ფუჯიში ნინა
ართშახ მაფაქ დუძახუ მუშ გაგესქუას დო უწუუ: "არძაშ უგემუანაში მუთ რენ, გამიხაზირია!" თი კოჩიქით მიდართ დო ფუჯიშ ნინაში ოჭკომალი გუუხაზირუ დო ქუმუღუ. მაფას ქიმეეწონუ ათე ოჭკომალქ დო ოჭკომუნი უწუუ ხოლო: "ონჯუაშა შხვა ოჭკომალი გამიხაზირია, მარა არძაშე უგემური რდასია!" თი კოჩიქ ხოლო ფუჯიშ ნინა გეჭოფუ, უჯგუში ოჭკომალი გუუხაზირუ დო ქიმეუღუ. მაფაქ ოჭკომუ ოჭკომალი დო უწუუ: "მა სი არძაშ უფურაში გამიხაზირი მაქი გიწიი დო არძაშ უჯგუში ოჭკომალი მოთ (მუშენ) გამიხაზირია?" "ეე, მაფა ჩქიმია, – უწუ თი კოჩიქ, – ქიჸანას არძა ჯგირს დო არძა ფურს ნინა ორთუ. ნინა მუჟანსით ჯგირს იჩიებუ, გემუანი რე; მუჟანსით ფურს რაგადანს, უმოს ტკბილი დო გემუანი იჸიინია (იჸუაფუნია)."