ჩერჩილიშ გუმნათქუეფი
უინსტონ ჩერჩილი ბრიტანარ ოხემონჭე მოღალე, ქიანაშ პრემიერი 1940-45 წწ. დო 1951-55 წანეფს, ნობელიშ პრემიაშ ლაურეატი
-ბოლშევიკეფ დუდო ოჭყანა ბირკულეეფს, მუდა უკულ გამანჯან თინეფი.
-მით ბოშალაშ ჟამს რევოლუციონერ ვაჸოფერე-უგურე რე, მიქით ხოლო მოჭიშაფილობას კონსერვატორო ვეგნირთუნ-ტვინგალი.
-ამერიკალეფ ირო ორწყენა თინუ გინნაჭყვიდას, ოღონდა თიშ უკულ, მუჟამს არძა შხვა დოსქილადირს მოქექუნან დო გეულიბორუანან.
-ჩერჩილიშ ბიუსტიშ გონწყუმაშ ცერემონიალს ართ სქვამ ოსურპატონჷქ უწუ თის: მისტერ ჩერჩილ, მოკო გიჩქუდან, ნამდა ამდღა გოთანაშა გებდირთ დო ოშჷ მილი გიბლი, მუდა თქვან ბიუსტიშა მომინწყუმუდკო მაფორი. ჩერჩილჷქ ხოლო ეშმაკურო მოწკურ თოლ დო უგამუ-დიდ შურჷრძღაფილო გინოიგანდითია კინ თით.
-უპუნქტუალობა სანგე რჩქვანა რე დო მა ნთელ რინა ვოლიმუქ თის ჩქიმსი.
-ქორშუდან, ნამდა მა უმოს მიბღი ალკოჰოლჷშე, ვანდარო თიქ ჩქიმდე.
-თინა რდუ ნთელ დიადიხას მოდვალირ ძალამ გურამ, უშქურანჯ ერი. მა ხოლო ბხვადუ პატიქი თიშ ჯოხობუთ მიგურგინუდკონ. ინა ხოლო, მენდ მიღუ, ნამდა კალკალეშა თე ჯილოს, გურამს დო უშქურანჯის, ბონჷ სხუნუს ვარძენდი, სო გიმურინუაფუდკონ მუშ ჯღვალიკი.
-ბრიტანეთიშ მაართან ლეიბორისტ პრემიერჷშენ, რამზეი მაკდონალდჷშენ:-თის მიდგა შხვაშე უჯგუშო შეულებუ გილუა მუდანობაშ ზიტყვა ქენანტირინუას ფიცინკელა არსიმეფსჷნ.
-პრემიერ სტენლი ბოლდუინიშ გურჷშენ:-თინა კალკალეშა სიმართეს ხოლო ქამკურაჸუანდუ მინშახ კუჩხის, მარა მალას ეთმიკინანდუ ნჩაფას დო კინ ალიღალენდუ რზას, ითამდო მუთუნ ვამოხვალამედკონ.
-მა გუვაფსენი, ნამდა ოკო წუმობრჩქინდე ჩქიმ სასვება გარჯება-გენწყუაფათი, ნამდა ვორდე პუნქტუალურ, დუმათვინებელ, დოჭოფილი, თაშ ნამდა, გუმვორჩქინე არძა თი ჭება-ანდი, ნამუთ არძაშე მენარკო მიღუ მომარდებული.
-ღანკიშ მეჭირინაფა ქოგოკონადა, ვეცადათ რდათ დელიკატურ დო სვენერი.
-თეჯგუარ პოლიტიკურ ინსტიტუტეფიშ სირინაშ ჸოფირებაშ შვანს ჩქი კალკალეშა იშენთ მიჭირინუანა შხვაშ არსიმაშა განაჩენიშ მეჩამა.
-ჰიტლერჷქ ონოფეშა გამშეჭკირუდა, მა ცქვაფა-დიდებას ვადუვარკენქ ეშმაკის.
-ფანატიკოსიე კოჩი, ნამუს ვეშულებუ დითირუას თოლწონუეფი დო გუგმოთირუას ჩიებაშ თემა.
-სქვამ ოსურიშ ცხაკუა ვართ ეფერ ომურღუე დო ჰალა-ჰალა რე. ინა ხო თქვან ნარაგადუშ გურჷშენ უანწაშო ვეგნირთუ.
-ამანა ანდანაძგალუერიე, საგამათ-გატყურიობა ანდახონარამიე.
-ნთელ რინას მა უმოსო დუდიშ გუმოხანტუაშოთ ვორდ მორსხიპილი, ვანდარო დუდიშ გეჸვილუაშოთ.
-ჩქიმ მეჭირინაფუეფშქას უდიდაშიე თინა, ნამდა ჩქიმ ალმასქუ დუვარწუმი ოსურო მოლაპუნაფუდკონ.
-ნენსი ასტორჷქ უწუ: თქვა ჩქიმ ქომონჯ ქოჸოფედითკონ, ბურნუშა ლაბანს ქენოირღვანდითია. ჩერჩილჷქ უგამუ: თქვან ქომონჯ ქუვორდიკო, თი ბურნუს უორჩანებუო გებშუნდია.
-თის უღუდუ ჩქიმოთ კეოტი არძა ჯგირობუა დო ნამთინი ჩქიმოთ ედორიაშ მუმაკორნებელ კილი.
-კლუბი, ნამუს მაკათურეფიშ ძვარძვინიენ, ვარე კლუბი.
-უმოღე რე დო პოტიკი ნარაგადუ: „ვორთუთ , მუთ შიოლებერიენ“. ოკო ბქიმინათ თინა, მუთ უციო რენ.
-ვაგმოჭყვიდირაფუათ იშეიშენთ თიმწკილა, მუჟამს მა გოჭყვიდირაფუანთჷნ.
-ჩქიმ ნახანდილა-სარჯელს ისტორია მიფოთუანს, თით უმოს, თე ისტორიას მა დობჭარუნქჷდა.
-კაპიტალიზმიშ კილიე სორგინიშ უწორწო გარიგა. სოციალიზმიშ კილიე უმუთელობაშ წორწო გარიგა.
- პოლიტიკური ტალანტი გიშმარჩქინდუ ჭყანას, გეშეჩინე, მუ მოხვადუ ჭუმან, ართ მარას, თუთას, წარმოწანას...დო თაშ ხოლო ჭყანას, ნამდა გენწყე, მუშენ ვერთ თექ ირფელჷქჷნ.
-მიჩქუდუ სირჩინუეთ დობღურუდი, მარა მუჟამს ნთელ ევროპაშ ქობალიშ ბაღუქ რუსეთიქ ჩხვერიშ ჸიდირ ქედიჭყუნ, ქემებხვად, ნამდა ძიცათ ღურა მიჭარუ.
-მუ რაგად ოკო, ეგოისტ ვორექ. თეჯგუარ ვარექჷდა, ვართ მუთუნს მიოჭირინუანქ.
-თქვა ქემგაჩეს სხვენაქ ლიმაშ დო ონჯღორეშ შქას. თქვა ონჯღორე ისხუნეთ დო მიღენთ ლიმას.
-პრემიერიშ პოსტის თიშ მებულიშ, ლეიბორისტ კლიმენტ ეტლიშ გურჷშენ: -თენა რე შხურ შხურიშ ტყების.
-მისტერ ეტლი ძალამ მორდებუან კოჩიე დო თის რსულ ოფაზ უღუ, რდას თეჯგუარი.
-მუჟამს ქუწუეს, ნამდა ჩემბერლენიშ გენჭირა ეტლიშა, მიუნხენიშ პიჯალა-აკონწყუალაშ მიღებაშენ, ძალამს გუნია გვერიშ დომინირებას ცხვიტორიშ კიკოშა. ჩერჩილს დუნანდულებუ-მამჩქუ უმოსო ცხვიტორიშ კიკოშ დომინირებას სალათაშ ფურცელჷშავა.
-ბერნანდ შოუქ ტელეგრამათ გაჩინებაფუ ჩერჩილს-თქვანოთ ჩუალირიე ჟირ ბილეთი „პიგმალიონიშ“ მაართან წუმორინაფას. მოლეჸონით გუშა, ქოიჸუნა თეჯგუარჷდა. ჩერჩილჷქ უგამუ-მაართან წუმორინაფაშა ვამთმაინე. ქომურქ მაჟიაშა, ქიჸუ თეჯგუარჷქჷდა.
-ხუთწუნამ ჩიება ოშქაშე გიშმაგორალწკილა სასვება არგუმენტიე დემოკრატიაშ უკნუ.
-კანადარ ჟურნალისტიშ კითხირჷშენ, ხო ვაუღუ მუთუნ თოლჷშა მოლაფირ ამერიკაშ მახ, ჩერჩილჷქ უგამუ-ძალამ თხითხუ ტუალეტიშ ქარტალ უღუნანია დო ძალამ ჩაბაქია გაზეთეფი.
-პოლიტიკაშოთ უდიდაში დოთირუა ივაფუდუ, ნამდა სიგუთიე ხოლო თეშ ეფუათ დო მესხაპილო ირშუაფუდასჷნ, მუჭო სობორუენ.
-მა ვაბჭყორუქ კრიტიკაშ გურჷშენ თიმწკილა ხოლო, მუჟამს თინა დირფუობაშენ ეშალაფირიე მუშ ბორჯიშ რეალობაშე.
-მუთუნ ვამოიძინანს თიჯგუარ ადორიას, მუჭომსით-მუჟამს გოჸოთანა დო ეგოჩილითუანა.
-მომირჩქილუაფუ გუმნათქვი, ნამდა ლიდერს ჸუჯი, მუჭო შეულებუნ თეშ, გიმე ოკო უკინებუდასია. ათეშენ ხვალე ართიშ რაგად შემილებუ-ბრიტანარეფს გუჭირდუნა ათე პოტიკ პოზას მარენჯ ლიდერიშ ჯინა.
-აკახვალე მუთუნ შილებე რდას მოლაბეეფწკილა ართო ლიმაშე უანწაში-თინეფიშ გალე ლიმა.
-ჯოღორეფ თუდოლეშე ათმოცქვირინანა. ციბეფ გეთმოჯინენა. ხვალე ღეჯეფ მიცქვირინანა, მუჭო გაბრასჷნ.
-მა ცაცის გევორექ ჸოფუწკილა შიოხვამილაფარო. შხვა საქვარიე, დუდო ჸოფუ ქორენო მონწყილი თეჯგუარ გამანჯიშოთ.
-მენჯელ დო უბირ კოჩი კალკალეშა თიშენიე უბირი, ნამდა ვართ მუთუნ უღუ ორაგადე.
-ქიანას ანაყუ ტყურა უზურ გილევალუ დო არძაშე მერმენწა თინა რე, ნამდა თინეფიშ გვერდი წკონდა წყარიშ სიმართე რე.
-მითინს ვარაგადე, ნამდა დემოკრატია რე მანჯებაშ წკანტილ-უკილე დო მოკო-გუთურ ფორმა. მართალ უთქუალუნა, ნამდა დემოკრატია რე მანჯებაშ უსანგეში ფორმა, ვემიბღენთ უზურს არძა დუნასქილედისჷდა, მუთ ხოლო მუთუნჟამს გულიბორუაფუნან.
-სოდე ვით ვითოშ ეკნაჭარა რენ, ვევაფუ კალონიშ სეფაფი.
-თე მოშინებას თოლით უძირაფუ სისქა თხილანდუ კითხირიშ ფარსაკჷშე.
-დიპლომატ რე თინა, ნამუთ ჟირჷშახ იზმონენს, სონდარო მუთუნს ვათქუანდასი.
-მითინ ვადოჸუნს თის, ნამუთ არძას დოთმაჸუნუნ.
-სვენერ კოჩი არძა ჩილათას ხვალე დუდო ვაუშქვანსჷნ, ინა ვარ, შხვას ხოლო არძენს თეშ შანსის.
-დიდ ნასხუნეფიე თინა, ნამუქ ადრეხუშე დუშქვუ ჩილათუეფ, ნამუშე მუთუნიშ გურაფა შილებენ.
-ნაციაშ მანჯება უმოს ეფიე, ვანდარო ოთხ სქუაშ მორდილობა.
-ჩქი არძა ქიღალი ღანძგ-ქჷღუეფ ვორეთ, მარა მემოჩქუ, ნამდა დუდო მა მარწკინაია ვორექი.
-მუ უი-უით მოთმიბხუჯანქ ჩქიმს ჭკუაშ გურუშ იმპულსიშ შქირიტუას.
-ფარაშ შაყარუა ძალამ მარგებელიე, თით უმოსო, თენა უკვე ქიმინელ ქააფუნა სქან მასქერეფსჷდა.
-მა გვალო ეფას შურგუმორძღელ ვორექ ირფელით, მუთ სასვება რენ.
-ირო მოცაცილ ვორექ დიბგურუენ, მარა ირო ვამოჰამუ, მუჟამს მოგურუანა.
-აკახვალე, მუთ მოკო კონსტრუქციულ დისკუსიაშ უკული-მუდგანეროი ქიმიბხუჯუე დორხველ ზალამეფწკილა.
-ხურგაშგალე რინაშ შვანს დღას ვავაკრიტიკენქ დორხველ დუდკათას, მარა ჸუდეშა დორთაშო დო ხათე გიმნიბგანქ თეს.
-ჩქიმ წანერობას დუდჷშა მოლახაფაშ ნება ვემმაჩინე.
-ჩქიმ მოშხირხანობაშ ნოფორ რე 5-6 სიგარა დღაშე, 3-4 ჭიქა ვისკი დო მუთუნერ ფიზკულტურა ვარი.
-მა ირო ვიხუჯანქ, თაშიენო დო თეშიენ, დუვაჸუნე გულბანდიშ მილახუნაშ ირ ახალ ოკუჩხალეს ძღუმინიშ დო შირტინიშ მოლახ. თენა რე ჩქიმ ართ-ართ წუმოძინელ ანდჷეფჷშე.
-კონსერვატორ პრემიერ ნევილ ჩემბერლენჷშენ-ჯვეშ ნოღაშ კლერკი, ნამუთ ევროპულ სიხოლჷეფს მუნიციპალიტეტიშ ჭვიმაშ ობუმუ სვირიშ უწორე ბოლოშე უჭვიტინანსჷნ.
-ფელდმარშალ მონტგომერიშ რეპლიკაშენ, ნამდა თინა ვაშუნს, ვაუფურკუანს დო ოშ პროცენტით სინთელუანიე, ჩერჩილჷქ უგამუ-ბშუნქ, ვუფურკუანქ დო ჟიროშ პროცენტით სინთელუან ვორექ.
-მუჟამს ართ-ართ ლიბერალ პარლამენტარჷქ პელეტი გეგნოჭკირუ, მუდა სოციალისტეფს ქაკათათუკონ, ჩერჩილს თოლჷშა მუოლუ დო თქუ-მაართანო ვორწყექ, ნამდა ვალარა-ქვერქვია ნდუაფილ გემჷშა მენჩურუნდასია.
-ახალობას ბთხილანდ წესის-დღას ვამიშუმუდკო ონდღურჷშახ. ასე ხოლო დიბრჩინ დო ბლამენქ დღას ვადიბყჷრზენ მილაკაკალუაშახი.
-ბორჯ გილახა მელაბე რე.
-მა ირო ბთხილანქ თე წესისი: ვერულა, გერინა ქეშეილებუდა, ვეგედირთა, დოხუნა ქეშეილებუდა, ვადდოხოდა, დონჯირა ქეშეილებუდა.
-შორჷ მელენდღაშ ჭვიტინ ვარე მანჭიერი.
-ახალ ანბეეფიშ ჩიებაშა თინეფიშ გოჭყაფა მისხუნუ.
-ბრელ ლამენს გაამანგას ალდაჩხირ დო მაალდაჩხირე რანწკი.
-დორხველ ზიტყვეფიშ გიტოყირტაფა დღას ვამიმონკენს კუჭის.
-საბედინეროთ ჩქინ რინა დიოდღარო ვართ ეფერ ულიმორიე, ვარა რზას ონწეშე სამარეშახ უმოს მერქას გიბლენდითი.
-ირმუთუნ დიდებუანი უკაჭულიე დო უმოსობა თინეფიში გვალო ართ ზიტყვათ ირაგადუ: დუშელუა, მართგუმარჩქინუობა, ჭარაფა, საღალე, ცოდიალიანობა, მენდი.
-თუნობაშ მაფორ-გინმარენჯ რე თინა, მით ოდიარუანს ნიანგვერს თიშ მენდით, ნამდა მუ დუდო ბოლოს იჭკომუნ.
-კოჩჷქ ქოთქუასი, კუნტა ზიტყვეფ უჯგუშიე, ჯვეშ ზიტყვეფ ხოლო-სასვება.
-ირო თიშ ჭუა მიღუ, ნამდა პოლიტიკოსიქ ოკო ილოგინუასი თიშე ოპონონტეფწკილა ეყარებულ ნტერალაშ გეხ.
-მუჭოთ ვაოკო მორწონდან სტრატეგიან, კალკალეშა რეზულტატეფს ხოლო ქეგნაჯინით.
-ვარე დასაბაღუ ვიღვაწათ შურით დო გურითი; კალკალეშა თინა ხოლო ოკო ბქიმინათი, მუთ მემეთხუებუნა.
-მუ ქიას ოტაბიკუქი, მეარღანე თექ ქორედა.
-დღას, დღას, დღას ვეზმონა, ნამდა ნამდგაინ ლიმა ეფჷ ივაფუნ, დო თე რზას მოცაცილი, მით ვაოკო რდასჷნ თინა, შილებუანს დოთირუას თი ხირჩეფ დო ქარბორიეფ, ნამუსით ატაკუნ. ოხემონჭე მოღალე, ნამუთ ლიმაშ ჩხე დო ჩხურუთ რე გობურსელი, ოკო სანძღუნდას, ნამდა თე ქვარქვანტიშ ეყარებაშ უკულ თინა ვართ ხოლო პოლიტიკაშ ორსანტი, ინა ვარ, უგუთოლწონებუ დო უკონტროლე Yოფირებეფიშ ჭოფილერიე.
-დიდებუაშ უზურზომა გამაგობა რე.
-დიდ ნაბურჯონა რე ჭყანა-გილართე ართ კვარჩხანჷშე მაჟიაშახ ენთუზიაზმიშ უგუწყორუო.
-დღას ვეურთა ოჭიში ნალებუ ფარსაკის დო ვეცადა ნტებათ დუდიშ რსხებას. თეჯგუარ რჯებათ ხვალე გაჟირმანგენთ თის, მარა ჩხვინდ დო პიჯჷს ქარაგვუთ დო გორწკიმინაფილო გაწაზადუთჷდა, დაგვერდენთ.
-ჩქი ბჸოფირენთ თით, მუსით ეთმებჭოფუნთ, ვორეთ თით, მუსით გობჩანთი.
-მუჟამს კიღურეფ შურუბუმუო რენა, თუთიყუშეფ იჭყანა რჩხვიაფის.
-ვამიცქვათ ოგესქენჯე-ოზღვიე ტრადიციეფჷშა, მუდა თენა რე მუზმა ჟგერთი, რომი დო სოდომი.
-ქომოლობა რე ჭყანა-გედირთე დო თქუენ. თაშ ხოლო, ქომოლობა რე-ქოდდოხოდე დო ურჩქილე.
-თინეფ (დუდკათა) ალიღალენა პარადოქსულ რინას-პრინციპულეფ რენა უპრინციპობას, უჸვანტუეფ-დორდინს, გომორძგვილეფ-უჭყანობას.
-ძალამ მარგებელიე უკირბულჷშოთ ციტატეფიშ კითხირი. მუჟამს თინეფ შვენას გეშეცხაბარუნა, სქვამ არსიმეფით გოგოსხვარსხვუნა დო გისისინუანა, ნამდა უმოს ტომბას გეჩინებაფუათ თე ავტორეფი.
-ვამარაგადე, მუჭო მირთანს რუსეთი. ენა გასაჩინე რე, ლამოსობათ მორსილ ენიგმა. მორო, შილებე რდას ონჯამალ ხოლო-რუსეთიშ ნაციური ინტერესი.
-ართჷშახ პრეზიდენტ რუზველტიქ მიწუ-საჯაროთ ქიბკითხი, მუ შილებე გევოდვათ თე ლიმასია. მა ხოლო ხათე ვუწი-„უჭირო ლიმა“.
-მელენდღაშ იმპერიეფ გონუაშ იმპერიეფიე.
-ბალტიაშ შტეტინიშე ადრიატიკიშ ტრიესტიშახ კინაშ სალაფარდიქ დიშქვუ კონტინენტის.
