福州土腔聖經/創世記/7

第七章

挪亞共家眷帶連衆生其種齊上大船
^一 耶和華共挪亞講、落者世代中間、我見汝是義人着我面前、汝仱共汝一厝𠆧、都上大船。
^二 該當揀清潔其頭生、牯七頭牳七頭、賣清潔其頭生、牳牯二頭。
^三 天禮其鳥、也帶牯七頭、牳七頭、以致留者種類落地上。
^四 因再過七日、我剝降大雨落地上、四十日、四十晡、凡我所造其衆生、我剝滅落地上。
^五 挪亞就都憑耶和華所命其話遵行。
^六 當洪水浸者地時候、挪亞已經六百歲。
^七 挪亞就共𡚸仔連媳婦、都上去大船、避者洪水。
^八 清潔其頭生、共賣清潔其頭生飛鳥、共爬地兜各種蟲蟻。
^九 牳牯相配、都跟挪亞入去大船禮、照上帝所命其話。
^十 過七日後、洪水浸者地。
^十一 〇肘肘挪亞六百歲、二月十七日、大海其源頭都崩出、天其門空也開起。
^十二 雨逿地上四十日四十晡。
^十三 當許一日、挪亞帶老小、連伊仔閃含雅弗共三個媳婦、都入去大船禮。
^十四 伊各𠆧共百獸六畜、連爬地兜各種蟲蟻、飛鳥、都憑伊其類。
^十五 凡務血氣活其乇、一合一合、跟挪亞上去大船。
^十六 凡務血氣其、牳牯相配、憑耶和華其命都入去、耶和華就將伊關落船裏。
^十七 洪水浸者地、至四十日、水勢大、大船就離地浮起。
洪水浸地水勢極大地上衆生都浸死
^十八 水勢落地上莽漲莽高、船落水面浮來浮去。
^十九 水勢落地上漲頂高、普天下高山都浸去。
^二十 水勢高去山、一丈五尺、山嶺都㵥去。
^二一 凡務血氣活着世上其飛鳥、頭生野獸、共爬地兜其蟲蟻、連𠆧、都浸死。
^二二 大凡着乾地禮、有鼻⿰亻鞋通呼吸其氣、攏總都死。
^二三 着地面其衆生、自𠆧至六畜、蟲蟻、天禮其鳥、都滅亡、惟獨挪亞共齊着船禮其、都留伊活命。
^二四 水漲着地上、經一百五十日。

---

前一章 · 下一章 · 轉去《創世記》目錄

Information about this edition
Edition:
Source:	珍本聖經數位典藏 (fhl.net)
Contributor(s):	Davidzdh
Level of progress:
Notes:
Proofreaders: