წუთ მამალა რე
თოფიშ გოლაფა, ჯუნა, ხუტოლ, მეხვამა რე,
ფაცხა, დაჩხირ, ფურკ, ღუმუშ ზალა რე,
ლაგვან, ღვინ, თამადაშ გიშაგორუა რე,
სახელიშ გედვალა, გერინელო ხვამა რე.
დიდაშ ძუძუ, კალამ, არკვანიშ კვანწაფ რე,
პირველ ბიჯაფ, ჩანგალ, რაგადიშ ჭყაფარე,
ოზე, ბაღ, ოგურონ, უმაღლესიშ თება რე,
ირო თხოზინ რჩქინაშ ეკინა, ძინა რე.
სამუშა, უფიშ წუმა, ღურაშა ხანდა რე,
შურ შურაიათ, რულა, ნჭაფა, ჭიშაფა რე,
ჯიმა კათა, დღეობა, შაყარუა, მეხვამა რე,
შენება, ღვენა, ართ მაჟიაშ წორაფა რე.
გორჩქინუშ ჭყაფილ ჸოროფა - ართო ჸოფა რე,
ძიცა, ლაჸაფ, სხაპუა, ბირა, შეფა, დიარა რე,
სკუალეფ, გათხუალა, მოთალეფიშ რდუალა რე,
მეზობელ, კერზ, მოჯგირე, რულაიათ ძირაფა რე.
პრეზიდენტ, მერიშ დორინა, გიშაგორუა რე,
ბუძოლია, ნირძ, ართმაჟიაშ ლანძღუა რე,
დუდიშ ჭუა, წნევაშ ეკინა - დოლაფა რე,
გურიშ ჭუა, ძალაშ ცუმა, დონთხაფა რე.
ჰავაშ თირუა, მასაჟ, აბანოშა გილოულა რე,
ექიმ, აფთეკა, ექთან, ლიფშეფიშ ძგვიტაფა რე,
ჸოფა დონჯირელ, ულირიშ გოშინა რე,
ბოლო ზიტყვა, ხვამა ჯგირიშ დოჩინა რე.
კიჟინ, წირწინ, გარა, მენარღაფ, გოლუაფა რე,
საფლე, ქუა, ნიშან, სახელიშ მუკოჭარუა რე,
სანთელ, ტაბაკ, კილეშ განწყუმა, მაჟარნეჩა რე,
ნალ, ნაზალა, შარა ულირიშ ხვამა, შინა რე.
* * *
ხანდა, ოჯახიშ ძირაფა თენა იფრელ-ართ მხარე რე,
თავარი რე, მუს უტენქ, მუ ოსკიდ ქანას სკან ნახელე,
სკან ერს, ოდობადეს საწმოხონოთ მუს უტალე,
დიდ კოჩანა, გერგეზალა, ერიშ ძინაშ მალამა რე.
ნაჭარა, მორძგვ ნახელე, ნახანდ ჯგირი,
ერიშ საქმეს ელარინა, წილ მარგ კილი,
დახვამ სკან ერს, ორიათონ სარგებელი,
ვარა, ჯა დორგ შუკას, შარას ართი-ჟირი.