შურობუმუ სამარგალო
გოლუაფირო შურობუმუ, ოდაბადე, დიაჩქიმი,
ბრელშა გური წყანწყილი მაფუ, წვალებას მიაჩინი.
ჭიჭე სქანი ბრალი ქორე, მინი თაში მიაშქვინი,
მარა იშენი ვადესერდა, უჯგუშობას მიარჩქილი.
გოლუაფირო შურობუმუ, ტუტაში ფერი სამარგალო,
ფერს შურო მუ მერჩანსჷ, თიზმა მორთხოზ, თე სანგარო,
იშენი ხოლო ჩქინი ბრალი რე, ვაპოფეთ სამანგარო,
მითინქ ჯგირქ მაკათესჷნი, გერეფს ქაშურაგვეთ ძალო.
ჩქინი ეშმაჸოთამალი ვათანძარა უნასი რე,
ჩქინი დიხაში ირფელი სქვამი, გალენიშო მუნაწი რე,-
ვადემდით ჩქინი მინჯე, ჩქინი ჯგირიშ მონაწილე,
დაჯანჯებე ჩქინი ცოტნე, დიდოსტატი კოსტანტინე.
ხვალე ზვიადი მობაღჷნა დუდი დო ბოლო ნარინაშე,
ჯვეში ბორჯიშე ნაშინა რექ, კოლხეთიშე, აიაშე...
ვაფირქენდ აიეტი სქანი დღაში დალიაშე,
საღორონთო სქუა გირდჷ ონწე ოწვაწვაიაშე.
სასთაული კირკეში მოხ, მესიაკონი მედეაშე,
გუბაზ მაფაში ნერი სო რდჷ მუხანათიშ ფეთებაშე.
მითინ დღას ვეფირქენდ, სქანი ტერიში მენდებაშე,
ფთქუათ ქუჯიში კოჩონაშე, ჩქინი შოთა დადიაშე.
ართი ბორჯი სით ქიგელ, ვეშილებე დიდი ვარდე,
ჯგირობუას ვაგაიგენა, სქანი სქუა ღურას ვათენქ.
ღორონთიში მოჩამილი, ვამომლასანი სქანი კართე,-
გოლუაფირო შურობუმუ, ჩქინი სქვამი ოდაბადე.