ჯღარუ თოლი
წჷრდ ფალუნც, იშვაშვალ, მუშენჲ დუვამარდე?!
ირჲ სქჷლედიში ჭყოლოფუა, სი ხვამარდე!
მუსუთჲ ჭყანა ვემშაძჷნი, მუთუნც ვარდე;
ფალუაშჲ ტჷბინც იშ ხოლოშა, ვე მიართე...
ინა ორე ვარა ჸუნგა, ვარა ჸვერე,
ინა ირო ოდინაფუ შარას გერე.
ორე ნახა უჩადღაში უფეროში,
მისჷთჲ გურცუ ვაუჰამენც ჩე პეროჟი;
ნორღვაცალო ერზამილი ღჷლე ვარდი,
ერბიანი, გოფაჩილი, ბჟაში ნარდი,
მესიშჲ ჭვიმათ გობონილი, ჩხაპალერი,
ოჭმარეში ცუნჯით გინოშხაფალერი.
გჷმაშინენჲ ჸოროფილიში თოლი ჯღარუ,
იბჸალებუქ დო მოსვანჯა ვამიჭარუ...
გვალაშჲ წვანდის ოსქვანც თჷრიშჲ გარგუნჯელა,
ჟი მუნარე ჩე მუნაფაშჲ ყორში ჩელა.
ბჟა ბარჩხალანც თოლი, ორქო თოლი გვირა,
ფორჷნც, ნწყუნცუ ფრინველეფიშჲ ჰამო ბირას.
ჩე ჩხორია უჭკვაჭკუანც ჩე ქაქაბის,
გურალაჭვილც ემიტახუნც ჭუა – ჯაბის,
აწმაძირე ჯღარუ თოლი, გურც მიხალუნც,
დო ჸოროფა, პიორელი ირდუუ, ფალუნც...
ჸოროფა რე ჭყოლირჲ გურცუ იწკაფუნი,
ალდაჩხჷრო ონტუუ წჷრდეს ჩე აფუნი...
გჷნაფალათ გოსორგელე წჷრდეშჲ კართე,
ფალუაშე ვაგანტინე, ვაშჷგართე.
ფალუა რე ჸოროფაში ნაჟჷრალი,
ჸოროფა რე ჩქიმ გურიში მანკირალი.
ფალირჲ ტები ორე შურიშჲ ორინალი,
მაფშალიაშჲ ორინალი, ოპირეში,
ორე შურიშჲ მალამა დო ობირეში...
ჩქიმი გური ინოჭვილი იშხანც ილჷნც,
აწმაძირენჲ ჯღარუ თოლი ცაშიფერი,
დო შხაფილი გური შერენც ნალჷმერი.
ჸოროფა რე ფალუაში ნაჟირალი,
ჯღარუ თოლი ჩქიმ გურიში მანკირალი.