შხვადოშხვა
გურ ეფშაფილ ჸოროფათ,
გაკომიღეს ჩხორო ფათ,
იშენ კუჩხის ქიგუვორეთ
ჟინ ღორონთიშ ჭყოლოფათ!
სი სქანს ოკო მუკულუე,
სკვამას ოკო ღურჭულუე,
უბადობას ქახვადჷქჷნ -
მუკ-მუკ ოკო მუკულუე.
მუშ მანწარა ჸოფე მუზა,
შარას ქიგლაჲტალენცჷნ,
ჭარუნქ, მის უჩქ მუსხის, მარა
იშენ ვამკოჲტალენცჷნ.
ჭუა სქანით მოღალირი,
გურც მეგამილ ქვერსემ ყამა...
სქან სისქვამეს, სქან სიტომბას,
სქან ჸოროფას დოიხვამა!
მითინ ვაპუნც სქანი მეთე,
ვარძირუნქჷნ გურ ფუნც ხეთე,
მივარანქჷნ სქანდა მეფრთე,
სოხ ვორექო ჟირშა ებრთე?!
შურ ერზამილ ნოთეშორო ვაიღუ-და,
ჭყონიშ ნერგი ოზეს ართშა ვაირგუ-და,
რინაშ ნოფულ მუს გაგინე, გურ კილერსი -
ვაგაჭარე, ვაგაჭარე ჯიმა, ლერსი!
გოთანდუ დო მასქურქ ჸვას ჰამას ქიგნომქაქალუ,
ოჭუმარეს ერზამილ გურ შქას ქიგემფაფალუ,
ათე მარდ დო ჸოროფაშ მეტ შხვა მუთა მაპალუ,
გოღანერი ნარზა ჭუა გადინუ და დარჩქალუ...
- ზაალ ჯალაღონიას
ქაშებრძღი დო ქაშებგვანი დიარას -
ლერსიშ, ელე ეშნანათა პოეტიშ.
ნოტე, პუნდან სქანნერ კათა მიარას...
ნინა კურცხჷ დო მილმეხორუ პელეტის!!!
.................................
ცქვაფაქ მუთა რღოლუას, მუჭო გინონრბოლუას,
ლერსიკონშე მიაჸუნ ღურელ ზიტყვაშ ჩოლუას!
მა უკოხლე მივაჸუნუქ ნაკვერუა-გორუას.
შოშეს მეურთ მა დო ღურუ
უკუმელას, ხვალე, წორო.
სინთეშ რაგვინ! - თოლ მაწკურუ...
ხასლას, ღურუ ალმოღურუ!
აკისერჷ.
ალუოხექ წყარმალპიც დო
ჸურზენიშ ჩილამურს ვუყურწუა.
მუზა გილახე ლუღიშ ჸას დო
მალაღურცალო უცვანგუანს ჩქიმ
უფონდიკე ლერსეფს.
ქიმიოშურდჷ ხოლო ართ დღაქ ბორჯის,
თოლეფ დოწკურჷ დო ქიმნიქუნჷ უჩა.
თუთა მუშ თეს გიოჭვალანს ლარჯის,
ამარ-ამარი გემნომირთას ჸუჩა.
ნაჭოროფუ ლუღიცალო უგემურო მეურს დღალეფ,
ეთეშ მოგენს ართ დღა მაჟრას, მუჭოთ ნაჟირუაშ ღვალეფ...
მუნაფაშ პოპორეფს მენჩურუნს
ბაიაშფერ ხვამარდი.
ელმერთუ მინშა დო მიკმოდინუ...
ვურჩქილექ შოსტაკოვიჩიშ ვალსის დო
გურს ეშასხაპუაშახ აკაბუცხა ურკჷ.
ჩქიმი ასა-გასას გორინელ ბუძგურიეფი
ლიშიშორო მუმაგამუ მუკი-მუკი დო მა
დუც ეთმიბჯუმანქ თე ჰამო ჭუეფით.
ბრამსიშ მუსიკაწკუმა მაართა აკოხვალამა.
ეჩდოვითოსუმ მერქა რე მუკულირი.
თოლეფი ჩილამურით ირჩხუ.
თოლოწონი აწომირე წირი წანაშ წულა...
წორო მოწენს წყურგილეფი - წულუ, წიმი, წალე.
ნაწვანთირა წკირიშ წვანდის, წკანტილ ნაწკაპულას,
წიმოციკუ წიწილა დო წიუ-წაუს წულანს.
გოჸოროფილ ვა ვორექ დო
ჸოროფაშე ფჭარუნქ,
მის უჩქჷ მუჟამ მესურებუნ,
მემიჩქჷ, თიშო ფჭვარუნქ.
