福州土腔聖經/創世記/1

←

福州土腔新舊約全書 (1937)

創世記/第一章

→

168807福州土腔新舊約全書 — 創世記/第一章1937

第一章

上帝創造天地
^一原始時候、上帝創造天地。
^二地是空虛混沌、深淵上勢烏暗、上帝其神運動落水面。
造光
^三上帝講、着務光、就務光。
^四上帝看者光是好、上帝分別光共暗。
^五者光上帝呌囉日中、暗叫囉暝晡、有暝晡、有日中、嚽是第一日。
造空氣
^六〇上帝講、水中着務空氣、⿰亻鞋分開上下其水。
^七上帝造者空氣、連分別空氣上下其水、就務將換。
^八者空氣上帝叫囉天、務暝晡、務日中、嚽是第二日。
使水歸海使地現出
^九〇上帝講、天下其水、着聚一位處、者乾土也着現出、就務將換。
^十者乾土上帝呌囉地、聚一堆其水呌囉海、上帝看將換是好。
使地生草木
^十一上帝講、地着生草、連結子其菜、共結菓子其𣗬、菓子裏勢務核、都憑伊種類落地上、就務將換。
^十二地就生草、共⿰亻鞋結子其菜、連結菓子其𣗬、菓子裏勢務核、都憑伊種類、上帝看將換是好。
^十三務暝晡務日中、嚽是第三日。
造三光
^十四〇上帝講、天上着務三光現出、分別日中暝晡、定四時、記年日。
^十五者光着天頂⿰亻鞋照落地禮、就務將換。
^十六上帝造二隻大光、大其管日中、細其管暝晡、也造許価其星。
^十七上帝排佈者光着天上、照落地禮。
^十八 ⿰亻鞋管理日暝、分別光暗、上帝看將換是好。
^十九務暝晡、務日中、嚽是第四日。
造鱗介羽毛
^二十〇上帝講、水着生盡価務活命⿰亻鞋定動其乇、也着務鳥、飛落天中空氣禮。
^二一上帝就創造大魚、連水裏所生各種⿰亻鞋定動活其乇、都憑伊種類、共各種飛鳥、也憑伊種類、上帝看將換是好。
^二二上帝祝福伊講、着生育盡価充滿落各海許裏、鳥也着生育盡価落地禮。
^二三務暝晡、務日中、嚽是第五日。
造百獸蟲蟻
^二四〇上帝講、地着生諸件活其乇、都憑伊種類、頭生、蟲蟻、野獸、都憑伊種類、就務將換。
^二五上帝就造地上其野獸、頭生、各種蟲蟻都憑伊種類、上帝看將換是好。
憑本身形像造𠆧
^二六〇上帝講、仱着造𠆧、憑我儕其樣式、使伊管海禮其魚、天禮其鳥、頭生、地上各種蟲蟻、連管全地。
^二七上帝就憑本身其樣式創造𠆧、創造伊、就是照上帝其樣式、創造喇男共女。

^二八上帝祝福伊、共伊講、着生育盡価、遍滿落者地、使地服汝管下、連管海禮其魚、天禮其鳥、共地上各種務活命⿰亻鞋定動其乇。
定衆生其口糧
^二九〇上帝講、地上四處各種結子其菜、共各種務核菓子其𣗬、我都賜汝做口糧。
^三十㑚各種野獸、天禮其鳥、共爬地兜各種活其乇、我都賜青草乞伊𠋡、就務將換。
^三一上帝看所造其都是盡好、務暝晡、務日中、嚽是第六日。

Information about this edition
Edition:
Source:	珍本聖經數位典藏 (fhl.net)
Contributor(s):	Davidzdh, 唐吉訶德的侍從
Level of progress:
Notes:
Proofreaders: