ჩე მურენ დო უჩა მურენ!
წყარიშ პიჯის ჯარგვალი გემდგჷდ,
დუს მინარედ ნეძიშ ორო,
თუმა-ყვინთელ ქორთუშ ცირა
მიწონებუდ გურიშ წორო.
კუჩხიჩაფლეთ ფაფრთხუნდ ცუნდის,
ბჟას ეულას ვუწორუანდი,
სიმინდ მიჩანდ, სქუაცალო
მა ჩქიმ ჸვანას ვუფერუანდი.
სუმარს ღვინშა ვაპეჯენდი -
”დორღურუდა, ქივარა-და”
ოჭჷმარეშა ცაშა ანჭუდ
ბჟაშ ოცქვაფურ ”სივარდა”.
შური მაფუდ ჸოროფათ დო
სასიმინდე ლატით ეფშა,
ჩონგურს ”ჩელას” გივობირანდ
გურს მაჭვედუნ, კანკანეშა.
თუმაყვინთელ ცირაქ გეთხუ,
ჯარგვალ დოჭუ ნტერქ ქუაშგურამქ,
ბუნაგმოსპილ ტურაცალო
წყარიშ მოლე იკოპჸურანქ.
შხვას ჩქიმცალო მის ათქუე
გურიშ-ჭუა, აბა, მუ რენ,
ღორონთ ცოდათ ვაჩამთვალენს
მა ჩქიმ ბედის მივენდურენი!