რახან, თოლეფქ ვემკმადვინ დო ვემკომინჭუ ლურქუ,
მოკოდჷ, ლერსი ფჭარიკო დო მუმადგუკო შურქუ.
ზიტყვეფს ქომუძახინ, ხათე გეცუ ჯგირქ დო ფურქუ...
მუზაქ ორცას ქელმოჯინ დო ფსუალეფსუ დურქუ.
მიწუ: „ამსერ ვამმართინე, უკულ, ჭუმან მურქუ.“
ათეშ მორჩქილაფა რდუ დო დახე გომხორცქ გურქუ.
ჩქიმ მოჯგირექ თენა ბღოლუნ, მუ ქიმნას შხვაშ თურქუ?..
მუჟამც მუდგარენ ძალამო მოხიოლუნ,
გური ბურთიშ კამერაცალო მამბარუ
დო მა მოშქურჷ თიქ ვაგომიხორცქასინ.
მუ რე უკულ თენა ირფელ კუნტახანით რენ-და?
მა ათეცალ კუნტახანიშ ბედინორობეფი ბრდუნს...
მუ ჰამო რე კანკალეშა
რინაშ დუნაგურეფ ჭკუა,
აბა სკოლაშ ნაგურეფი,
დუც მუნოფხუ ამარ, ქუა!
მევულ შოშეს, ჯაბიერი.
მასქვამია ცირა ენმოძიცანს,
ცა მანწყუმუ.
თაკარი ჩხანა რე.
წყურგილპიც ჭიჭე მაბოშია
ჸუმენს იჸვილუნს.
ცინდალ ისირქუნს ხელეფს.
დადი ყებურს ეკოხიოლანს
დოჭვენსია დო...
ნ. გ. -ს
ამდღანერ დღას მიგახვამა,
წიმი გილინუდას ირო,
გორტიბაფდას არძა ხვამა,
სკან სკვამ სახეშ გოლვაფირო!
მა სკან ბირაშ მუმარჩქილეს,
გურქ გუმართას ქიჸი ჟირო.
ფთხულე ჟიშე გუმარჩქინეს
სკან დუდ დომრინუას ჯგირო!
მა სკან გურიშ გოლვაფირო,
გოლვაფირო, ირო ირო!
მუჟამც ჸოროფაშე დო ხიოლშე ბჭარუნქინ,
ეთიმწკუმა, უგნუღალჷ ჭუა მიშმორე ტანს,
ხვალე თინეფშე ჭარუა მუთმომიშქვანს.
ჯაბიერქ დო მოფირტვინაფილქ ცას ქელუოჯინი,
უგშუჩინებჷ ხიოლით ემაფშჷ გურქ.
ვო ცა: ანწ უმოსის ქუმნორდვა ძივთის!
ირდუ ბორჯი დო იფხუაფუქ
კონჭის გერთაფილ ძაფიცალო,
მი რე დუნდებუნ, მა მუ ვაფუქ?!
გილულ ხვალახეთ, გილულ ცალო...
მურიცხეფს ელუოყიყინანდი ღუმა.
ფკითხი, თქვა ხოლო გითმოყიყინანთო აშო -მაქ.
გომიძიცეს. თუთაშ მაშხვათ გინმართ ხიოლქ.
ვაიკვენანო, ირო ხიოლშე დო ჸოროფაშე ბჭარუნქინ?
ვარინ, ქუგორჩქინან, მუნერ...
ხიოლ დო ჸოროფა ალამირე გურშან.
გვალო შხვაშ ჭარუა მოკოდჷ, მარა
ჩხვინდშა მიგია ხე, ელმორაგადუ მიდგარენქ.
გოფსქიდი. ანწ დღას ვაბთქუანქ რინაშ საჸალეს.
უკლაში რექ ხანით, მარა ჭკუათ მოტოლუა.
გამიგონებ ჭიჭე კვაღაქ, დიდ ჯა გოთოლუა.
მუდგა ბორჯის ვაშერხვადენ, დღას ვამკოილუა,
სკან თოლეფს დო სკანი გურს ჩქიმ დუდს ქუგოილუა!
- (ზაალ დო გიგა)
- (ზაალ დო გიგა)
უშანქარე დირფა, გოშანქარელ სხულით,
ჸოროფიან სუფრა, ქვერსემ, ტომბა შურით.
წკონდა მარგალ კათა, მუშ ნინა დო თურით,
ჯგირით გიშნაგორა, ვართ სოლეთინ ფურით.
ირთუნდ ჯიმალობას გოდაჩხირელ გურით.
სქან სისქვამაშ ძირაფათ
ხიოლს შურაჸუნაფილქ,
ლერსიშ ჭარუა მიფკორინე.
მუზმა ხანს ვეგშამირთ მუთუნქ.
საფაჩიშ მაშხვა ჩილამურქ ქელმაჸუნ თოლს.
გუმაშინე, ლექციას მილახუნელს,
ვაგორწყედიკონ თეშ, ოჭკორიეშე მინმოჭვიტინანდინ.
ასეთ თოლშა აწომირე თი მერქა, კარი მუკუონჯი დო
სქან ჸოროფათ ერზამილ თოლეფშა
მიმაჸინჷ დიო უგინაფჷ ხიოლქინ.
თიფის ფცალუნდი დო მეჩხვერე ჭუკიქ
გეკლასხაპჷ სოლედგა რდუნ.
დუდ მეფცალი დო გოზისხირელ ცელიშ პიჯი,
თიფის ქოგუწიმინდე. ხათე თიჯგურა გარაქ გემიოლჷ,
ბაღანობას, დიაჩქიმ ბლახუნდჷ მინშან, თიმწკუმა მიჩქუდჷ ათაშ.
თაშნე ლექინ მიგოჩქუნო მა თე ლერსეფს ფჭარუნქინ?
ქუგორჩქინას მუზმას იმნგარქ, მუზმას გილაფთვალუნქინ...
სი ელახიშ მურიცხშორო ბარჩხალანქ დო ვალუნქინ,
ქუგოძირას გურიშ ტომბას მუშ მასქვამათ ფალუნქინ!
ქიგინიო, მუჭო მიჸორქ, მუ უგურეთ ფხალუნქინ?!
მუჭოთ ცინდალ ათგაკირუ, გუგახუტოლ, მუგანჯირუ,
თეშ მობჯანუ სქან ჸოროფა, გემახონარ, გემობირუ,
გურს სიტიბა ინმაკათუ, ქვერსემ ხიოლ ინმაზირუ,
სქან გინარგა პეულქ ქოფალჷ, ქოძირ, მუშ მასქვათ პირუ!
მუჭოთ მაფალუ ბულიშ ჸას
ელატახუნქ დო წყარ მალუნ,
თეშ ასე ჟიშე ათე ღვას
გიოწენს დუღა ჩილამურ.
კვარჩხშე გინმიქუნანს
ორთა სერს,
გუთმოთანდუ.
ჩილამურს ინმაკვარკვალჷ
დიაჩქიმიშ მარჩინუე თოლეფიშ ჯინა.
გურიშ ჯერღვის ფსოფუნს თე გინაფა.
ტორონჯიშ ფსუალეფი
მიკიღვარღვჷ ცას,
იმუნუანს.
ხექ დო ორაგადეს მეგორუნქ...
მუთუნ ვარშე ფირქი ირფელშე უმოს საჭვებო გაფჷ.
ხექ საათობათ დო ფირქე ათაშ მუთუნ ვარშენ...
გალე დამორჩილ ალარე დო
ჯაშ ფალეფს ალედიარ შურხირილო...
სი გინაფულე მუჭო აშგაზოთონჯუ ხე დო ხე შქასინ...
შურს მიოჸოთა აფუნშა, ბრელ ხანიშ უძირაფჷ ჸოროფილშა,
თხირიშ ეწვანაფილ ფალეფ გურშა ქიხუტოლუე დო
გიჭყოლიდუე ართ ჭურჭულია რექ თელ დიხაუჩასინ..
თუთა ქაშქვილცალო მოღირაკე,
მურიცხჲ საგანშორო გუჸოთამუ...
ქაწირინე თოლშა სქვამი პეული...
ირკოჩი მიახიოლანს თის დო სი ოდიარე -
ხასლას ალუჩანდინ, კუჩხიშ გედგუმაშ გეშა
მოსოფილ-მორგინჯილ გეძუქ უწირსფალეთ...
ნანა, სქან გურ გოლვაფირი ბჟა მა!
მარა ქორე, ვამომგორუაფუქინ...
სქან მარდუალ ბარჩხალი დო რზამა
შურს მიფენთენს, ქოიჩქ, დიდა მაფუქინ.
მუნაფილ დღა. ჯაზი.
თინერ რჩქალა ალმორე ასე,
ითამუ, დიადიხა ვორექ დო
ბჟას გუვაკვარკვალუქ
ჸოროფათ გინორთელი...
ბედინერებას უბადობა ვაქიმინე.
ათეშენ, უბადო კოც ხოლო
ბედინერებას ვუზალანქ.
მუზმა ხანი რდჷ
თინერ ადამიერს გილაბგორუნდი,
მით დობთირანდჷ მა ირნერო
დო წიმი მიდამიჸონანდუნ.
დო ამარ, მუთ იჸუნ ქობძირი -
თინა მა პოფექ.
