოკვირუდი, ასე ვარი, ასე თქუას ოკო მუდგარენ მაქ - ეკორაგადინჷ ოკონია მუდგარენიაშიავან ეფერო ურთანდჷ მუში პიჯის ირო, სოვრეშეთ უკიბირობაშ გეშა, უკუმელა კილერწყებედჷ ხვალენ.
ხანდა უჸორდჷ ჩხონაფილს დო ბაღანეფსით ხანდას მოჸოროფაფუანდეს. დოხუნელი კოჩი ვა მაძირედჷ თოლშა დო ირო ვარა უშქურიშ ოკოროფუშა მოშქვანდჷ, ვარა ჸუმურს ბკოროფუნდით წორო, ვარა ონტკას ვოფუნუანდით, ნამუსჷთ ირო სუმენეჩიდოვითი გრადუსიშა მეხოლაფირს გითმიორინუანდჷ. წუწელი ონტკა დო წუწელი ღვინი უღუდჷ ირო.
სუმარუა ვა რდჷ ბაბუშ ფანიასინ, ვა ფშჷ. ბები შუმაფილი სუმარეფს, ვიშო ხოლო ოჸუნუანდჷ უკული ონტკას, ტყობაშე.
ჸვანაშ ხაჩქუა ხოლო ბაბუქ დუმოგურუ. ართი დღას, თიზჷმა ფხაჩქით, ბაბუს უფი მუმაყვარყვალუდჷნ თეშ ვუწი: ბაბუ, ხექ გამუმოლჷ, მეტი ვა მიკინდჷ მაქ. იქ - ხაჩქია თექ! დო ქოგიმაძიცუ.
ხანდაშ ნორმა ვა უჩქუდჷ. ბაღანაქ ოკო იხანდასია, შხვანერო წაურსია, რაგადანდჷ. ხვალე ათეშ გურშენი ვა მიჸორდჷ კახათიშა მოულა - შხვა მეტი ირფელი მოხიოლუდჷ თაქიანი. ბაღანას იშენი, ოფუტეშ ბაღანეფწკჷმა მისხუნუდჷ ბურთუა, ლაჸაფი...
მეღუმურგილე კათა ვა მაძირედჷ თოლშა ბაბუს. მეძობელ ბაღანა რდჷ ართი, ხვალე თიწკჷმა მიიშჷ ჸუდეშა, მუჟამცჷთ ოჭკომალს გუთმანწყუნდესინ, ტანშა უგინანდჷკონ ეფერო, ირო მუში ბორჯის.
მა თე ბაღანაშ ოჭკომალიშ ჭკომუა ბჯოგუდჷ ძალამო - ღეჯი მემიქარებუნ ეფერო ირქაფუდჷ ირო... ე ჸუჯეფი ხოლო გარძახჷ თიწკჷმა გოცქვირონდუდჷ, მუჟამცჷთ თინა ჭკომუნდჷნ დო ირი თიშ კიბირიშ გეცაცაფას ხოლო იბსიმედი ჸუჯის კარაკანო. მა გევოლუდი დო მიმნტებუდი ჟი, სოდეთ ბეთჰოვენიშ სიმფონიეფს ჩუთმუართენდი ჰალამო, ეკონია ხონარშა.
ართი დღა რე დო ოთხირეს გითუვოხეთ. ჩქიმი ჯიმალეფი ხოლო თაქ რენა. ვოხვარუთ ბები დო ბაბუს. ბკოროფუნთ თხირს დო თეწკჷმა, ჩქიმი უნჩაში ჯიმალეფი ართიანს უხვიცუანა. ბაბუ რაგადანს, - გიბაღუნა ასე, ვარა ქოგინოგიჸუნუანთ ჭინს ოჭიშის დო ოშით გაჸინანია რულა. იშენით ვა მეხვარეს მუთუნქ.
