ხე მუშა აწმაფორენა
ხე მუშა აწმაფორენა, ვართ მუთუნიშა, ვორეთჷ.
მერჩქვანელ რინას მეთხილო, უჯინეთ დღაშ დო სერითჷ,
ირფელი გუმაშინენა სო დუმორაგვეს, ბჭყოლესჷ,
ხე მუშა აწმაფორენა, ვართ მუთუნიშა, ვორეთჷ!
ოგურაფალო მიღუნა ცა, დიხა, გინოშურელი,
ოგურგინია ხონარი, ოდიშე ცაშა მერსხილი.
ოზაზაია რინა რე, დღა თუთას გინოწიმილი,
შორშე მუს ძირუნქ, მუთუნც ვარ, აკა შურიშა წიმილი.
მოზგილატირე სქან ნერჩის არძა ულირი, მულირი,
ოთქუალარი მუზმა რე, ვერაგადე-და დიჩუას.
ოკანთაია ნაჸოფი მიშო მაფ გინოწილირი,
ოკილოთარი მიჯინე, მი დამირჩქალენც თე ჭუას.
ქომიღუნანო მუთუნი ბორჯიშე ოკინდაფალო,
ართიანც გუვაწარწალუთ, მუჭო ბორია ოკიფუს.
დიხაშე მეულ ცაშა დო ლერსიქ ირფელი დოკიბუ.
ნარღეფ მაფ გიშაგორალი, არზეფიშ ოკუმაფალო.
შური რე გოხომაფილი, ფირქეფით გინისუნჯენო,
ვარა ოლანჯე ბორიას ომეხო გინართინენო?
დღას ვარე მუჭოთ გოკონი, ვაგკონ თეში რე, თინერო.
ტორონჯიშ ჭიჭე ონაგა არწიშა აწირინენო?
აქ ირფელ აკოშუმაფე, დღა სო რე გოლოშქერელი,
ცა დიხას ქელაბუნაფუ, გოლებირ აფუ კონკერი,
ონდებელ სოთინ ვაგაფუ, ონორცხვე გონოშქერელე,
ონასხერე რე თე რინა, ონგარალი დო ონგერე.
უბორჯე ბორჯი ქორენ-და, ჩქით ვებობრჯათჷ დიორდე.
ხეს გიკინებუ რინა დო მუნარე სერდაშ გაგაბი.
ძაბუნ, უანჯეთ გილულას, რინა მუშ გოკო გიოდვენ,
ტყურა რე, მართალ ვარენ-და, არგამათ ოკო რაგადი!