ჰავას მუღუ თე ნაბირა
ჰავას მუღუ თე ნაბირა,
გეშამიღჷ რინაქ შური,
ბრელჲ ჩიჩიე მაფ ნაძირა,
ბრელჲ ჯგირი დო გოსოფური.
ჩქიმჲ თოლონწო წანეფქ მიკორთ,
კოჩიშჲ ზისხირც ჭარა შუნდჷ,
ჩქიმჲ ცოდილერს ბორჯი ინკორდ,
ართ აკანცჷ ვაჩერდუდჷ.
ორთაშჲ დოლოს კინივჯირი,
რულენჯობათ მუთაქ იშუ,
უკახალე მიკივჯინი,
უჩურცხალი სერი მიშუ.
თე სვანჯიშა ირფელჲ ღირჷ,
ვარ-დო, ჯვეშეფც მინოძ დიხა,
ფარანქ ბრელი გეკანქირჷ,
ეკართინჷ ბრელი ჯიხა.
ცაშე ნარღი მოურც თირო,
ურაგადუ კათას გლახა,
მა მუ ვღოლა, გოლვაფირო?
ბოლო ბირას ქიმვოძახა.
2014 წანა, ღურთუთა.