ქაშაჩირთჷ ბაბუს, მარა ვაშაჩილათუდჷკო ნოტე მაქ, ფთქვი უკული - მა ქოგინმონწკირჷ ბონას ჩქიმ ჯიმალეფიშა გიოშქუალარი ჭინი. მებღვარანქ დო მიბრულექ. ოშით... ძიცა, შორშე... ქუგაჸუაო ოშით რულაქ. მა მუ შქას ვორდი მაქ, მებებრჯღელანქ...
•
ბაბუ იშენით, დასურო ძალამო ქომიჸორდჷ. მერეთეფს კილასვასვალანდჷ ირო. ხანდათ უჸორდჷ დო კოჩიშ ჸოროფა ხოლო უჩქუდჷ. ლერსუა ოხუჯუდჷ. ოღადალუდჷ მეძობელეფს უკული. ფურკიშ გითოშქუმალაშ ამბეს ხოლო, ხვალე მუში ვითაართი დადოჯიმაშე დოსქილადირი აკა ჯიმას - გრავაშას კინმასქიდუდჷ, თინა ხოლო მინშა, შხვაწკჷმა ჩემპიონი რდჷ ედომუშამ ოფუტეს.
სუმი ჯიმა ომუმალონე ლიმაშ ბორჯის აფუდჷ ნადინეფი. ართ-ართი კახათიშ მობირეეფიშ ბუნაშ ხემანჯღვერი ჸოფე. მაჟირა, კახათიშ დუდმახვენჯი ჸოფერე გვალო, მარა ოფუტეს გილნორაგადინუენა ოსურეფი, მუში ჯიმალეფქ მიდართეს, ირკოჩქ მიდართჷ დო მუ ვემურსია. გეკორთუმჷ ისით დო მიდოურთუმჷ, სოვრეშეთ ის უკული ვა დოურთინჷ.
ბაბუ ხოლო გვალო ფრონტის ჸოფე ნარინა, სოდეთ ყარულობაბორჯის მუწკჷმა ართო, ჭე მიკოკინელს გერედჷნ ეფერი ჯარიშკოჩი ნტებე ვიშო დო თეშ გეშა ბაბუს ხოლო ეჩიდოხუთი წანათ ხვილუა ნოლებუე. უკული მიდგარენ ხვამელ კოჩის ურსხებჷ.
მის უჩქჷ, ქოდოუხუნუაფუდესკონ, მა ხოლო ასე თე ამბეეფიშ ემაჭარალო ქიპუაფუდიო შურო. დიდი ამბე ასე, ვეპუაფუდი-და, მარა იშენი.
მა მუაჩქიმს გიწულუენია ოკო ხანით, ჯიშო მიღუნანია, რაგადანდჷ ირო. ოშოთხი წანერი ჸოფე პაპუჩქიმი, ღურუნ. ნორაგადუე - ანწი მოკონია მა რინა, ვარა უკახალენ მუთა ფშუნია. შურდგჷმაშ ლიაშა გილნოვე ოჯინუშა დო ლიშის ხოლო მუშით კილმურხუანდუან, ეფერო ქოჸოფე.
- გებენი კოჩი ვორექია მა, ხუმლა კოჩი ვორექია მა, ნორაგადინუე ირო.
ართიშა ბაბუს, ლაკაციაშ ჯაშა ეშულებჷ ბურჭულით, ოცხონტუშა. ნოკანტარუე ნოჸელეფს დო თუდო გითნორღვაფუე. ბები ხოლო თაქ ჸოფე, თუდო ათნოხვე თე ჯას დო ნოკოროფუე ნაკანტარას. უნელო დუდის ართი ნოჸელა ქოგენთხაფჷ ბების დო ქომეუღვარაფჷნ, ბაბუს გიმე გიმუჯინუ, მუქ აღოლუა დო. მოურქიებჷ უკული ბურჭული დო კითიშა ქოგეუშქუმალჷ ვიშო. კითი ხვალე ტყების ნომარგებუე. გიმუძახაფჷ ჩილშა თუდო: - ათე კითი ოკვათალი მაჸი დო დუც მერკვათუნქია სი ხოლო.