-დუდო მა ოპტიმისტ გოხოლუთ. უმოს მარგებელ, მემჩქუდა, ვართ მუთუნიე.
-ენა ვარე დათებუ. ენა დათებუშ დაჭყაფუ ხოლო ვარე, მორო, შიოლებერიე დაჭყაფუშ დათებუ რდასინ.
-ჩქი გიმიბრჩქინანთ გურმოწყარებას, მარა ვათმიბთხინთ თის.
-ტრადიციაშ ართგურობას დღას ვაგუფარჩაკებუ ერი, ინა ვარ, მინი, გუმანგარებუ ინა ფარსაკუაშ ჟამს. მარა ახალ ჯინაქ ხოლო ოკო გორჩქინდასი, მოსოფელჷქ წიმ ოკო იდასი.
-რინაშ უდიდაშ ოგურაფუ რე გიჩქუდასი, ნამდა კალკალეშა ხანგა ხოლო მართალიენ.
-პესიმისტ ირ ჯან-ღვენას დობირკუას ორწყე დო ოპტიმისტი-ჯან-ღვენას ირ დობირკუასი.
-ადამიერიშ ნძალშულობა ირ სფეროს ირდუდუ, დორხველ დუდიშ გალე.
-სტატისტიკა გუ შუმილს განათებაშ დირგუწკილა, ნამუს მიკაპონალო ირინუანს დო ვართ ხოლო, გასინთორებელო.
ჩერჩილი სტალინიშ გურჷშენ
-რუსეთის დიდო გუმართუ, ნამდა უმონკაშ გამორსებაშ შვანს თის დუდენდუ გენია დო უდირაკუ გესქენჯთარ სტალინი. თენა რდუ არძაშე გიშარჩქინელი პიჯობუანი, ნამუთ იმპონირენდუ თი ორთაშ რსიოლს დო ჟამუბადოს, ნამუსით თიქ ნთელ რინა გილუნ.
-სტალინ რდუ ორთაშგალენ ენერგიაში დო უდირაკუ ნებაშ Yოფაშ ადამიერი, რასკვალა, მეკენჯი, დიალოგის უდუნდებუ, ნამუშა დუდო მა, ბრიტანეთიშ პარლამენტის გითორდილს ხოლო მუთუნჷქ ვეწმარინინუ.
-თის, უმაართანეთ ირიში, გაჩქუდუ დიდ იუმორიშ გინი დო სარკაზმი, თაშ ხოლო არსიმაშ აიწორო ეშაჩინებაშ ჭყანა. თე სახათი თისხით ეფშათ რდუ თიწკილა, ნამდა სტალინი წუმმოდირთუნა, მუჭო უგნუმაჟირებუ პიჯობუანი არძა ჟამიშ დო კათაშ დუდმანჯღვერეფიშ შქას.
-სტალინჷქ ჩქინდა უდიდაში მირსაქი გუმაჩამურუ. თინა უფლენდუ ტომბა, ირნერ პანიკას მორკებულ, ლოგიკურო გაარსიმებულ სიგუთიეს. რდუ არძაშე უგშულუ მიკოკირილუობაშე დუდიშ გიშაღალაშ უგამუ ორსანტი. თიქ გოჭყუ დო დიბაჩილუ გილუა იმპერია. თენა რდუ კოჩი, ნამუთ მუშ ნტერეფს კინ მუშ ნტერეფიშ ხეთ ჯჷლიკუნდუნ.
-სტალინ რდუ უდიდაში, უგამუ დიქტატორი, ნამუქ რუსეთი ჯაშ ოქოქათ ჩიბარუ დო ატომურ ჯაჭუჭურით მოქანჩილი ქოდიტუ. ათაშიე, ისტორია დო კათა თეჯგუარ ადამიერეფს ვეჭყოლიდუანა.
კინ თაქ-
-ჰიტლერ სტალინიშ გურჷშენ:-პოლიტიკურ დო ოგესქენჯე ჭყანათ სტალინი ქიანაშ მაშხვათ გინოჩქუ ჩერჩილს დო რუზველტის. ჩქინ ეიონწყუმუ რე თეშ დობრცამულუათ რუსეთ, ნამდა თიქ სტალინიშ მასშტაბიშ ადამიერ დღას ვაგარჩქინასი.
გინამარგალუ გიორგი სახოკიაქ.