ჩქიმი წისქვილი
ჩქიმი წისქვილი მესოფუნსი,
ჩქიმი სქიბუ მიგრიალუ,
თეში კარსი ირი დღასი
თელ ქიანა გიტრიალუ.
სქანი წკუმა ვორექინი
მა მუთუნი ვამოზარუ,
სქანი ჩიებას ურჩქილექი,
ბთარგმნუნქი დო ლერსო ბჭარუ.
მარა თე სქანი ჩიება
ირკოსი ვაგაგინე,
სქანი სოფინ დო ხინკოლიშა
ჩქიმიშ მეტი მის გარზინე.
სქანცალ ყალა გერსი ვარა,
ეცალ ოღალ მის აღინე.
სი შეილებუ გინატუე
კოჩი არძო შქირენული,
თენეფიში ხვამაქიე
ძალა მუთი ქიმერჩუნი.
შქირენულიშ მარსხებელო
ჩქიმი წისქვილიე მირეფუნი.
სი მუ სასწაული რექი,
სი მიდეღი ჩქიმი გური,
მიდგაქ სი მოიგონუნი
ჩხონაფილი თიში შური.
სქანი ხანდასი ვორწყექინი,
სი მა მუჭო ვაგოცქუა,
სქანი ნაჩიებინასი
ირიართო ლერსო ფთქუა.
იხინკოლი ჩქიმი რაში,
ჩქიმი სქურიში ნარდი ქუა,
გაჭირებულ თე ქიანას
კოჩი შქირენული ვადიტუა.