მიდუჸონაფუნა ექიმშა. ექიმს უთქუალჷ, - თე კითი მეკირუაშა ვა ღირჷ, ვაკირდუ დო მეფსოფათია ვიშო.
- მესოფუნქ ვარი, დუდს მერსოფუნქია უთქუალჷ ბაბუს, ვა დოჸუნაფჷ ექიმს მუთუნით. - მა ჩქიმი ათე კითიწკჷმა ართო მნთხორანია ოკო, გოუციგანუაფჷ ექიმწკჷმა.
მუ შარა უღუდჷ, ქომეუჭაფჷ ისით დო გოუკირჷ, მარა აკმარდალ ვა რენია ენა, უთქუალჷ.
მაჟირა დღას კინ ხეახაშო გაკირუშა ქომეურთუმჷ ბაბუს დო ექიმი აჸონებე - კითის აკორდუალა ჸოფუდჷ დოჭყაფილი. ათაშ გინასქიდჷ კითიშ დინაფას ბაბუქ...
•
მიარე ხანქ მიკილჷ თე ამბეეფიშ უკული. მა უნივერსიტეტის ქენიბრიცხი. გამუოჩირთი ჩქიმი ოჸოროფულ ოფუტეშ რინას დო ნოღაშ უშურ-გურე კიდალეფიშ ჯინათ აჭიროთებული, ხვალე გილაფუბშანდი უკული შხირას. ოფუტე მორკუდჷ, თიშ უმკუჯინუო, ნამუდა სტუდენტობასით მუშობური სიჰამიე გინოჸუნსჷნ...
მუ ჰამო ქოპოფჷ ბაღანობა ასე გურს ვუჩანქინ. ბაღანა ვორდინ იწკჷმა გვალო აში ვა მიმოჩქუდჷ-და ეგჷბა დო ბაღინაფილი ვა ვორდი-და მინშა ბრელი მუთუნით, მარა ასე გინმუოჯინექ თენეფს ირფელს თეშ მაშორაშენ, მითინიშ უკულაში ბაღანობა ვართ მა ნობღვე. ასე მიჩქჷ ულირი ბორჯიშ ძივთი მუ რენ. იფშინანქ თენეფს ირფელს. ბაღანობა მართუ ითამუ კინი უკახალე, მარა ფურინელი დღალეფიშა მუთუნი ვა მუნოხუჯაფინუე კოჩის.
ნოსტალგიურ კილარწკინუეფი მისოფუანს შხირას… ბრელ ხან რე დადი ვა მიძირუნ-და (ბაბუ იშენით ვა პუნს ხომ უკვე), გინმოფჭყვიდუნქ დო მეურქ ოფუტეშა. დადი ოზეშა გიმმოურს დო აწმაზადუ. აწმაზადუ მუშ ნარდი მოთას. მოურს დო მიჩიებჷ, ბებიქ ქუგგალუ, ქუმორთიაო გოლუაფირია დო გინმობჯუნუნს, ფსხუპუნს. იფხუტოლუა გურშა, ბჯუნუნქ მუშ ჭირაკილ ხე დო ღვანწკის. ეშე ეთმიფხვამილუანქ… ბგინაფულენქ, ჩქიმ ფიჟვეფშე ეშნაკაშა შურიშ მაქექა რენ დო ჩილამურეფი მუწმომტირხუ... მუჭო ირფელშა ქომისხუნჷ თიშ ართ ძირაფა, თიშ ნარღმიშაწყორილ, ხიოლით ეფშა თოლეფი. მუჭო მიჸორს თიშ ჩვაფალით ჩიება. ბები, ჩქიმ მარდუალი ბები…
2013 წ. მარაშინათუთა