ქელია ეხვაია
რუსეთ –თურქეთიშ ლჷმაშ ბორჯის, ოფუტე კოკიწკჷმა, მიდგარენი ქელია ეხვაიაქ ქახვადჷ თურქეფიშ გინოსკილადირ ურდუმს, ნამნეფსჷთ ინგირწყარიშ მაჟირა განშე ნოკობუენა გინულა. თინეფქ ქელია ეხვაიას უზოჯეს, ფონი ქუძირაფუდჷკო თინეფშან. ქელიას გერინელო ნჩურუა ნოჩქვე დო არძოშე დურუმი აკანს გერინელო გეგნუნჩურჷ ინგირწყარი. მელე გინულირქ დურღენეფიშა ქობურსჷ დუდი. ომარ–ფაშაქ დერწუმჷ თაქ ინგირწყარი წელშახ რდჷნ დო ურდუმი კოტოშა (მართუშა) გემშეჸონჷ დო ჭიჭე მალჷმორეფით ძიუთ გინასქიდჷ შქვიდალას.
ქელია ეხვაიაქ თედორე ბერიშ გერგეზობა გუმაჟირუ საქორთუოს.
ქელია ეხვაიაშე თელი პოემა ნოჸოფე რაგადებული, მარა ჩქინშახ ჭიჭე ნოჭყვედიქ მაჭირინუ:
კოჩ რექ დო ვარ ნდემი
ეხვაია, ქელია
ინგირ თეში გეინჩურუ
ვაიშოლუ წელია.
დურუმიშა გეირღვაფუ
მოზისხირე ნტერია.