მორთ, ჩქი ქუვორდათ უნივერსუმი:
მა, სი, ჸოროფა - ხვალე თე სუმი!
კოსმოსიშ სასქუოშე ატომ აკა კაკალიაქ,
დიადიხას გეგმიფხე დო ქიმუვარსხი სქან ატომს.
ჸოროფათ ახნარებულქ, ათაშ კვარკვალ-კვარკვალიათ
ქიმუვაზე წყარ დო დიხას, ცა დო დაჩხირს, მუჭოთ ცომს...
ქარ-ბორიას, მინდორიას,
გილებრულექ, ბღურუქ ხიოლს,
ოდიარეშ რია-რიას,
სქანდა მეფჭვარ შარას მიოლს...
მა ვორექ აბსოლუტ ჸოროფა,
ქვერსემ გური დო
კათა პიჯგოჩიჩინაფილ მიჯინე
ჩქიმ ჸოროფაშ ეფშა თოლეფს აუხვადუნ.
ფირქენა, ვარ-და ჯგირო ვა ვორექ,
ვარ-და მა მუდგარენ მოკო თინეფშე
დო თიშენ ვუძიცანქინ.
ვარ თქვან გურიშ ჭირი,
მუთუნ ვამკო თქვანდე.
ხვალე თქვა ქორდათ ჯგირო
დო თქვან ბედინერ სახეეფს ვორწყედე,
მეტ მუთა მოკო.
მა იბჩიებუქ გურიწყულო-
ღორონთს დოუხვამუდას დიადიახას
ედომუშამ კოჩიშობა მაქ
დო ჟინცა ჰამენს მიჭიშუანს ირო...
ართი კოჩი ხვალახე,
ამარ ხვალე ალახე,
ჭუეფ ვაგინალახე.
დეჭკოლუ დო დელახუ,
ჩქიჩქუს ხოლო ალახე...
სქან ძირაფას მივახიოლუაფუდ -
მიჩქუდ, ქობძირ კინ ჩქიმ შურიშ ნოწილი.
თი სქან გურშე მუკოღალირ ჸოროფა
ათაშ უღორონთეთ მუშენ გოწილი?!.
ირფელს ათაშ მუშენ, გიბრაგუა გურშა?
მუშენ მიმაჭუ დო მუშენ რე პტენქ შურსუ?
მუშენ მიმნჭუაფუქ უჩაღართამ ღურშა?
მუშენ ვეგშმაბკურცხუქ, ვავოთხუქ თე ლურსუ?!
სოთინ ვარე ძიცა
თიშე უჰამაშ,
ვინემ პალატას,
სოდეთ პაციენტეფს
გვალო ოძიცეთ ვაუღნა საქმენ...
თელა დო ღურა შქას
გინმალ მერქა,
ირიშენ სანწულ მუთუნ
ათე ცაშ თუდო.
ითამუ, ირიათონს ინმანჭუქ...
მა ვორექ ხვამა,
სი რექ ჰამენი.
დო მოკო სქვამას,
ირო რხვამენი...
სკანშახ თელარა
ართ ფერიში რდუ.
ასე, ფერეფი ვამაკოროცხე...
ხიოლ მორდელე,
ირფელნერ ჭუა
გონქირაფელე,
გაკობურაცხე...
მინშა თინერ გლახა "მა" კილმურს ჩქიმდე
დღაშ სინთეშა,
კინ მა ბწამალანს დო კინ მა პილუნს.
ოღონც, უკვე ვამიჩქ ნამ "მა" იჩიებ თეს ირფელს,
თინა, მისით ბჟაშ ბონილო მეუღ დუდინ
დო ვარ, კინ თი გერი -
შხურიშ ტყების რე მიშაფულირინ...
სქანწკმა დუდს თეშ ბგინაფულე,
ითამ წყარს ჩხომი ვორდე,
მიორქ, მუ ფქიმინა, ვამაფულე,
ვეშემლებ ვამიორდე!
ასე ვორექ თინერ რჩქალი
ვამაფ შურო შურიშ ქალი...
მა ხომ ღორონთს ბგინაფულე, ნაჭვემერ დღას გალე,
მუჭო მიჸორს წვანე ფურცელს გითაბუნუ ჭვეთინ...
შურიშ ჭუას მუთა ოხვარ. იშენ მუთა მალე,
მუ რე იშენ, ვედმეთხი დო დღას ვეშელი, ვეთინ!
ოხ, ჸოროფა, თე გურს მუჭო ფუნდი!
ირო ჩქიმ შურს პეულცალო პუნდი...
მედინ! მოკოდ, დიპილიკო დუდი,
მარა მუქ მუჩ ბაბა მა იშ მუნდი.